پاکستان تھا میڈیائ سنسرشپ دیگہ ھم گیش بوتگیت۔

دیمترئ سالئ تھا ھم پاکستانئ تھا بہ عامین گیچئن کاریانی وھدہ، میڈیائ سرا بالواسطہ نہ تھانکا سنسرشپ پرینتگ بوتت بلکہ شہ پوج و ایجنسیانی نیمگا صحافی و ژورنالیست آن اخطار داتگ بوت، آ وھدہ عمران خانی حکومت بہ اقتدارئ سرا ھم نیاتت کہ پوجین اسٹبلیشمنٹ بہ گڈین سرئ وزیر نواز شریفئ حلاپا ھما گیچئن کاریانا بہ یک مھم بدل کرت و مُچین کوشستانا کرت کہ عمران خانی تحریک انصاف پارٹی واکا بہ دستا بگیت۔ پاکسانئ بنیادمین حکانی کمشن ھما وھدہ بازین احتجاج و ناوشنودیی درج کرتت، و بین الاکوامین مشاھد ھم چُنتی سوج و سوال پھاد کرتنت مگہ ھما سلسلہ بہ ھمادنا اوشتارینتگ نہ بوت۔ بہ میڈیائ کارکنوکانی سرا یک رازئ خوفی مسلط بوت کہ چُنتی ھالانی ایجنسی و چینل شہ اصلین ھالانی رپوٹانی شینک کنگا احتزاز کرتنا بناہ کرتنت۔ مگہ دیانت دار ئن صحافی کہ وتی فرض آنا دروست کننت بہ وتی ملازمتا شہ غفلت آ کٹ گپتگ نہ کننت۔

بالاخر پاکستانئ آزات و باتور ئن صحافی کہ بہ وتی ذمواریانی سرا پابند اتنت میڈیائ سرا ای عائد بوتگین تارینکئ حلاپا وتی توارا درائین وڑئ برز کرتنت۔ ای ھما ھال دیوک انت کہ بہ آوانی دیانت داری سرا ایچ وھدہ شک کرتگ نہ کننت۔ ای ھما مردم انت کہ بہ ھر حکومتئ وھدہ وتی ذمواریانا شرّین وڑئ پورہ کرتگنت، توپیر نہ انت کہ آ پی پی پی حکومت بوتہ بیت یا مسلم لیگ نوازئ حکومت یا راستامین وڑئ گجام پوجین حکومتئ۔

نون ھمی راز بری وھدان پاکستانئ تھا سنسرشپئ خراب ترین مثال درا بوتگنت کہ آوانا بہ پاکستانئ ھر گجام کوچہ و سڑیکئ تھا بری روچان یات کننت۔ اول سرا پیپلز پارٹئ سربراہ آصف زرداری انٹرویو آ شہ شینک بیگا بہ جیو ٹی وئ تھا اوشتارینتنت۔ ای دپ دیگئ آوازگ ھم اوشکینتگ بوتہ کہ مسلم لیگ نوازئ سربراہ مریم نوازیی انٹرویو و پرس کنفرانسئ سرو ھم اعتاب بوتہ۔ بہ انٹرویو و پرس کنفرانس تھا انچین ھبر درا بوتنت کہ شہ آوانی وجو نونین حکومت و آی نیمہ دارین ایجنسیانی بعض گناھانی پردگا فاش کرتنت و شہ ھمی ھبرا حکومت تروست و میڈیا تروسنتنا بناہ کرت۔

مثلا بہ وتی پرس کنفرانس تھا مریم نواز یک ویڈیوئ را ھم نشان داتگنت کہ بہ آ ویڈیو تھا اسلام آبادیی ھائ کورٹئ یک سروکین قاضی ارشد ملک ای ھبرا تسلیم بوتنت کہ آوانا بلک میل کرتگنت و پہ آوان اخطار داتگ بوتگیت کہ شہ آی وجا آوان مجبور بوتگنت بہ گڈین سرئ وزیر نواز شریف حلاپا فیصلہ کننت۔ رندا شہ آی ای قاضی آ شہ اسلام آبادیی ھائ کورٹ آ یک نیمگ کرتنت۔ ندیم ملک یک صحافی انت کہ شہ مریم نواز انٹریو گپتگنت آوان سوج کرتگنت کہ انچین حالاتانی تھا یک قاضئ باروا راستین ھبرئ پھدئ جتنئ کوشست یک صحافئ ذمواری نہ انت؟ ندیم ملک ای ھبرا ھم گشتگیت کہ اینٹرویو آ شہ شینک بیگا اوزتارینتگنت مگہ گجام صحافی یا ھال دیوکئ آزاتی آ شہ آی گپتن گجام حکومتئ رویہ باید بیت؟

و گون ای وڑئ کارانی کرتنا آوان آیا کرتگ کننت کہ صحافی آنی توارانا جال کننت؟ واجہ ندیم ای ھبرا ھمی وڑا درا کرتگنت کہ خدا کنت ھر چی کہ بیت آوان وتی ذمواریانا پورہ کنگئ بھرا ایچ وڑئ کوتاھئ نہ کننت۔

نجم سیٹھی پاکستانئ ممتاز و مزنئن صحافی تھانکا نہ انت بلکہ آوان بہ دیگہ بھران و دپتران پہ پاکستان بازین حذمت کرتگنت۔بہ ایشانی صحافیتی یا ھال دیگئ دیانت داری سرا ایچ مردمئ سوج کرتگ نہ کنت۔ آوان گشتنت کہ آوان وت لوٹوک اتنت کہ شہ مریم نواز انٹرویو بگرنت مگہ آوانی اینٹرویو ریکارڈ ھم بوتگ نہ بوت۔ شہ ایشانی ھبرانی دیما چینل ۲۴ ایچ ڈی سرا حکومت و ریاستئ بی دروستین ذرائع دیم شہ دیم پابندی عائد کرتتنت و پہ پورہ ئن مُلکئ کیبل آپریٹران ای ھدایت داتگ بوتت کہ آوان انچین چیزئ را شینک مہ کننت کہ بہ آی تھا پہ مریم نوازی عیلے آن بہ برزین کچانہ کورےج داتگ بوتہ بیت۔ بہر حال آوانی چینلئ نشریاتئ سلسلہ چُنت روچ رندا وھدہ بناہ بوت وھدہ کہ پورہ ئن مُلکئ تھا شہ میڈیائ سرا عائد بوتگین پابندیانی بھرا بدگشی بوت۔  بہر حال واجہ سیٹھی گشتگنت کہ آوان یک راز نہ یک رازئ اینٹرویوئ را گون بانوک مریم نواز تسر کرتنت کہ آ ھم پورہ نہ بوت و بہ آخرین دما اینٹرویو ھم اوشتارینتگ بوت۔

شاید پہ چینل ۲۴ انتظامیہ اخطار داتگ بوتہ بیت کہ اگہ ای اینٹرویو شینک بیت رندا پورہ ئن یک ماہ آی نشریات و شینک کنگانی سرا پابندی عائد بیت۔  شہ سرئ وزیر واجہ عمران خان باید انت کہ یک سوجئ بیت کہ آیا آوانی نوکین پاکستان ھمی کارانا جمھوریت پکر کنت؟