سرگال:عمران خان آ بشکیک آژ مِلغ والا ایں پھیغام

سروزیر عمران خان اے وخت وتی مُلک اۓ سیاست آ کے ای وڑ اۓ عمل آنی اندرا مصروف ایں۔آنہی اۓ دعوی ایں کہ پاکستان اۓ ردین بیسغیں اقتصادی حالت اۓ بنیاتی ایں وجہ اِش انت کہ آنہی اۓ سری ایں حاکم آں چھڑوئی آ موک خوری او مالی بد عنوانی ودھینتھا او مُلک اۓ سرمایہ آ دوایں دست آنژ لُٹسیش ۔آنہی اۓ اے دی دعوی ایں کہ آں بدعنوان سیاست زانتکار آنگو ناجائیز ڈؤل چکا گِتی ایں سرمایہ آ چھِنسؤ گڑدینتھؤ گِری۔ممکن ایں آنہی اۓ ہمیں وڑ اۓ دعوی جزوی ایں ڈؤل چکا راست دی ثابت بی آں ۔بہر حال چُنتی اپوزیشن لیڈر آنی دستگیری عمل آ آتکا او کرپشن اۓ الزام آ دیگر مڑدم آنر دی دستگیر کھُزی آبرؤ۔نی ایں روش آنی اندرا چھی اے خاصین دپ دی بیسغاں ۔مثال آ عدلیہ او سرکار اۓ نیمگا ناوشی اۓ یک نوخیں ماحول گِندغ آ پھیزاغیں۔مزن ایں عدالت اۓ یک مزن ایں قاضی فائیز عیسی آر پؤج آ یک سبق دۓ اغ اۓ عہد کھُزا پھرچھے کہ آنہی آ وتی یک نی ایں فیصلہ آ پؤج او ایجنسی آنر غیر آئینی عمل آ اوار بی اغ او سیاسی کار آ باز مُداخلت کھنغ اۓ ڈوہی منسا۔پؤج آ عمران خان سرکار آ لاچار کھُزا کہ آں قاضی عیسی اۓ حلاپ مزن ایں جوڈیشیل کونسل آ یک ریفرنس داخل کھنت۔دوہمی وٹا عمران سرکار او پؤج دوایں آنی وٹاژ اے ویچار پدھر کھُزی آ رؤغیں کہ آں مُچھیں مسلہ آ یک ہی پَنو چکا آں ۔شاید اے ٹؤک عمران خان وتی آپا باعث افتخار پوہ بی غیں۔مگن پاکستان آ سول او مِلٹری سیال داری اۓ تناظر آ باز مڑدم آنی آپا اے ٹؤک شَر ایں نعیں۔عمران خان آ قومی ترقی کونسل آ آرمی چیف آر دی یک باسک کھُزؤ یک نوخیں بُنگیج کھُزا او اقتصادی مسلہ آ دی پؤج اۓ عمل آنر پدھر ایں جاگاہ داسئی۔اے مُچھیں ٹؤک پاکستان اۓ اندری ایں مسلہ آنگو جُڑسی ایں او آئیغ والا ایں وخت آ عمران خان آ ہمیں مُچھیں مسلہ آنر دیما کھنغی ایں۔مگن بین الاقوامی پھیمانہ چکا دی آئیغ والا ایں وخت آ چُنتی مسلہ آنر ہمیں سرکار آ دیما کھنغی ایں۔نی ایں سال آنی اندرا پاکستان،دہشت گردی اۓ سوال چکا بروبر عالمی براسی آژ دیر بی غیں۔آنہی وجہ چھڑوئی آ باز ہمسائیگ مُلک یا عالمی براسی اۓ شکایت نیاں بلکہ آنہی عمل دی آں۔پاکستانی پؤج او خفیہ ایجنسی آنی واہریائی یا دست رکھیائی آگو ھِند او افغانستان آ دھشت گردی اۓ ہماں کہ سلسلہ جُزغۓ سا آں نی دی بند نویسا۔چند روش سرا عمران خان شنگھائی کو آپریشن آرگنائیزیشن اۓ چوٹی کانفرنس آ بہر گِرغ آپا کرغستان اۓ بُنجہ بشکیک شُزغۓ سا۔ھِند اۓ ڈؤل آژ پاکستان دی ہمیں تنظیم اۓ یک باسک ایں ۔ہمیں کانفرنس اۓ آسر بی اغ چکا شنگھائی کو آپریشن آرگنائیزیشن آ اوار مُچھیں مُلک آنی سروک آنی وٹاژ ہماں کہ پیرا داسی شُزا آنہی آ یک خاصیں بہر دھشت گردی اۓ بارو آ اسا۔مُچھیں باسک آں ہمیں ٹؤک چکا زور ماکھُزا کہ بین الاقوامی پھیمانہ چکا دھشت گردی آگو مِڑغ آپا یک جامع منغ نامہ تیار کھنغ آپا ہم صلاحی قائیم کھُزی آ برؤ۔دوہمی وٹا فائینینشل ایکشن ٹاسک فورس یا ایف اے ٹی ایف آ گوستی ایں روش آں ہمیں ٹؤک اۓ جار جھزا کہ پاکستان آ جیش محمد لشکر طیبہ او آنہی آگو جُڑسی ایں دوہمی دھشت گرد ادارہ آنی فنڈنگ آ دارغ آپا ہماں ۲۷ گام گیج آنی آپا گوشتغۓ سا آنہانژ ۲۵ اۓ نشانہ پورا کھنغ آ پاکستان ناسوب رہسا ۔تہ آئیغ والا روش آ وتی اندری ایں مسلہ آنی پھجی پھجی آ ہمیں مُچھیں ٹؤک آنر دی عمران سرکار آ دیما کھنغی ایں۔