پاکستانئ سَکین کاروائی بہ قبائلین سیمان۔

بہ بنیادمین حکانی بھرا پاکستانئ ریکارڈ ایچ وھدہ شرّ نہ بوتگیت۔ بہ پاکستانئ تھا موشکول ئن بین الاکوامین دپتر و تنظیم بری بھرا وتی توارا بال کارنت۔ سیاسی، مذھبی و ثقافتین بھران تعصب پسندی گجام نوکین ھبرئ نہ انت۔ ای راز و پاکستان تھا مسائل و سَکیانی کمئ نہ انت مگہ مروچین روچان ھمیھبرئ کہ پاکستانئ حکامئ وابا شہ آوان گپتگیت قبائلین سیمانی استمانئ ناوشنودی انت۔ پاکستانئ و اواگانستانئ سیمسران ای جاگہ بہ وفاق چیرا انتظام قبائلی سیمان بہ فاٹا ناما دروست بیت۔ ای سیمانی استمان شہ چُنتی دھہ آن ظلم و تشددئ شکار انت۔ کم شہ کم گیش شہ ۱۰۰ سال شہ آ وھدان گوستگیت کہبرطانیوی بہ نو آباتئ نظامئ سیائگا پہ ای سیمانی مزاحمتئ اوشتارینگا کانون قائم کرتنت۔


بری کانونئ سیائگا شہ ای سیمانی عوامان آوانی حک گپت بوتنت و ایچ مردمئ اجازت نہ داشت کہ بہ ظلم و ستمئ بھرا شہ آوان وکالت کنت یا بہ گجام محکمہ بروت و اگہ یک راز نہ یک رازئ گجام مردمئ ای جرم آ کرتن پہ آوان مجموعین وڑئ سَکین سزا داتگ بوت۔ ای ھبر دیم شہ ایشی کہ پاکستان بہیک مُلکئ حیثیت آ بہ وجود بیائیت انت۔ رندا شہ ایشی کہ پاکستان ودی بوت ھپتاد سالانا گیش تیر بوتہ۔ مگہ بہ حالاتان گجام تبدیلی و شرّیی آثار نہ انت۔ قبائلین مردم مروچی ھم ھمی وڑئ ظلم و زیادتی و تشددئ شکار انت۔ بہ گئوستگین سالئ تھا، پاکستانئ کومین اسمبلی وتی کانون آ ترمیم کرت و فاٹا بہخیبرپختون خواہ صوبہ تھا یکجا کنگئ بل آ منت۔ آ وھدہ ای ھبر داتگ بوت کہ پہ فاٹائ مردمان ھم ھما حک داتگ بنت کہ پہ مُلکئ مُچین مردمان داتگ بنت۔ یعنی کہ گون ای سیمانی عوام آ سیمانی بنیاد آ گجام تعصبئ نہ بیت و مردم شہ وتی حکانی دپاع کرتگ کننت۔


شہ وکیل آ مدد گپتگ کننت و بہ ھائ کورٹ و سپریم کورٹ آ ھم شوتگ کننت۔ مگہ رندا شہ اینکس وھدہ تیر بیگا حالات ھما وڑا انت۔ بہ آ سیمانی استمانئ زند آ گجام درائین بدلینگئ نہ یاتگیت۔


وھدہ کہ فاٹا گون صوبہ خیبرپختون خواہ یکجا کنگئ ھبر رادگ ات۔ ھما وھدہ ا مُلکئ چُنت سیاسین و سماجین حلقہ گون آی مخالپت کرتنت و گشتنت کہ بہ جائ ایشی کہ ای سیمانا گون یک دیگہ صوبہ یکجا کننت ھما سیمانا یک نوکین صوبہ جور کننت کہ ای راز ھما سیمانی دروستی رادگ مانیت و ھماسیمانی استمانئ ارمان آنی پورہ کنگ ھم آسان بیت۔ مگہ ای تجویز آ نہ منتنت و آی را نظرانداز کرتہ فاٹا بہ خیبر پختونخواہ صوبہ تھا یکجا کرتنت۔ ای نتیجہ ایش ات کہ ای سیمانی استمان یک وارئ دیگہ بہ ھما راھ سرا اوشتاتنت کہ ۱۰۰ سال دیما بہ آی سرا اوشتاتنت۔ شہ کانونئ دیما ای سیمانی استمانھما مُچین حکانی حکدار انت کہ مُلکئ دیگہ استما آی حکدار انت مگہ حکیکت گون ایشی توپیر داریت۔ استمان ھر روچ گون راز رازئ سَکیان دیم پہ دیم انت۔


شہ چُنتی سالان ای سیمان دھشت گردیی بہ برزین کچانہ رادگ بوتہ و نون ای استمان گیشترین ظلم و زیادتی آ برداشت کرتگ نہ کننت۔ ای عوام نون شہ وابا اوستاتگنت و پہ وتی حکان وتی توارا بال کارنت۔ پشتون تحفظ تحریک یا پی ٹی ایم ای ھبرئ درائین مثال انت۔ بہ پاکستانئ سیاسین افق آ بہ ۲۰۱۸سالا ای تحریک اوستات مگہ دیم شہ آی بہ ۲۰۱۴ سالا بہ پاکستانئ وزیرستان سیمان ای تحریک بہ محسود تحفظ تحریک ناما دی شہ دیم بناہ بوتت۔ و آوانی اصلین لوٹگ ایش اتنت کہ بہ آ سیمان جبرین بی پھد بیگ، پوجین ڈلئ رویہ دل بیگ و بارودین سرنگہ آنی موجودیت الاس بیگ اتنت کہ پہ آواناحتجاج کرتنت۔ کم کم بری تحریک تھا شدت گیش بوت و پہ ایشی پشتون تحفظ تحریکئ نام داتگ بوت۔ اصلین ھبر ایش انت کہ رندا شہ ایشی کہ آمریکہ بہ اوگانستان سرا ھلگر کرت شدت پسندین طالب بہ مزنئن اشمارئ شہ آ مُلکا جیستنت و شہ سیمسر آ تیر بوتہ بہ پاکستانئ ھمی قبائلین سیمان پناہ گپتنت۔


و بہ آدنا رستہ کم کم وتی اثرورسوخ دیمرئی آ بناہ کرتنت۔ ای سیمانی قبائلین استمان و طالبانی نیاما سَکی بناہ بوتنت۔ طالب ای استمانا شہ بازین چیزان محروم کرتنت مگہ وھدہ کہ طالب بہ پاکستانئ تھا بہ تحریک طالبان پاکستانئ نامئسیائگا وتی کاروائیانا بناہ کرتنت پاکستانئ پوج بہ آوانی حلاپا مزنئنآپریشنئ بناہ کرت کہ ای آپریشنئ وجا آ سیمانی عوام بہ برزین کچانہ مالین و جانین وڑئ ٹپ دیستنت۔ پوج ای سیمانی عوام آ ھم بہ شکئ چمان دیست و بہ آوانی سرا ظلم و زیادتی سلسلہ بناہ بوت۔ وھدہ کہ بہ پاکستانئ کومین اسمبلئ تھا بل منظور بوت گشتگ بوت کہ پہ فاٹائ کم شہ کم پنجاہ لکھ آباتی آ،آئینی، کانونی، سیاسی و اکتسادین حکانی دیگئ راہ پاچ بوتہ مگہ ای راز معلوم بوت کہ پاکستانئ حکام بہ قبائلین سیمان وتی اثرورسوخ کم کنگا تیار نہ اتنت۔ پاکستانین کمانڈر گشتگنت کہ پہ پشتون ئن نسلئ استمانئ احتجاجئ اوشتارینگا و بہ سربراھانی حلاپا مقدمہ بناہ کنگئ بھرا انسداد دھشت گردی برابیرآعدالتئن نظامئ قائم بیگا انت۔ای رازئ کار نہ تھانکا پاکستانئ آئینی حیثیت و پیما کم کنت بلکہ بہ بین الاکوامین کانونانی حلاپا ھم انت۔