سرگال:خاشقجی حون مسلہ او اقوام متحدہ اۓ رپورٹ

مشہور امریکہ اۓ اخبار واشنگٹن پوسٹ آگو جُڑسی ایں سعودی عرب اۓ حوال کار جمال خاشقجی اۓ گوستی ایں اکتوبر آ استنبول اۓ سعودی کونسلیٹ آ حون بیسغۓ سا او آنہی لاش اۓ ہِچھ کَل نہ کھپتغۓ سا چوش کہ اے مڑدمی حق او وتی ویچار پدھر کھنغ اۓ آزاتی چکا کھوغ والا ایں ٹھپ آگو جُڑسی ایں مسلہ اسا،ہمیں خاطرہ خاشقجی اۓ ھون مُچھیں جہان آ یک خاصیں مسلہ بیسا او چھیاریں وٹاژ آنہی حون اۓ حلاپ آواز کھڑو بیسغاں او ڈوہی آ سزا اۓ مطالبہ بِنا بیسغاں۔مگن ہماں وخت ھِچھ مسلہ آ کھسے خاصیں مڑدم اۓ وار بی اغ اۓ مسلہ بی تہ گُڈا آنہی تصدیق اۓ پھیمانہ آ باز فرق نیاہ کھاۓ۔اِشی پھجی آ عالمی پلیٹ فارم چکا بدل بیسغیں منظر نامہ اۓ سلسلہ ہمیختر تیز بیسا کہ دپ ہماں کہ پھدا بی آں ،آنہی چکا دھیان گھٹ بی ۔چھی اے اینگے ہی مسلہ جمال خاشقجی اۓ حون اۓ دپ اۓ مسلہ آ دی بیسا او آنہی حون اۓ بارو آ عکس مدھم بی سا۔مگن اقوام متحدہ اۓ یک نی ایں رپورٹ آ یک دھکا پدوارغ ہمیں مسلہ آ مرکزی سطح چکا آختؤ کھڑو کھُزا او ہر وٹاژ یک وار دیگر حوال کار جمال اۓ حون اۓ ڈوہی آنر سزا تکا پُجھینغ اۓ مطالبہ شروع بیسا۔پیسر آ ترکی اۓ خفیہ ایجنسی او دیگر پٹ او پھول کھنغ والا ادارہ آں دی ہمیں حون اۓ منصوبہ آ سعودی ولی عہد محمد بن سلمان اۓ وٹا اشارہ کھُزغۓ سا او نی اقوام متحدہ اۓ خاصیں پٹ او پھول کھنغ والا او زانتکار ایگنس کالا مارڈ آ وتی پٹ او پھول اۓ رپورٹ آ باز وثوق آگو اے ٹؤک گوشتا کہ باز اینگے ثبوت او شواہد آں ہمائی اۓ تردید کھنغ نویس بی کہ جمال خاشقجی اۓ حون آ سعودی ولی عہد محمد بن سلمان اۓ دست ایں او کالا مارڈ آ ہمیں رپورٹ اۓ پھجی آ اقوام متحدہ اۓ جنرل سیکریتری آژ مطالبہ کھُزا کہ ثبوت او شواہد آنی روژنائی آ آں ہمیں بارو آ یک فارمل انترنیشنل کرمنل پٹ او پھول اۓ بُنگیج کھنت۔پدھر بی کہ ریاض آ سرا تہ ہمیں مُچھیں دپ آژ ہی وتی نا پوہی آ پدھر کھُزغۓ سا مگن پھدا آنہی آ منسا کہ خاشقجی اۓ حون،بدماش ایجنٹ آنی دست آژ یک پٹ او پھول اۓ کاروائی اۓ نیمگا بیسغۓ سا او آنہی آ ولی عہد اۓ ھِچھ دست نعیں۔سعودی عرب او ترکی اۓ وٹاژ ہماں کہ ہمیں بارو آ پٹ او پھول بیسغۓ سا او ہمائی آ پھدا آنہی آ غیر اہم منسی آ شُزغۓ سا ،آنہی بارو آ اقوام متحدہ اۓ زانتکار کالا مارڈ اۓ گُشغ ایں کہ پٹ او پھول عالمی معیار اۓ روگا نویسغۓ سا،ہمیں وجہ آژ ترکی اۓ دعوی آنی باوجوت محمد بن سلمان اۓ بارو آ کاروائی اگا نویسا۔اقوام متحدہ اۓ سیکریتری آ ہماں کہ سفارش کھُزا آنہی روگا ثبوت او شواہد اۓ روژنائی آ ہمیں مسلہ اۓ پٹ اوپھول ضروری ایں اے حتمی ڈؤل چکا معلوم کھُزی آ برؤ کہ ولی عہد ہمیں حون اۓ بارو آ واقف اسا یا نہ کہ آخیر جمال خاشقجی اۓ پھجی آ چھے مسلہ بیسا بلکہ اگا اے ٹؤک دی معلوم بی اغ لوٹھی کہ آں وا ہمیں حون آ اوار اسا یا نہ او چھے آنہی آ ہمیں بارو آ بی اغ والا پٹ او پھول آ متاثر کھنغ اۓ کوشش کھُزا ہمائی وجہ آژ حون اۓ ہمیں خاصیں مسلہ ساڑتھ بیسا۔