سرگال:امریکہ او ایران اۓ نیمگا ناوشی کھمیں بی اغ اۓ گُمان؟

نی ایں روش آں یک وٹا امریکہ او چین اۓ نیمگا سؤداگری سطح چکا پیدا بی اغ والا ایں ناوشی اۓ سبب آژ جھیڑو اۓ ماحول پیدا بیسا تہ دوہمی وٹا امریکہ او ایران اۓ نیمگا ،ایران اۓ نیوکلائی پروگرام اۓ سوال چکا پدوارغ جھیڑو اۓ گواس پِکر اۓ باعث انت۔اے ہڑ دوایں ٹؤک امریکہ اۓ صدر ٹرمپ اۓ کھُزی ایں باز فیصلہ آنی بِنشت چکا دیما آتکغاں۔امریکہ او چین جہان اۓ دو مزن ایں معیشت آں او آنہاں نی نیمگا ہمیں وڑ اۓ اگر سؤداگری جھیڑو بِنا بیسا تہ آنہی اۓ اثر چھڑوئی آ ہمیں دوایں مُلک آنی سؤداگری سیال داری تکا محدود نوی بلکہ مُچھیں جہان اۓ سؤداگری چکا آنہی اۓ ناوش ایں اثر بی۔اصل آ صدر ٹرمپ اۓ باز ایں فیصلہ اچانکی آ دیما آتکغاں ہمائی وجہ آژ وا آنہاں نی رسمی ایں اتحادی آنی نیمگا دی حیرانی پیدا بیسا۔سؤداگری اۓ مسلہ آ آنہی آ چین آپا ہماں دی فیصلہ کھُزا آنہی اۓ چین آ دی آنہی وڑا جواب داسا ۔پدھر ایں اگر دوایں وٹاژ ہمیں وڑ اۓ سلوخ اپنائینتھی آ شُزا تہ عالمی پھیمانہ چکا پِکر گیش بیس بی۔ہمیں خاطرہ اعتدال پسندی اۓ دگ چکا روغ ضروری ایں۔بہر حال نی گندغی اِش انت کہ آئیغ والا روش آنی اندرا دوایں مُلک چھے فیصلہ کھناں۔آنگا تہ صدر ٹرمپ وتی فیصلہ آنی چکا چھی اے روش پھدا ہی نیاہ ماکھنتھ ۔اینگا امریکہ او ایران اۓ سیال داری آ دی نیاہ پھیزاغیں۔صدر اوبامہ اۓ زمانہ آ مزن ایں ٹؤک توار آ پھدا یک منغ نامہ ایران آگو بیسغۓ سا ہمائی باعث جھیڑو دیر بیسغۓ سا او ایران چکا جھزی ایں چھی اے پابندی ہٹائینتھی آ شُزغۓ ساں ۔آنہی آژ ایران آر تہ سؤداگری سطح چکا نپ او کھٹ بیسا ہی مگن باز دیگر مُلک آنر دی فائیدہ بیسا۔خاصیں وڑا ہماں مُلک آنر ہماں کہ ایران آژ تیل درآمد کھناں۔آں منغ نامہ جامع ڈؤل اۓ اسااو امریکہ اۓ رونشت اتحادی آنی گون باز دیگر مُلک دی آنہی آ اوار اساں ۔مگن اچانکی آژ امریکہ اۓ صدر ٹرمپ آ ہمیں منغ نامہ آژ یک وٹی ایں ڈؤل چکا امریکہ آ جتا کھُزا۔حالانکہ آنہی اۓ ہمیں فیصلہ اۓ آنہی رونشت اتحادی دی حلاپ اساں مگن آں وتی فیصلہ آژ نہ ہٹسا او ایران چکا پابندی جھزئی۔آنہی ناوشیں اثر ھِند چکا دی کھپتا پھرچھے کہ ھِند ایران آژ مزن ایں مقدار آ تیل درآمد کھنت۔بہر حال نی اے محسوس کھُزی آ رؤغیں کہ صدر ٹرمپ اۓ سلوخ آ چھی اے نرمی پیدا بی غیں۔آنہی اٹکل امریکہ اۓ ڈن اۓ وزیر مائیک پومپیو اۓ یک پیرا آژ بی ہمائی آ آنہی آ گوشتا کہ امریکہ ھِچھ پیشگی شرط اۓ ایران آگو نیوکلائی پروگرام آنی بارو آ گپتران کھنغ آپا تیار ایں ۔دوہمی وٹا ایران اۓ صدر حسن روحانی آ جواب آ اے گوشتا کہ ایران دی امریکہ اۓ پھجی آ گپتران آپا تیار ایں مگن شرط اش انت کہ امریکہ ایران اۓ ود مختاری اۓ احترام کھنت ۔اٹکل تہ ہمیں بی کہ نی دوایں مُلک آنی سلوخ آ بدلاؤ او نرمی آتکا۔بہر حال بدل بیسغیں سلوخ آژ اُمیت تہ پیدا بیسا کہ حالت وشتر بیس بی آں ۔