سرگال:پاکستان اۓ پؤجی سروک آ قومی ترقی کونسل اۓ باسک کھُزی آ شُزا

پاکستان ہمیں وڑاژ جہان اۓ یک زکر اۓ لائیق مُلک انت کہ ایزا اۓ پؤج آ سرکار اۓ کار آنی اندرا باز اختیار مِلسی ایں ۔ہمیں ادارہ آ ہماں کہ آئینی اختیار سرا آژ مِلسی آں آنہی دائیرہ راست پھول کھنے تہ نی ایں اختیار آنی مقابلہ باز محدود ایں ۔اے ہماں مُلک ایں ہموزا آئینی ڈؤل آژ اے وخت جمہوریت ایں مگن طاغت اۓ اصل ایں محور پؤجی ہیڈ کوارتر ہی ایں ہماں کہ راولپنڈی آ ایں۔بُنجہ اسلام آباد ایں ہموزا وفاقی سرکار اۓ دپتر ایں۔۱۹۴۷ آ برطانوی سروکی اۓ آسر بی اغ آ پھدا ہماں وخت پاکستان اۓ قیام عمل آ آتکا ہماں وخت آژ نی تکا ہموزا اۓ تاریخ اۓ نیم بہر چکا پؤجی جنرل آں سدھائی آ حکومت کھُزا او باقی نیم بہر چکا سویلین حکمران آں۔مگن سویلین حکمراں مُچھیں آزاتی آگو حکومت آ نہ رہسغاں ۔بار بار پؤجی حکومت آ بھورینتھی آ شُزا،مارشل لاء مان آتکا او مزن ایں مُدت تکا مڑدم جمہوریت آژ دیر بیسغاں۔چوش کہ ۲۰۰۸ آ آخیری ایں پؤجی ڈکٹیٹر جنرل پرویز مشرف اۓ زوال اۓ پھجی آ ہماں وخت جمہوریت یک دھکا اغدی برحال بیسا تہ گچین بیسغیں سرکار آ تہ پنچ سال آنی مُدت پورا کھُزا مگن ڈن اۓ پالیسی او باز دیگر خاصیں کار آنی چکا گُڈا دی پؤج اۓ قوضہ رہسا۔نی ایں سروزیر عمران خان آژ سرا دو سر وزیر آنر وخت آژ پیشا ہی استعفی دۓ غی بیسغۓ سا۔عامین ویچار اِش انت کہ اے حالت ہمیں خاطرہ پیدا بیسا کہ پؤج نہ تہ پاکستان اۓ پیپلز پارٹی آ پسند کھنت او نہ ہی مسلم لیگ نواز آ،پھرچھے کہ اے پارٹی سیویلین بالادستی آپا گُشی ہماں کہ پؤج آ قبول نعیں۔مبینہ ڈؤل چکا ہمیں مسلہ آ عدالت دی پؤج آپا جانبداری اۓ سلوخ کھنت۔بہر حال گوستی ایں سال ہماں وخت عامین گچین کاری بیسا تہ پؤج آ اینگے حالت پیدا کھنغ اۓ کوشش کھُزا کہ عمران خان اۓ تحریک انصاف آ سروکی آ آرغ بیس بی ہمائی آ آں سوب مند دی بیسا۔عامین ویچار ایں کہ عمران خان اۓ سروکی آ آئیغ آ پھدا پؤج آنہی چکا کھُزی ایں احسان آنی بدلہ لوٹھی او لوٹھی کہ اینگے حالت بی آں کہ پؤج آ ہماں کار آنی اندرا مُداخلت کھنغ اۓ موقع مِلی برؤ ہماں کہ نی تکا آنہی دست آژ درا اساں۔نی ہماں کہ محاز آرائی اۓ گواس ٹھعیسا ،آنہی آ یک وٹا پؤج او عمران خان سرکار ایں او دوہمی وٹا عدالیہ او آنہی پھجی آ ممکنہ ڈؤل چکا سرکار او پؤج اۓ مُچھیں مُخالف بی آں۔یک وڑا گو زور آزمائی بِنا دی بیسا۔یک دو روش پیشا اۓ حبر اسا کہ آئی ایس آئی اۓ نوخیں سروک یک سخت گیر پؤجی اپسر لیفتیننت جنرل فیض حمید آ مقرر کھُزی آ شُزا حالانکہ آنہی پیشرو چھڑوئی آ ہشت ماہ سرا ہی ہمیں عہدہ چکا برحال بیسغۓ سا او نی نوخیں حبر اِش انت کہ سروزیر عمران خان آ ہماں کہ نوخیں قومی ترقی کونسل ٹھائینتھا آنہی آ آرمی چیف جنرل قمر جاوید باجوا آر دی یک باسک کھُزی آ شُزا۔یعنی پاکستان اۓ اقتصاتی مسلہ آ دی نی پؤج آ سدھائی آ خاصیں عمل کھنغ اۓ موقع مِلسؤ شُزا۔زانتکار آنی گُشغ ایں کہ اگا اگا گِندے چھے چھے بی۔