سرگال:امریکہ اۓ سؤداگری مڑائی،عالمی پِکر اۓ باعث

جہان اۓ دو مزن ایں اقتصادی طاغت امریکہ او چین اۓ نیمگا ہمیں روش آں یک دوہمی اۓ حلاپ سؤداگری پابندی او بیان بازی اۓ ہماں کہ مڑائی بیسا آنہی آ جہان اۓ نزیخ مُچھیں مُلک آنر پِکر آ ماکھُزا۔ہمیں تناظر آ امریکہ او ایران اۓ جوہری ناوشی دی یک منفی عمل کھنغیں ہماں کہ خاصیں وڑا ہماں آسیائی مُلک آنی آپا دی سغر دڑد بیسا ہماں کہ اقتصادی او معاشی مشکل آنر دیما کھنغاں او ایران آژ تیل اۓ گِرغ آنہاں نی آپا چھیختر نفع دؤخ ثابت بیسا۔امریکہ اۓ صدر ڈونلڈ ٹرمپ آ چند ہپتغ سرا ،چین اۓ سامان چکا محصول گیش کھُزغۓ سا او آنہی آ چین اۓ سجوں آنژ مزن ایں ،مواصلاتی ایں شۓ ٹھائینغ والا ٹیلی کوم کمپنی ہُوۓ وی آر بلیک لِسٹ کھُزغۓ سا۔ہمیں دیستؤ چین آ امریکہ چکا اقتصادی دہشت گردی اۓ الزام جھزا او پاترپت داسئی کہ چوش کہ چین سؤداگری مڑائی اۓ حلاپ ایں مگن آں تھُڑسی نہ۔دوہمی وٹا امریکہ اۓ مشکل ٹرمپ سرکار اۓ روگا اۓ ڈسسی آ رؤغیں کہ چین اۓ مال اۓ سبب آژ آنہی وتی کمپنی ،خاص ڈؤل چکا ہماں کپمنی ہماں کہ الیکترانک سامان ،کمپیوتر ،موبائیل او دیگر شۓ ٹھائیناں ،سؤداگری بحران اۓ شکار آں ہمائی اۓ ماریکہ اۓ اقتصادی حالت آنی چکا اثر بی غیں ۔چوش کہ امریکہ اۓ پالیسی آنی بدگوشی کھنغ والا چین اۓ سامان چکا محصول گیش کھنغ اۓ فیصلہ آ صدر ٹرمپ اۓ اقتصادی فیصلہ کھمین او سیاسی فیصلہ گیش مناں مگن امریکہ اۓ عزرداری بلاسبب دی نعیں ۔دوہمی وٹا چین آ دی جواب آ وتی وٹاژ امریکہ اۓ سامان چکا محصول گیش کھُزا او اگر چین اۓ سرکاری میڈیا چکا باور کھُزی آ برؤ تہ بیجنگ امریکہ آ ہماں کھمیں مِلغ والا معدنیات دۓ اغ بند کھُز کھنت ہماں کہ ہائی ٹیک شۓ ٹھائینغ اۓ کار کھناں۔اگر ہمینگا بیسا تہ اے واشنگٹن اۓ حلاپ یک باز سخت فیصلہ بی چوش کہ وڑ اۓ نادر معدنیات چین آ باز گیش آں او جہان اۓ اے ۹۵ پیصد نادر معدنیات چین آ ہی مِلاں۔ہمیں نیمگا چین اۓ سرکاری میڈیا او دیگر سرکاری حلقہ آ امریکہ اۓ حلاپ بیان بازی او وطن پرستی اۓ جزبہ آ ہاغ کھنغ اۓ کوشش باز تیز بیسا۔ہمائی آژ اے اٹکل بی کہ آئیغ والا روش آنی اندرا چینی کمیونسٹ پارٹی امریکہ اۓ حلاپ مزن ایں مڑائی بنِا کھُز کھنت۔اِشی پھجی پھجی آ اقتصادی پابندی آنی یک محاز امریکہ او ایران اۓ نیمگا دی بُتغی ایں ۔امریکہ تِنک ایران اۓ مبینہ جوہری عزم آنی نام گِتؤ آنہی حلاپ سؤداگری قانون لاگو کھنغ آ سوب مند نیاہ پھیزاغیں مگن آنہی آژ ھَند پھجی آ ہماں ترقی پزیر مُلک آنر مالی نقصان گیش بیس بی ہماں کہ ایران آژ تیل لوٹھائیناں او ہماں کہ ہمیں پابندی آنی وجہ آژ ایران آژ نی تیل نہ گِرغاں۔ہمیں مُلک آنی پریشانی اِش انت کہ آں امریکہ آگو دی سنگتی قائیم ایر کھنغ آ لوٹھاں او ایران آگو دی۔ہمیں حالت آ ھِند ڈؤل اۓ امن پسند مُلک ہمیں لوٹھاں کہ امریکہ بی یا ایران یا گُڈا چین بی یا امریکہ ،ہر کھسے آر گپتران کھُزؤ وتی جھیڑو آنر دیر کھنغ لوٹھی تاکہ جہان ہماں عالمی اقتصادی بحران آژ بھچی برؤ ہمائی وٹا آں تیزی آگو رؤغیں۔