سرگال: بہ مُلکئ کم واکین اکتسادئ وھدہ بہ فسات حلاپا پاکستانئ مزنئن مھم!

پاکستانئ احتسابئ بیورو بہ فرضین حساب بینکئ دارگئ الزامانی پھدا مُلکئ گڈین جمھورین سدر آصف علی زرداری آ گرفتار کرتگیت۔ واجہ آصف علی زرداری نہ تھانکا پاکستانئ پیپلز پارٹئ سربراہ بلاول بھٹو زردارئ پئس انت بلکہ آوان کومین اسمبلئ تھا ھمباسک انت۔ شہ اسلام آباد ھائ کورٹ نیمگا واجہ آصف علی زرداری و آوانی گوار فریال تالپور مستقل ئن ضمانت منتگ نہ بوت و رندا واجہ آصف علی زرداری گرفتار بوتنت۔

ای مُچین معاملہ بہ ۲۰۱۵ سالا وھدہ بناہ بوت کہ پہ پاکستانئ وفاقین تفتیشئ ایجنسی آ ای ھال رست کہ آصف علی زرداری بہ سمٹ بینک، سیندھ بینک، و یو بی ال تھا گون ۲۰ جعلین بینکئ حسابان فرضین کار و بار کننت۔

ھما وھدہ کہ ھال بہ ای ایجنسئ دستا رست آ وتی پٹ و پول آ بناہ کرت۔ وھدہ کہ پٹ و پول تسر بوتنت ای ھبر درا بوت کہ ھور گون واجہ آصف علی زرداری و آوانی گوار آ ھور ھپت مردم شہ ای جعلین حسابان کٹ گرنت۔ بہ آوانی سرا ای الزام جتگ بوتہ کہھما زرئ کہ پہ آوان بہ رشوٹ وڑا داتگ بوت آی را بہ ھمی حسابانی تھا یکجا کرتنت۔ رندا پاکستانئ ھائ کورٹ دیست کہ وفاقین تفتیشئ ایجنسی بری مسئلہ پٹ و پول آ تاخیر پرینیت و رندا یک شریکین پٹ و پولئ ٹینئ پہ ای پٹ و پولئ دیما برگا ملازم کرت۔ای ٹیم بہ وتی پٹ و پولئ وھدہ ۳۳ دیگہ جرلین حسابانا ھم ودی کرت۔ ھمی وڑا کہ پٹ و پول دیمرئی داتگ بوت ۱۷۰ مردمانی سرا پابندی عائد بوت کہ آ مُلک آ ویل کرتہ دیگہ جائ شوتگ نہ کننت۔

کومین احتسابئ بیورو و وفاقی تفتیشئ ایجنسی الزام جتگیت کہ بہ یک فرضین کمپنئ جعلین بینکئ حسابانئ تھا چار اعشاریہ چار ارب پاکستانی روپی یکجا بوتہ کہ شہ ای زران سی ملین روپی بہ دو وھدان پہ زردسرئ گروپ آ داتگ بوتہ۔

رندا شہ آی وفاقی تفتیشئ ایجنسی بہ کراچئ یک بینکنگ محکمہ تھا مقدمہ بناہ کرت کہ بہ آی پھدا پہ آصف علی زردسری گرفتارئ وارنٹ داتگ بوت۔ بہ کراچئ محکمہ ای حکمئ حلاپا بہ ۲۰۱۸ سالئ اگسٹ ماہ زرداری بہ اسلام آباد ھائ کورٹ آ شوتنت کہ بہآدنا پہ آوان ضمانت داتگ بوت۔ وھدہ کہ تفتیش کار ای الزاما جتنت کہ پاکستانئ پیپلز پارٹئ ای معاملہ متاثر کنگئ کوشستا کننت رندا ای معاملہ شہ کراچئ احتسابین عدالتا بہ اسلام آبادئ احتساب عدالتا دیم داتنت۔ بہ پٹ و پولئ وھدہ بہ دوکین ملزم زرداری وآوانی گوارئ حلاپا سرکارین گواہ ودی بوتنت۔

بری معاملہ تھا زردارئ نزیکین سنگٹ دیم شہ دیم گرفتار بوتگنت وھدہ کہ زرداری و آوانی گوار بہ ضمانت بنا آزات اتنت کہ ای ضمانت نون الاس بوتگیت۔ زرداری بہ فساتئ کم شہ کم ھپت معاملہ دیگہ سرا ھم ضمانت گپتتنت۔

پاکستانئ تھا نون سیاسین گڈ و وڈی رادگ انت۔ روچانہ ئن وڑئ استعمال بیگین چیزانی کیمت بہ آسمانا رستگیت۔ فسات بہ برزین کچانہ انت و بی کاری بی حد انت۔ بہ ای رازئ صورتحال تھا عمران خان لوٹوک انت کہ مردمانی توجہ آ شہ اصلین مسئلہ بہ دیگہنیمگا مبذول کنت۔ ھمی وج انت کہ رندا شہ زردارئ گرفتار بیگا سرئ وزیر عمران خان جار جتگنت کہ بہ ھما مردمان کہ بہ فسات تھا کوت دارنت آوانی حلاپا کاروائی بیت۔ وھدہ کہ کومین بجٹ آ دیما کرتنت آوان گشتنت کہ " ریاست مدینہ" خطانی پھدا یکمُلکئ پاک شپ فسات آ جور کنگئ لوٹوک انت۔ آوان گشتنت کہ بہ گئوستگین ۲۵ سالئ تھا بہ مُلکئ تھا اسکول و اسپٹال جور کنگئ سرا ایچ وڑئ توجہ نہ بوتگیت۔ آوان گشتنت آوانی نوکین پاکستان یک نوکین اسلامین مُلکئ انت۔ سرئ آی ھم آوان ای وڑئپاکستانئ قیام ھبرئ سرا کرار اتنت کہ شہ دھشت گردیی آ پاک بیت۔

سرئ وزیر واجہ عمران خانی ھبر دلیر و باتور اتنت مگہ آوان ای ھبرا نہ باید انت کہ شموشنت کہ پاکستانئ اکستاد گڈ و وڈ بوتگیت و بہ سَکین حالاتان انت۔ شہ مالیاتی فنڈ دپتر آ پہ آوان بیل اوٹ پکیج زرور داتگ بوتگیت مگہ آی شرائط باز سَک انت۔ ۶ اربڈالرئ پکیج کہ پہ پاکستان داتگ بوتہ یکمشت پہ آی داتگ نہ بیت۔ بہ پاکستانئ نونین بجٹ تھا چار فیصد شرح دیمرئی کچانہ جتگ بوتہ۔ امیت بوتہ کہ افراط زر شہ ۱۱ بہ ۱۳ فیصد آ بیت۔ شہ بین الاکوامین مالیاتی فنڈ شرائط دیما ٹئیکس گیش بوتگنت و توانائیکیمت ھم گیش بوتگنت۔ بری بجٹ تھا کچانہ جتگ بوتہ کہ ۷ کھرب پاکستانین روپی خرچ بنت وھدہ کہ تھانکا سہ اوشاریہ پنچ فیصد درآمدئ امیت انت۔ نون پہ خرچ کرتنا زرّ شہ کجا کائینت ای سوجئ پسوئ آ خزانہ وزیر حماد اظھر نہ داریت۔ خاسین ھبر ایشانت کہ بری بجٹ تھا بہ ملازمتئ باروا ایچ ھبرئ داتگ نہ بوتہ۔