سرگال:پاکستان حوالہ نیٹ ورک اۓ پکڑ اندرا

لندن آ یک کار کھنغ والا انستیتیوت اۓ یک رپورٹ نی دیما آتکا ہمائی آ گوشتی آ شُزا کہ پاکستان آ دھشت گرد آنی مالیاتی واہریائی دارغ آپا بین الاقوامی ادارہ ہماں دی چھی اے کھنغاں آنہی آژ دی گیش خاصین سُچائی اِش انت کہ پاکستان آژ حوالہ او ہُنڈی ڈؤل اۓ تکنیک آنگو مزن ایں زر درا رؤغاں او اے عمل مُلک اۓ معیشت آ برباد کھنغیں ۔ہمیں بارو آ خاص ڈؤل چکا رونشت آسیا اۓ یک شہر اۓ نام گِتی آ شُزا ہمائی آ ڈغار اۓ بہِشت اۓ ڈؤل چکا کھنغ اۓ کوشش کھُزی آ شُزغۓ سا۔اے ٹؤک راست ایں کہ حوالہ او ہُنڈی اۓ نیٹ ورک چُنتی مُلک آنی اندرا کار کھنغاں۔او ہمیں غیر قانونی کار آژ باز مُلک پریشان آں۔مگن خاصیں ٹؤک اِش انت کہ مُلک اۓ کھُل لوغی ایں دولت اۓ چھیختر بہر درا رؤغیں او ھِچھ مُلک دی ہمیں کار آ دارغ اۓ کوشش کھُزؤ چھیختر حد تکا ہمیں غیر قانونی کار اۓ ٹھپ برداشت کھُز کھنت۔ھِچھ مُلک آژ دولت اۓ غیر قانونی درا کھنغ اۓ دم ہی اینگے بی کہ آنہی مقدار اۓ کھدیں راستیں اٹکل کھنغ نویس بی ،او پاکستان آژ ہمیں نیٹ ورک آگو چھیختر زر درا رؤغیں اے دی اٹکل جھنغ مشکل ایں،گُڈا دی ہمیختر ٹؤک طۓ ایں کہ پاکستان اۓ کھُل لوغی پیداوار آ وڑ وڑ آگو درا روغ والا زر آنی تناسب باز گیش ایں او سرا آژ پھدا بیسغیں یک معیشت کھدیں بُنا درٹی برؤ گُشغ نویس بی۔ہمیں بارو آ ویچار کھنغ اۓ لائیق ٹؤک اے دی ایں کہ ھِچھ مُلک آژ ہماں وخت ہمیں دولت سرمایہ کاری یا قرض اۓ دیم آ درا رؤ تہ آنہی اۓ یا آنہی آژ پیدا بی اغ والا ایں نپ او کھٹ یا سود اۓ گڑدغ باور دؤک بی،مگن حوالہ نیٹ ورک آگو درا روغ والا زر کھدیں نہ گڑدی۔لندن آژ مِلغ والا نی ایں رپورٹ آ پاکستان اۓ بارو آ ہمیں عمل آ دھشت گردی اۓ مالیاتی واہریائی کھنغ آپا کھنغ والا گام گیج آنژ گیش سنگین ڈسسی آ شُزا۔گُڈا دی اے ٹؤک گُشغی بی کہ اے مسلہ اینگے ایں ہمائی چکا وا پاکستان آ ضروری گام گیج کھنغی بی آں ۔ہمیں بارو ھِچھ دی دیگر مُلک پاکستان اۓ یک حد تکا ہی مدد کھُز کھنت۔حوالہ نیٹ ورک آگو دولت آنی درا کھنغ اۓ ہمیں مسلہ پاکستان آپا خاصیں اہمیت ایر کھنت۔مالی ڈؤل چکا اے مُلک مروشی تباہی اۓ دگ چکا جکھسی ایں او یک کسنیں دھِکو دی برداشت کھنغ اۓ حالت آ نعیں۔اِشی اۓ علاوہ نی ایں روش آں آنہی آ بین الاقوامی مالیاتی فنڈ آژ ہماں کہ چھڑوئی آ نام اۓ مدد مِلسا،آنہی سبب آژ وا پاکستانی زانتکار آنی روگا آں گیش معاشی بحران اۓ شکار بی ۔مثال آپا شش ارب ڈالر اۓ قرض آپا واجہ عمران خان اۓ سرکار آ ہماں کہ شرط منسغاں آنہی آ یک شرط اے دی ایں کہ عامین شہری آنر ٹیکس آنی اندرا مِلغ والا رعایت آسر کھُزی آ برؤ او ہمیں رعایت آنی مقدار ۷۰۰ ارب پاکستانی زر آنی براور ڈسسی آ شُزا۔آنگا تہ ہمیں حالت آژ درا درکھوغ آپا نی دی پاکستان اۓ دیما چھی اے دگ استاں ،مگن بنیاتی ایں سوال اِش انت کہ سرکار او پؤج او آئی ایس آئی اۓ گچین کھُزی ایں یک سرکار چھے ہمیں دگ چکا جُزغ اۓ حوصلہ ایر کھنت۔