سرگال: دھشت گردی اۓ ردین اثر معاشرہ اۓ زِند چکا

عامین وڑا اے پوہ بی سی آ رؤ کہ دھشت گرد ھِلگر آنی نتیجہ آ بے ڈوہ مڑدم مِراں یا ٹھپی بی آں او ہمیں ھِلگر آ چھُکھ،پھیرُنڈ،ورنا او زائیف اوار بی آں۔بلاگُمان یک دم تہ ہمیں منظر دیستی آ رؤ مگن دھشت گردی یک اینگے لعنت ایں ہمائی اثر باز دیر تکا بی۔خاص ڈؤل چکا اینگے معاشرہ چکا گیش اثر بی ہمائی آ جتا طبقہ او نسل اۓ مڑدم بی آں او رسمی ڈؤل چکا یک دوہمی آگو ھِچھ نہ ھِچھ وڑا جُڑسی آ بی آں ۔دھشت گردی مزہب اۓ نام چکا کھُزی آ برؤ یا نسل اۓ نام چکا یا ھِچھ دی وڑا آنہی آ گیش کھنغ مڑدم آنی تہزیب آ تباہ کھنت ۔نی ایں سال آنی اندرا عالمی پھیمانہ چکا دھشت گردی آ باز تباہی کھُزا ۔ھِند ہمیں مُلک آنی اندرا اوار ایں ہماں ہاں نی بُنگیج آژ ہمیں موقف رہسا کہ دھشت گردی نی یک جہانی مسلہ بیسؤ شُزا او آنہی آ آسر کھنغ آپا مُچھیں جہانی براسی آ مِلسؤ کوشش کھنغ لوٹھی۔ھِند وا دی یک مزن ایں عرصہ آژ دھشت گردی آ دیما کھنغیں او آنہی آ ہمیں ٹؤک اۓ مُچھیں اٹکل ایں کہ اے سماج اۓ زِند آ تھانگا برباد کھنغیں۔سری لنکا آ چھی اے عرصہ پیشا ہماں کہ چُنتی چرچ آنی اندرا او ہوٹل آنی اندرا بم آنی ھِلگر بیسغاں او آنہی آ ۲۵۰ آژ گیش مڑدم مُڑتھغاں او سدیں ٹھپی بیسغاں ،آنہی آ ہماں کہ عنصر آنی دست اسا آنہاں نی پٹ او پھول اۓ کار جُزغیں۔آنہی پھدا آئی ایس آئی اۓ دست تہ اسا ہی مگن باز مقامی انتہا پسند تنظیم آنی دی اوار بی اغ اۓ حبر ایں۔سری لنگا اۓ معاشرہ اندرا دی چُنتی طبقہ او نسل اۓ مڑدم آں ہمائی آ مسلمان آنی آبادی اۓ تناسب ۱۰ پیصد ڈسسی آ رؤ۔مزکورہ ایں ھِلگر آنی پھدا اینگے ٹؤک دی دیما پھیزاغاں ہمائی آژ کَل بی کہ ہمیں ھِلگر آنی سبب آژ حالت باز ردین بی غاں ۔نی ایں روش آں اے دی گِندغ آ آتکا کہ نوہ مسلمان وزیر او کم چہ کم دو گورنر آں وتی عہدہ آژ استعفی خط داسا ۔حبر آنی روگا بودھ مزہب اۓ مڑدم آنی منغ والا چُنتی سروک آں باز مسلمان وزیر آنی چکا الزام جھزا کہ آنہاں ھِلگر کھنغ والا آنی مدد کھُزغۓ سا یا آنہاں نی بستگی آ اساں ۔یک بودھ سروک ہماں کہ پارلیمان اۓ بسک دی ایں یک مشہور بودھ ماڑی اۓ نزیخ لنگھڑ ہڑتال چکا نشتا او آنہی آ دو وزیر آنر ہٹائینغ اۓ مطالبہ کھُزا۔بہر حال نی اے حبر آتکا کہ نوہ مسلمان وزیر او دو گورنر آں استعفی داسا۔بہر حال پٹ او پھول اۓ سلسلہ جُزغیں او اُمیت ایں کہ سری لنکا اۓ سرکار آزاد او غیر جانبدار بیسؤ اصلیت اۓ بارو آ معلوم کھنت۔ہماں مڑدم ڈوہی بی آں آنہانر سزا داسی آ رؤ۔