سرگال:آئی ایس آئی اۓ نوخیں سروک اۓ تقرر

رپورٹ اۓ روگا پاکستان اۓ سرکار آ یک سخت گیر ڈؤل اۓ اعلی پؤجی اپسر آر پاکستان اۓ خفیہ ایجنسی آئی ایس آئی اۓ نوخیں داریکتر جنرل مقرر کھُزا۔حالانکہ آئی ایس آئی اۓ درا بیسغیں سروک لیفتینینت جنرل عاصم منیر چھڑوئی آ ہشت ماہ سرا ہمیں عہدہ چکا برحال بیسغۓ سا مگن اچانکی آگو اے حبر اُش کھنغ آ مِلسا کہ آنہی جاگاہ جنرل فیض حمید آ مقرر کھُزی آ شُزا چوش کہ اعلی پؤجی اپسر آنی تبادلہ بی آنا کھایاں مگن ہماں ماحول آ اے بدلاؤ عمل آ آتکا ،آنہی آژ پاکستان اۓ سیاسی ،سماجی او اپسر شاہی حلقہ آنی نیمگا اُتھل پُتھل ضرور بِنا بیسا۔پاکستان اۓ پؤج ہمیں مُلک اۓ سجوں آنژ گیش طاغتور او بااثر ادارہ منسی آ رؤ ،ہمائی آ آزاتی آ پھدا گوستی ایں ۷۲ سال آنی تاریخ اۓ کم چہ کم نیم بہر چکا سدھائی آ حکومت کھُزا او سویلین سرکار آنی دؤر آ دی اصل ایں زور آنہی آگو اسا۔ہمیں وڑا پاکستان اۓ خفیہ ایجنسی آئی ایس آئی اۓ سروک اۓ عہدہ دی یک باز خاصیں عہدہ منسی آ رؤ ۔اے ایجنسی ہماں ٹؤک آپا سجوں آنژ گیش پھجھارتھی آ رؤ ،آں اِش انت کہ آں ہمسائیگ مُلک خاص ڈؤل چکا ھِند اۓ حلاپ اسلامی انتہا پسند آنر استعمال کھنانا پھیزاغیں۔مگن اندری ایں پاکستان اندرا دی آنہی چکا تھُڑس او دھشت پیدا کھنغ اۓ الزام رہسا۔سیاسی کار آنی اندرا مداخلت کھنغ ،سیاسی پارٹی آنی نیمگا ناوشی پیدا کھنغ ،سیاسی سروک آنر بدنام کھنغ او پؤج اۓ حق آ دگ سدھا کھنغ آنہی کار رہسا۔آنہی جِند یک تخریب کار ایجنسی اۓ غیں۔گوستی ایں سال پاکستان آ ہماں کہ عامین گچین کاری بیسغۓ سا ،آنہی آ دی آنہی عمل باز گیش شَر ایں نیا۔مثال آ آنہی چکا حوال کار او مڑدمی حق آنی تنظیم او کارکن آنر تھُڑسینغ اۓ دی الزام ایں ۔اے وخت پشتون تحفظ موومنت پؤج او آئی ایس آئی اۓ خاصیں نشانہ چکا ایں۔لیفتیننت فیض حمید ،سرا دی آئی ایس آئی اۓ یک خاصیں او بااثر اپسر رہسا۔۲۰۱۷ اۓ آخیر تکا آں ہمیں ایجنسی آگو جُڑسی آ اسا او آنہی زمانہ آ فیض آباد اۓ ہماں ناوش ایں دپ بیسغۓ سا ہمائی آ انتہا پسند تنظیم تحریک لبیک پاکستان آ لاقانونیت آ مزن ایں پھیمانہ تکا گیش کھُزغۓ سا او بُنجہ اۓ دگ آنر بند کھُزغۓ سا۔تحریک لبیک اۓ سروک او آنہی کارکن آنی ،فیض حمید آ واہریائی کھُزغۓ سا ۔ہمیں دپ اۓ پاکستان اۓ مزن ایں عدالت آ وا نوٹس دی گِتغۓ سا ۔نی ایں روش آ آنہی فیصلہ دی آتکغۓ سا او مزن ایں عدالت اۓ دو نفری بینچ آ وتی فیصلہ آ گوشتغۓ سا کہ پؤج او ایجنسی آنی اپسر آں سیاسی مسلہ آ مُداخلت کھُزغۓ سا او وتی حلپ اۓ حلاپ ورزی کھُزغۓ سا۔مزن ایں عدالت آ ڈوہی اپسر آنی حلاپ جُڑسی ایں محکمہ آنر کاروائی کھنغ اۓ ہدایت دی کھُزغۓ سا ۔ہمیں دو نفری بینچ اۓ سروکی قاضی فائیز عیسی آ کھُزغۓ سا او ہماں ڈوہ آ قاضی عیسی اۓ حلاپ صدر پاکستان اۓ وٹاژ مزن ایں جوڈیشیل کونسل آ یک ریفرنس دی داخل کھُزی آ شُزا۔ہمیں پس منظر آ پاکستان اۓ زانتکار آنی گُشغ ایں کہ پؤج او ایجنسی آں تھُڑس اۓ ماحول پیدا کھنغ آپا لیفتیننت جنرل فیض حمید آ آئی ایس آئی اۓ نوخیں سروک مقرر کھُزا۔