سرگال:پاک اۓ ایف اے ٹی ایف اۓ بلیک لِست آ اوار بی اغ اۓ گُمان

نزیخ مُچھین جہان اے منغیں کہ دہشت گردی مڑدُمیت آپا نقصان دؤخ ایں ،آنہی آسر بی اغ ضروری ایں ،ہمیں خاطرہ عالمی براسی دھشت گردی اۓ آسر کھنغ آپا اثر ماکھنوخیں کاروائی لوٹھغیں ،چھڑوئی آ ٹؤک آنگو دل آر پھَرامغ نہ لوٹھی مگن پاکستان دھشت گردی آسر کھنغ اۓ حوالہ آژ کھدیں دی سنجیدہ نویسا۔ایزاتکاکہ دھشتگرد آنی مالیاتی واہریائی کھنغ والا ادارہ فنائینشل ٹاسک فورس آ،جون ۲۰۱۸ آ پاکستان اۓ نام گرے لسٹ آ ماکھُزغۓ سا۔ایف اے ٹی ایف اۓ وٹاژ پاکستان آ یک سال اۓ مُہلت داسی آ شزغۓ سا کہ آں یک سال اۓ اندرا دھشت گردی آ آسر کھنغ آپا ۲۷ ٹک آنی منصوبہ چکا عمل کھنت یا بلیک لسٹ آ اوار بی اغ آپا تیار بی مگن پاکستان آ ہمیں موقع آ گار کھُزا،پھرچھے کہ دھشت گردی اۓ حلاپ گام گیج آنی بارو آ ہماں رپورٹ آنہی آ ایف اے ٹی ایف آ جوڑ کھُزا آں درست نیا۔ایف اے ٹی ایف آگو جڑسی ایں نوہ ٹلہ آنژ یک آسیا پیسیفک ٹلہ آر مان آتکا کہ دھشت گردی آ آسر کھنغ آپا کھنغ والا گام گیج آنی باز خاصیں یازد پھیمانہ آنژ دھ آ پاکستان اۓ عمل اطمینان دؤخ نیا ،ہمیں خاطرہ گمان اش انت کہ آں دہشت گردی ہمائی آ کہ پاکستان نی تونڑی ہمسائیگ ملک آنی حلاپ استعمال کھنانا آتکا ،آنہی تباہی اۓ سبب بی مگن پاکستان نی اے گُشت نہ کھنت کہ آنہی آر موقع نہ داسی آ شزا۔اصل آ دھشت گردی اۓ ردینی آ پوہ بی آ پاکستان آ کھدیں کوشش نہ کھُزا۔پاکستان اۓ لیڈر آں دھشت گردی چکا سیاست کھُزا،آنہی آ آسر کھنغ آپا عملی گام گیج نہ کھُزئی۔پاکستان اۓ کمان کھدیں پؤج اۓ دست آ رہسا،کھدیں جمہوری سرکار آگو مگن دھشت گردی اۓ دیم کھدیں دی بدل نویسا۔پاکستان اۓ دست رکھیائی آگو دھشت گرد ھِند او افگانستان پھجی آ دیگر ملک آنی مڑدم آنی زند گراناں پھیزاغاں مگن پاک لیڈر آں اخلاقی زور وتی چکا کھدیں دی نہ محسوس کھُزا۔ہمیں حالت آں زور وارا مُلک آنر لاچار کھُزا کہ آں پاکستان آ دھشت گردی آ آسر کھنغ اۓ کوشش وتی سطح چکا کھناں ،دھشت گرد آنی حلاپ کاروائی آپا پاکستان چکا زور ماکھناں۔ہمیں خاطرہ ھِند اۓ گون امریکہ،برطانیہ ،فرانس او جرمنی آ ایف اے ٹی ایف اۓ گرے لسٹ آ پاکستان اۓ نام ماکھنغ اۓ کوشش کھزغۓ سا مگن ہمیں لسٹ آ اوار بی اغ آ پھدا دی پاکستان حالت آنی لوٹھغ آ پوہ نویسا۔جہانی براسی آ اے منظور نعیں کہ پاکستان اندرا دھشت گردی اۓ فیکٹری جُزاں او آنہی آ پیدا بی اغ والا دھشت گرد مڑدم آنی حون بہائیناں،ہمیں خاطرہ جہان اے لوٹھی ہ پاکستان دی دھشت گردی آ مڑدمیت اۓ حلاپ منی،آنہی آ آسر کھنغ آپا ہر مناسو کاروائی کھنت مگن نی تکا دھشت گردی اۓ حلاپ آنہی گام گیج اطمینان دؤخ نیاں،ہمیں خاطرہ نوخیں اطلاع آنی روگا ایشیا پیسیفک ٹلہ آ پاکستان آ بلیک لسٹ کھُزا۔امیت اش انت کہ جزوخیں سال آ پیرس آ ۱۸ آژ ۲۳ اکتوبر آ بی اغ والا ایف اے ٹی اے اۓ اجلاس آ پاکستان آ بلیک لسٹ کھُزی آ رؤ او اگر اینگا بیسا تہ آنہی زمہ وار آں وا بی۔