پاکستانئ تھا ڈموکراسئ خرابین حالات۔

رندا شہ جنرل مشرف زوال آ بہ ۲۰۰۸ سالا وھدہ کہ پاکستانئ تھا یک وارئ دیگہ جمھوریتئ بحالی بوت یک رجحانئ کہ چما آت ایش ات کہ اھمین سیاسین گل آرام آرام گون پکر گام زورتنت و وتی سیاسین رقابتانا تہ ای حد دیما نہ برتنتکہ پوجین جنرل شہ آوان ناشرّین کٹ گپتگ کننت۔ ایشی اثر تہ ای کچانہ زرور بوت کہ راستامین وڑئ بہ اقتدار و واکئ بھرا گجام کارانی تھا پوج راستامین وڑئ دست مان داتگ نہ کرت مگہ پردگی پھدا باز ھم واک پوجئ دستا ات و ڈنئارانی پالسئ تھا ھم گجام مزنئن بدل بیگئ چما نیات۔ ۲۰۰۸ تھا پاکستانئ پیپلز پارٹئ واکئ سیائگا حکومت جور بوت کہ یک راز نہ یک رازئ وتی پنچ سالگین دورہ پورہ کرت۔ 

آ اولی وار ات کہ پاکستانئ تھا گجام گلئ وتی کارین دورہ پورہ کرتگ کرت۔ رندا ۲۰۱۳ سالئ تھا عامین گیچئن کاری بوتنت و پاکستانئ مسلم لیگ نواز گیشترکین ووٹانا گپتگ کرت۔ ای حکومت ھم وتی دورہ پورہ کرت مگہ شہ ای دو دورہآن ایچ گجام سرئ وزیر وتی دورہ پورہ کرتگ نہ کرتنت پہ چہ کہ حالات یک رازئ بوتنت کہ آوان دیم شہ دورہ پورہ بیگا مجبور بوتنت وترا شہ وتی پیما یک نیمگ کننت۔ 

نواز شریف بہ وتی جمھورین سدریت وھدہ بہ برزین کچانہ کوشست کرت کہ سیویلین حکومتئ بالادستی آ قائم کرتگ کنت، و خاسین وڑئ بری بھرا بازین کوشست کرت کہ ڈنئ کارانی پالسی آ بدل کرتگ کنت پہ چہ کہ شہ آی وجاپاکستانئ عکس عالمین براسدارئ تھا تہ کچانہ کہ خراب بوتگیت کمئ گیتیر بیت۔ مگہ آوانی ای کوشست پرسوب نہ اتنت۔ پہ چہ پاکستانئ پوج ھر چیزئ را تحمل کرتگ کننت مگہ ڈنئ کارانی پالسی تھا گجام تبدیلی را تحمل کرتگ نہ کننت۔ 

شہ ھمی وھا خاسین وڑئ نواز شریفئ حلاپا و جمع و کل آی پارٹئ حلاپا ھم سازشانی جال آ پرینتنا پوج بناہ کرت۔ ھمی راز کہ گیشترکین وھدانا بیت پوج و آی ایجنسی آنی اپسر بہ چُنتی کچانہ بہ سازشانی تھا موشکول بنت و ھور گونعدلیہ چُنتی دیگہ دپترانا مجبور کننت کہ آوانی لوٹگئ دیما کار کننت و ای راز انت کہ شہ آوانی منصوبہ دیما نتائج دیما کائینت۔ بہ ۲۰۱۸ سالئ گیچئن کاریانی تھا ھمی کوشت بوت کہ نواز مسلم لیگ و یا پاکستان پیپلز پارٹی و آوانی اتحادیواکا بہ دستا گپتگ مہ کننت۔ پاکستانئ کومین میڈیائ سرا انٹرسروسز پبلک ریلیشنز و آئی ایس آئی دستا پوجئ گرفت تہ یک کچانہ مضبوط و محکم بوت کہ تھانکا ھما منتنت۔ 

آئی ایس آئی سربراہ نون لیفٹننٹ جنرل فیض بوتگنت کہ آوان بہ عمران خانی گیچئن بیگئ بھرا حالاتانا سازگار کنگئ کوشست آ کرتنت، آوان دیم شہ گیچئن کاریان میجر جنرل اتنت۔ مگہ شہ آوانی ھمی کارنامہ آنی وجا پہ آوان ترقی داہ آوانامیجر جنرلئ پیما داتنت۔ 

ایچ گجام جمھورین مُلکئ تھا ای رازئ گنجائیش نہ انت۔ ای رازئ بدنام ئن اپسرئ را اول شہ آی کارا معطل کننت و رندا بہ آی حلاپا پٹ و پول کننت۔ مگہ پاکستانئ جمھوریت یک رازئ پوجئ زندانی بوتگیت۔ پاکستان پیپلز پارٹی و نوازمسلم لیگ حکومتانی دورہ جمھوریت کمی استحکام ودی کرت کہ بہ آی سرا نون آپ پرینتگنت۔ 

ستم ظریفی ایش انت کہ ای مُچین چیز بہ یک گیچئن بوتگین سرئ وزیرئ دورہ تھا بوتنت کہ نعرہ جت کہ جمھوریت آ مستحکم کنت و نوکین پاکستانئ بنیادا کنت۔ ای راز معلوم بیت کہ عمران خانی حکومت نون ھر فیصلہ را بہ پوجئاشارہ سرا کنت۔ ایشی یک مثالئ ایش انت کہ پہ مُلکئ ڈنا در کنگا شہ اکتسادین بحران آ عمران خان یک کونسلئ جور کرتگیت و بری کونسلئ تھا پوجئ سربراہ جنرال باجو ھم باسک انت۔ پاکستانئ پوج دیم شہ دیم مُچین صلاحیتانا گپتگیت ونشتگیت۔ و نو پہ آی وھدہ رستگیت کہ مُلکئ اکتسادین مسئلہ آنی تھا ھم اھمین کوتئ گیت۔ بہ پوجئ لوٹگی پھدا عمرانی حکومت سرئ محکمہ قاضی فائز عیسی حلاپا بہ سرئ محکمہ جوڈیشیل کونسلئ تھا ریفرینسئ دیما کرتگیت پہ چہ کہآوان بہ وتی چُنتی فیصلہ آنی تھا پوجئ چُنتی اپسرانا مجرم گشتگنت۔ 

ای مُچین چیز وھدہ تسر بنت کہ شہ گڈین یازدہ سالان سیویلین حکومت گون تسلسل کار کنت۔ مگہ بہ نونین سیویلین حکومتئ باروا زانتکار گشتگنت کہ ای حکومت شہ پوجئ نیمگا پہ پوجئ جیندا جور بوتگیت۔ 

پاکستانئ موجودہ ئن سیاسین صورتحال سرا گڈین سفارت کار و چُنتی کتابانی لیکوک حسین حقانی تبصرہ کرتگیت و گشتگیت کہ پاکستانئ پوج بری پکر و حیالا انت کہ پاکسانئ مُلک یک کمپنی انت و آوان ای کمپنئ بورڈ آف ڈائریکٹر انتو آوان عمران خان آ بہ وتی جینرل منیجرئ پیما ملازم کرتگنت۔