سرگال: پی ٹی ام سربراہ گون جانین خطران دیم پہ دیم انت۔

پاکستانئ پورہ ئن تاریخ موجود انت کہ درا کنت ای مُلک بہ مذھب، زبان، نسل و سیمانی بنیادا وتی شھروندانا شہ آوانی حکان محروم کرتگیت۔ چُنت وھدہ گون مذھبین اقلیتان ناانصافی بیت و چُنت وھدہ گون زبانی و لسانین اقلیتاننا انصافی بیت۔ بعض وھدان تھذیب اکائی آی شکار بیت و بعض وھدان گجام سیمی عوام۔ ھبر ایش انت کہ پاکستانئ تھا مُلک وت ھما کارانا کنت کہ دیگہ جاگان مُلکانی دشمن گون آوان کننت۔ بری روچان پشتون ئن استمان ظلمزیادتی نشان چیرا انت۔ ای گروپئ حکانی تحفظ جنگ کنگئ موومنٹ " پی ٹی ام" سربراہ رازئ کہ بری روچان نشانئ چیرا گپتگنت یک کوتئ شہ ھمی روایتین تاریخا انت۔ 

ای ھبرئ حیال بیت کہ پاکستانئ پورہ ئن آباتی دوصد و ھپت ملین انت و شہ ایشی ۳۰ ملین آباتی پشتون انت کہ مُلکئ دومی مزنتری آباتی انت۔ ای آباتی نون لوٹوک انت کہ تہ نون ھما ناانصافی کہ گون آی بوتگیت آی ازالہ بیتو پہ آی مردمان نون آوانی حک داتگ بنت۔ پہ ایشی شہ یک وھدہ تحریک رادگ انت۔ رندا شہ ای تحریکئ بناہ بیگا پشتون ئن استمانئ سرا ظلم دیگہ ھم گیش بوتگیت۔ چُنتی ھزار پشتون ئن مردم بی پھد بوتگنت۔ پشتون تحفظموومنٹ یا پی ٹی ایم لوٹوک انت پہ ای وڑئ مُچین مردمان گون عدالتین کاروائیان انصاف داتگ بیت و ھما عناصرئ کہ آوانی بی پھد بیگئ ذموار انت بہ آوانی حلاپا ھم کاروائی بیت۔ برزئ روکپتئ سیمان و بہ دیگہ سیمان کہگون آوان دومی درجہ شھروندئ وڑا رویہ بیت ای سلسلہ ھم بند بیت۔ ای وڑئ پشتون ئن شھروند ھم بہ برزین کچانہ انت کہ آوانا ماورائی عدالت قتل کرتگنت۔

گون گیرمُلکین واکانی مددا بہ آوانی سرا شورش پسندیئ الزام جتگ بیت و آوانی ٹحریک آ سبوتاژ کنگئ کوشست بیت۔ پی ٹی ام ھالانا بلیک اوٹ کننت و اگہ گجام ھالانی ایجنسی آوانی ھالانا نشر کنت آی را مُلکئ دشمن قراردینت۔ شہ ہوجئ نیمگا پورہ ئن وڑئ کوشست بیت کہ ای تحریک آ گون اوگانستان بستگی دینت کہ آنا پشتون ئن استمان گیشتر انت۔ اوگانستان شہ پشتون حکانی تحفظ موومنٹ و پی ٹی ام وش آتگی کرتگیت۔ مگہ پاکستانئ پوجکوشست داریت کہ ای تحریکئ ذموارانا بدنام کنت۔ بہ گئوستگین ھپتگان ای تحریکئ حلاپا جنگ کنگئ جارا ھم جتگیت۔ پوجئ گوشوک میجر جنرل آصف غفور بہ ای تحریکئ سرا الزام جتگیت کہ آی فنڈ شہ ھندوستان واوگانستانئ نیمگا بہ دست کاینت۔ 

دیگہ نیمگا بہ اسلام آبادئ تھا بہ یک ۱۰ سالگین گونڈک فرشتہ مھمند جیئنتن، زیادتی و قتل حلاپا احتجاج رادگ انت۔ حکومت ای احتجاج آ بہ ھر کیمتئ کہ بوتہ الاس کنگئ لوٹوک انت۔ بری وھدہ پاکستانئ تھا پشتونئ حکانی نیمہداریا وتی توارا گلالئی اسماعیل برز کرتگیر کہ پشتون موومنٹ باسک انت و نون بہ آی حلاپا اف آی ار درج بوتگیت۔ بہ آوانی سرا الزام جتگ بوتگیت کہ آوان بہ پاکستانئ حلاپا تقریر لیکنت و بہ پشتونئن استمانئ دلانی تھاپاکستانئ حلاپا نفرت گیش کننت۔ بہ آوانی سرا حلاپ دھشت گردیی دفعات تحت مقدمہ قائم بوتگیت۔ ای مقدمہ بنیاد سوشل میدیا تھا جاری بوتگین یک ویڈیوئ انت کہ بہ آی تھا گلالئی سماعیل گشتگیت کہ بہ پشتونانی حلاپا پھد بہپھدین وڑئ ظلم بیت و بہ جنگئ ناما فاٹا تھا گونڈکانا نشانئ چیرا گرنت۔ آوان بہ گونڈکانی حلاپا زیادتئ الزاما بہ پاکستانئ پوجی کارکنوکانی سرا جتگنت۔ اگرچہ حکومت بہ ۱۰ سلاگین گونڈک فرشتہ کشگی بھرا کاروائی کنتمگہ آ لوٹوک انت کہ پی ٹی ایم آ شہ ای مسئلہ دور ساتیت۔ 

پویس بہ یک تحریرین بیانئ تھا پہ پی ٹی ایم سربراھان ھال داتگنت کہ پہ آوان اینٹلیجنس رستگیت کہ اوگانستانئ تھا موجود ئن دھشت گرد بہ آوانی حلاپا ھلگر کرتگ کننت و آوانا نشانئ چیرا گپتگ کننت۔ بری سلسلہ چارسربرھانی نام خاسین وڑئ گپتگ بوتگیت۔ بہ پولیسئ ای تحریرین بیانئ تھا پہ آوان ھدایت داتگ بوتگیت کہ آوان گیرزرورین وڑئ دورہ مہ کننت، بہ وتی دورہ باروا گون ایچ کَسئ ھبر مہ کننت بہ عوامین اجتماعاتان مہ رونت ووتی گئس و الک و اعیالئ ساتوک بنت۔ پولیس گشتگیت کہ پہ پی ٹی ام سربراھان سرکارین گارڈ داتگ کنت۔ مگہ ای موومنٹئ مرکزین سربراہ علی وزیر بری پکر و حیالا انت کہ ای حکومتئ گجام سازشئ انت۔ آوان گشتگنت کہپہ اما محفاظ دیگہ ھبر رادگ انت مگہ ما ای خرچہ برداشت کرتگ نہ کننت۔ آوان بری پکر و حیالا انت کہ حکومت بہ محافظ فراھم کنگئ راھ آوانا شہ نیاما زورتنئ لوٹوک انت۔ پہ چہ کہ آوان گشتنت کہ اگہ بہ محافظ دیما آوانیقتل تسر بیت حکومت شہ ذمواری آ نجات ودی کنت۔ 

آوان ھمی وڑا ای ھبرئ سرا سَک بوتگنت کہ اگہ پہ آوان گجام ٹپئ برسیت حکومت و انٹلیجنسئ دپتر آی ذموار انت۔ آوان گشتنت کہ ای انتباہ انچین وھدہ داتگ بوتگیت وھدہ کہ مُلکئ تھا بہ ۱۰ سالگین گونڈکئ قتل حلاپا احتجاجرادگ انت۔ آوان بری پکر و حیالا انت کہ ای وڑئ اخطار پہ آوان شہ ای وجا داتگ بیت کہ آ بہ وتی گئسان محصور بنت۔ ای راز درا بیت کہ حکومت یک راز نہ یک رازئ لوٹیت کہ پشتون موومنٹ سربراھانا کرار کنت۔ ای ھمیک رازئ جبرئ انت کہ پی ٹی ام سربراھ مجبور انت ای را تحمل کننت۔