سرگال:خلیج فارس آ پؤج اۓ مُچھی

گوستی ایں ہپتغ خلیج عمان آ تیل اۓ دو ٹینک آنی چکا ھِلگر اۓ جواب آ امریکہ اۓ دپاعی وزارت آ جار جھزا کہ خلیج آ سیکیورتی آ وشتر کھنغ آپا آں یک ہزار گیش پؤجی ہموزا دیم دا۔پدھر بی کہ گوستی ایں سال مئی آ دو ہزار پھانزد آ بیسغیں نیوکلائی منغ نامہ آژ امریکہ اۓ جتا بی اغ او ایران چکا اقتصاتی پابندی پدوارغ جھنغ آ پھدا آژ تہران او واشنگٹن اۓ نیمگا ناوشی گیش بیسا۔اِشی علاوہ صدر ٹرمپ آ تھنبہ کھُزا کہ اگر کھسے ایران اۓ ہمیں صنعت آنی پھجی آ سؤداگری کھنت ہماں ہاں نی چکا سرا آژ پابندی ایں تہ آنہاں نی چکا دی پابندی جھزی آ رؤ۔ایران آ دی منغ نامہ چکا دستخط کھنغ والا یورپی مُلک ،خاص ڈؤل چکا برطانیہ ،فرانس او جرمنی آژ اپیل کھُزا کہ آں امریکہ اۓ پابندی آنی وجہ آژ ایرانی معیشت چکا مان آئیغ والا ایں اثر آنر کھمیں کھنغ آپا مناسو گام گیج کھناں۔تہران آ گوشتا کہ اگر منغ نامہ چکا دستخط کھنغ والا دیگر مُلک آں اینگا نہ کھُزا تہ ایران دی منغ نامہ آژ جتا بی اغ آپا لاچار بی ۔ایران اۓ ہمیں اپیل آ پھدا امریکہ آ پھانزد سد پؤجی آنر خلیج آ تعینات کھُزا۔خلیج آ پؤج آنی ہمیں وڑا مُچھ بی اغ جاگاہ اۓ امن و استحکام آپا نیخیں شگُن نعیں۔ایران اۓ گُشغ ایں کہ خلیج عمان آ تیل اۓ ٹینکر آنی چکا ھِلگر آ آں اوار نعیں گُدا دی امریکہ او سعودی عرب ہمیں ھِلگر آپا تہران آ زمہ وار منغیں۔اصلیت تہ اِش انت کہ ریاض او واشنگٹن مئی آ فجیرہ اۓ ساحلی پٹی چکا تیل اۓ چھیار ٹینکر آنی چکا بیسغیں ھِلگر آپا دی تہران آ آ زمہ وار منغیں ۔اشی اۓ علاوہ سعودی عرب آ یمن اۓ حوثی باغی آنی وٹاژ دی ھِلگر دیما کھنغی بیسا۔گوشتی آ رؤ کہ حوثی آنی ایران واہرائی کھنغیں درگتہ کہ سعودی عرب اۓ سروکی آ مخلوط پؤج حوثی آنی چکا ھِلگر کھنغیں۔ہمیں سال مئی آ سعودی آرامکہ آنی یک آئیل پائیپ لائین چکا ڈرون آژ ھِلگر کھُزی آ شُزغۓ سا۔گوستی ایں ہپتغ حوثی آں یک میزائیل آژ بُرز صوبہ نجران آ آنبہا بالی پٹ چکا ھِلگر کھُزا ہمائی آ ۲۶ مڑدم ٹھپی بیسغاں۔ہمیں ھِلگر آ پھدا ریاض آ الزام جھزا کہ سعودی عرب آ ھِلگر کھنغ آپا ایران حوثی باغی آنر نہ چھڑوئی آ اسلحہ دۓ غیں بلکہ آنہاں نی واہریائی دی کھنغیں۔خلیج عمان آ یک ہزار پؤجی دیم دۓ اغ اۓ امریکہ اۓ فیصلہ آر ہمیں مُچھیں دپ آنی پس منظر آ گِندغ لوٹھی۔گیش پؤجی دیم دۓ اغ اۓ فیصلہ اۓ جار جھزؤ کار گزار وزیر دپاع پیٹرک شناہن آ گوشتا کہ اے فیصلہ ایران اۓ ردین سلوخ اۓ سبب آژ کھُزی آ شُزا۔آنہی آ اے ٹؤک ضرور کھُزا کہ امریکہ ایران اۓ پھجی آ مڑائی کھنغ نہ لوٹھی مگن جاگاہ آ امریکہ اۓ پؤجی او مفاد اۓ محافظت آپا اینگا کھنغ ضروری ایں۔خلیج فارس اۓ نی ایں حالت ھِند آپا پِکر اۓ باعث انت۔جاگاہ آ امن و استحکام اۓ برقرار رہغ ھِند آپا باز ضروری ایں پھرچھے کہ ایزا اۓ توانائی اۓ وتی نپ او کھٹ ایں۔نوخیں دلی اۓ تہران او ریاض اۓ پھجی آ دی وشتر سیال داری ایں ۔ہمیں خاطرہ ھِند آر اُمیت ایں کہ مُچھیں مُلک جاگاہ اۓ ناوشی کھمیں کھنغ آپا مُچھیں کوشش کھناں او مُچھیں مسلہ آنر گپتران آگو حل کھناں۔