سرگال:تائیوان او بُرز چین اۓ سمُندر اۓ بارو آ چین آ امریکہ آر خبردار کھُزا

چین او امریکہ اۓ نیمگا جُزوخیں سؤداگری مڑائی اۓ نیمگا چین اۓ دپاع اۓ وزیر واجہ جنرل وینی فینگے آ امریکہ آر خبر دار کھُزا کہ اگر امریکہ مڑائی لوٹھی تہ چین مڑائی آپا تیار ایں او اگر گپتران کھنغ لوٹھی تہ چین آنہی آپا دی تیار ایں ۔چین اۓ دپاع اۓ وزیر آ سنگا پور آ منعقد جاگاہی سیکیورتی اۓ یک کانفرنس آگو گُشتانگ اۓ نیمگا گوشتا کہ امریکہ اۓ بحریہ تائیوان او بُرز چین اۓ سمندر اۓ آف اندرا مُداخلت کھنغ آژ دیر بی۔چین اۓ دپاع اۓ وزیر آ امریکہ آر تائیوان اۓ مسلہ آ مُداخلت چکا دی تھنبہی کھُزااو گوشتئی کہ امریکہ اۓ پھجی آ مڑائی مُچھیں جہان آپا تباہی اۓ باعث بی ۔آنہی آ گوشتا کہ اگر کھسے آ دی چین اۓ تائیوان آگو مسلہ آ مُداخلت کھُزا تہ چین آخیری ایں حد تکا مڑی۔پیپلز لیبریشن آرمی اۓ جنرل اۓ وردی ماکھُزؤ جنرل وی فینگے آ وتی گُشتانگ آ گوشتا کہ 'چین آ بہر کھنغ اۓ ھِچھ منصوبہ سوب مند نوی'۔تائیوان اۓ مسلہ آ ھِچھ وڑ اۓ مداخلت اۓ باز ردین نتیجہ درا بی ۔آنہی آ گوشتا کہ چین تائیوان آ وتی آپا یک پاکین سر ڈگار منی او اگر ضرورت بیسا تہ آنہی آ کھٹغ آپا پؤجی طاغت اۓ استعمال دی کھنت۔آنہی اۓ گوشغ اسا کہ آسیا آ چین اۓ پؤجی عمل یا تعناتی آنہی اۓ چھڑوئی آ وتی دپاع آپا ایں،گُڈا دی آں وتی مفاد چکا ھِلگر اۓ صورت آ ھِچھ دی جوابی کاروائی آژ گُریز نہ کھنت ۔آنہی آ امریکہ آر ھِچھ وڑ اۓ جھیڑو اۓ ردین نتیجہ آنی آپا تھنبہ کھُزا او گوشتئی کہ دوایں مُلک آنر ہمیں ٹؤک اۓ علم ایں کہ دوایں آنی نیمگا جھیڑو یا مڑائی دوایں آنی آپا او مُچھیں جہان آپا تباہ کھنوخیں بی۔جہان اۓ کے ای مُلک آنی ڈؤل آژ امریکہ اۓ تائیوان اۓ پھجی آ سفارتی سیال داری نعیں مگن آں تائیوان اۓ ہمیں دمغ آ مزن ایں حامی ایں او تائیوان آ وتی دپاع آپا اسلحہ دا۔گوستی ایں روش ہمیں کانفرنس آ اوار امریکہ اۓ دپاع اۓ وزیر پیٹرک شیہناہن آ وتی گُشتانگ آ گوشتغۓ سا کہ امریکہ دمغ آ چین اۓ سلوخ آ چُپی اۓ پھجی آ برداشت نہ کھنت ۔سؤداگری مڑائی ،امریکہ اۓ تائیوان آپا ھمایت او بُرز چین اۓ سمندر اۓ آف آ چین اۓ پؤجی طاغت آ گیشتری اۓ وجہ آژ چین او امریکہ اۓ سیال داری آ ناوشی نی ایں روش آں باز گیش بیسا۔دوایں مُلک آنی نیمگا سیال داری آ ہماں وخت ناوشی باز گیش بیسا ہماں وخت امریکہ آ چین چکا اقصادی پالیسی آ بدلاؤ اۓ وعدہ آژ ہٹغ اۓ الزام جھزا او چین آ جواب داسغۓ سا کہ اے امریکہ اۓ یک غیر زمہ وار الزام ایں ۔آنہی آ پھدا امریکہ آ چین اۓ ۲۰۰ ارب ڈالر اۓ درآمد چکا ۲۵ پیصد اۓ ٹیکس لاگو کھُزا۔جہان اۓ دو مزن ایں طاغت آنی نیمگا ناوشی مُچھیں جہانی براسی آپا پِکر اۓ باعث ایں۔امریکہ او چین اۓ نیمگا ہمیں ناوشی اۓ بُنگیج گوستی ایں سال اپریل آ ہماں وخت بیسا ہماں وخت صدر ٹرمپ آ املاک دانش اۓ دُزی اۓ الزام جھزؤ چین اۓ شۓ آنی درآمد چکا ۵۰ ارب ڈالر اۓ گیش ٹیکس جھنغ اۓ جار جھزا۔