سرگال:ایران اۓ حوالہ آژ پاکستان اۓ تزبزب

امریکہ او ایران اۓ نیمگا نیوکلائی مسلہ چکا گیش بیسغیں ناوشی آ خلیج فارس آ حالت آنر باز ردین کھُزا۔خلیج اۓ ہمیں حالت آ پاکستان اۓ دیما سجوں آنژ مزن ایں مسلہ وضہار جانبدار ایر کھُزؤ وتی داخلی مفاد اۓ پھجی پھجی آ بین الاقوامی مفاد اۓ محاپظت دی کھنغ ایں ۔اصل آ پاکستان آپا اے ناوشی ہمیں خاطرہ دی پِکر اۓ وجہ ایں کہ آنہی آ ایران او سعودی عرب دوایں آنی پھجی آ وتی وشتر او کہنیں سفارتی سیال داری اۓ محاپظت اۓ چیلنج دیما ایں۔پدھر بی کہ امریکہ او ایران اۓ نی ایں ناوشی آ سعودی عرب امریکہ اۓ وٹا ایں او آنہی زور ایں کہ امریکہ ایران آ ائیر استرائیک ڈؤل اۓ ھِچھ سخت کاروائی کھنت۔سعودی عرب اۓ الزام ایں کہ ایران آ ڈرون آگو آنہی تیل اۓ جاگاہ آنر نشانہ کھُزا او آنہی آ ایران آژ وتی سلامتی اۓ خطر ایں ۔پدھر ایں کہ پاکستان او سعودی عرب اۓ نیمگا ہماں وڑ اۓ نزیخی ایں سیال داری ایں آنہی آر دیستؤ سعودی عرب پاکستان آر وتی وٹا گِندغ آ باڑہ ایں۔اے ٹؤک دی زکر اۓ لائیق انت کہ ۲۰۱۵ آ ہماں وخت سعودی عرب آ یمن آ پؤجی مداخلت کھُزغۓ سا تہ ایران چکا پؤجی تعاون اۓ زور اسا مگن پاکستان آ ہماں وخت سمجھداری اۓ ثبوت داسؤ پؤجی تعاون آژ وضہار جتا ایر کھُزااو یمن آ وتی پؤج دیم دۓ اغ آژ انکار کھُزغۓ سا۔البت یمن آ سعودی عرب اۓ مفاد اۓ محاپظت اۓ وعدہ دی کھُزغۓ سا۔آنہی باوجوت دوایں مُلک آنی نیمگا نزیخی ایں سیال داری ایں او پاکستان اۓ یک مزنیں آبادی سعودی عرب آگو پاکستان اۓ وشتر سیال داری اۓ وٹا ایں ۔چھی اے عرصہ سرا ہماں وخت سعودی شہزادہ بن سلمان پاکستان آتکغۓ سا تہ آنہی آ ۲۰ بلین اۓ مالی مدد داسؤ پاکستان اۓ معیشت آ اوٹ داسغۓ سا۔پدھر ایں ہمیں حالت آ پاکستان ھِچھ دی صورت آ
سعودی عرب آ ناوش کھنغ اۓ خطر نہ گِری۔دوہمی وٹا ایران دی پاکستان اۓ خاصیں ہمسائیگ ایں او آنہی آژ پاکستان اۓ اقتصادی و سؤداگری سیال داری ایں۔گوادر او چابہار بندر گاہ اۓ سؤداگری اہمیت آژ پاکستان دی نپ او کھٹ زُڑتھ کھنت۔ہمیں وڑا ایران تیل لائین پروجیکٹ اۓ منظوری دی پاکستان اۓ معیشت آپا سود مند بیس بی۔ایران آگو سیال داری اۓ دوہمی ٹِک دھشت گردی آ آسر کھنغ اۓ مسلہ آ آنہی آگو تعاون ایں۔دوایں مُلک آنی نزیخ ۹۵۰ کلومیتر دراژ سیماں ایں۔آنہی آ بلوچستان اۓ جاگاہ دی اوار ایں پاکستان او ایران مِلسؤ دھشت گردی آ آسر کھنغ اۓ وٹا وشتر کار کھُز کھناں۔افغانستان اندرا دی دوایں مُلک آنی آپسی ایں تعاون دھشت گردی آ آسر کھنغ آ مدد دؤخ ثابت بیس بی۔امریکہ اۓ پھجی آ دی پاکستان اۓ سیال داری مزن ایں عرصہ آژ دھشت گردی اۓ مسلہ چکا جھیڑوئی ایں۔پاکستان اۓ دیما ہمیں سیال داری آ وشتر کھنغ اۓ دی چیلنج ایں۔