سرگال:عمران خان آ سیاسی چیلنج دیما

عمران خان اۓ سرکار آ مشکل آگو دھ ماہ پورا کھُزغاں۔مگن ہمیں کھمیں مُدت آ آنہی آ کے ای وڑ اۓ مشکل دیما کھنغی بیسغاں۔اقتصادی بحران آ سرا آژ عامین مڑدم آنی سرین بھورینتھؤ ایر کھُزا آنہی چکا آئی ایم ایف اۓ بیل آڈٹ پیکیج اۓ سبب آژ عوام چکا ٹیکس ودھسا ۔عوام اۓ گیش بیسغیں بے اطمینانی آژ احتجاج بیس بی۔ہمیں احتجاج آ آواز دۓ اغ آپا سیاسی عمل ہی چھی اے کھُز کھنت۔جمہوریت آ عوام اۓ جزبہ آنی عکس داری سیاسی پارٹی او سیاسی تحریک آنگو ہی ممکن بیس بی۔ہمیں خاطرہ پاکستان آ عوام اۓ گیش بیسغیں بے اطمینانی آر دیستؤ یازد اپوزیشن پارٹی آں اے فیصلہ کھُزا کہ آں احتجاجی مظاہرہ بنِا کھنان۔ہمیں بارو آ پاکستان پیپلز پارٹی اۓ واگ داروخ بلاول بھٹو آ گوستی ایں یک شمبھے آ یک افطار پارٹی آ اے جار جھزا کہ اپوزیشن پارٹی آنگو صلاح کھنغ آ پھدا پارلیمان اۓ اندرا او آنہی اۓ درا سرکار مخالف مظاہرہ بنِا کھُزی آ رؤ۔حالانکہ ہمیں ٹؤک چکا دو راۓ بیس بی کہ اینگے وخت آ احتجاج پھرچھے بنِا کھُزی آ رؤ ہماں وخت کہ سرکار آ سروکی آ آئیغ آ یک سال دی نویسا مگن دوہمی وٹا عوام اۓ گیش بیسغیں پریشانی آں ہماں کہ سیاسی پارٹی آنر لاچار کھنغاں کہ آں اے ویچار کھناں کہ عوام اۓ صبر اۓ امتحان کھدیں تکا گِتی آ رؤ۔نوخیں سال اۓ بجٹ آئیغ والا ایں ہمیں خاطرہ راستیں ڈؤل چکا عوام اۓ اُمیت کھنغیں کہ آئیغ والا بجٹ آ آنہاں نی آپا چھی اے اینگے رعایت آنی جار بی ہمائی سبب آژ آں راحت اۓ ساہ گِت کھناں۔چوش کہ تنِک احتجاج آنی سلسلہ بنِا نویسااو اپوزیشن اۓ وٹاژ چھڑوئی آ آنہی ویچار پدھر کھُزی آ شُزا مگن زکر اۓ ٹؤک اِش انت کہ سرکار اۓ وٹاژ اینگے ھِچھ اشارہ دہ تنِک نہ مِلسا کہ آں ہمیں مسلہ چکا اپوزیشن پارٹی آنگو داس گپت کھنغ لوٹھی یا دہما آختغیں مسلہ آنر حل کھنغ آ آنہاں نی تعاون لوٹھی۔اپوزیشن آ بدنام کھنغ اۓ کوشش تہ باور آگو سرکار اۓ وٹاژ کھُزی آ رؤ۔مگن پاکستان اۓ میڈیا اندرا ہمیں ٹؤک اۓ سَک چرچہ ایں کہ کم چہ کم احتجاج او مظاہرہ آنی حلاپ پیرا دۓ اغ یا مظاہرہ آنی حلاپ سخت ایں رویہ اپنائینغ اۓ عمران خان او آنہی سنگت آنر ھِچھ اخلاقی حق نہ پُجھی پھرچھے کہ گوستی ایں سرکار آنی حلاپ مظاہرہ کھنغ،دھرنہ چکا نندغ او کینٹرز اۓ زریعہ آگو دگ آ خلل پیدا کھنغ اۓ کار آ آں سرا آژ اگا رہسغۓ سا۔پاکستان آ اے وخت مزن ایں چیلنج دیما آں مگن عمران خان اۓ سرکار اۓ زمہ وار مڑدم ہمیں مسلہ آنی چکا اپوزیشن آگو گپتران کھنغ اۓ اِلسؤ آں اپوزیشن اۓ حلاپ تیش دیائینغ والا پیرا دیاں۔پدھر ایں آنہی آژ جھیڑو گیش بی او گپتران اۓ دگ مشکل بی۔