سرگال:پاکستان اۓ پؤج اۓ بجٹ آ کھمین کھنغ اۓ منصوبہ

شاید اے اولی ایں وار اُش کھنغ آ پھیزاغیں کہ پاکستان اۓ پؤج آ یک سال آپا وتی خرچ آ کمی کھنغ اۓ فیصلہ کھُزا۔اے دی حبر ایں کہ کمی کھنغ آژ ہماں کہ زر بھچاں آں قبائیلی جاگاہ او صوبہ بلوچستان اۓ ترقی منصوبہ آنی چکا خرچ کھُزی آ رؤ۔پاکستان اۓ دپاع اۓ خرچ آنی مسلہ اے رہسا کہ قومی آمدنی اۓ یک مزن ایں زر ہمیں کار آپا مقرر کھُزی آ رؤ ہمائی چکا کھسے آر سوال کھنغ اۓ اجازت نوی او عامین ڈؤل چکا آنہی چکا بحث دی نوی گویا یک وڑا اندری ایں پاکستان اۓ دپاع اۓ شعبہ آپا مقرر کھُزی ایں زر آنر تھانگا سوال آنژ بُڑزا منسی آ رؤ او اگر کھسے سوال کھنغ اۓ جُرت دی کھنت تہ آنہی آ پاکستان اۓ سیکیورٹی آپا خطر او مُلک دُژمن منسی آ رؤ۔باز زانتکار آنی ویچار ایں کہ پاکستان اۓ اقتصادی بد حالی اۓ یک مزن ایں وجہ ہمیں رہسا کہ پؤجی بجٹ ہمیختر گیش ایں کہ ترقی اۓ منصوبہ او پروجیکٹ چکا خرچ نوی۔اسٹاک ہوم انٹر نیشنل پیس ریسرچ انسٹی ٹیوٹ آ وتی نی ایں رپورٹ آ ڈسسا کہ ۲۰۱۸ آ پاکستان جہان اۓ ہماں ۲۰ سجوں آنژ مزن ایں مُلک آ اوار اسا ہماں ہاں سجوں آنژ گیش دپاعی خرچ کھُزغۓ سا۔اے زر ۱۱۔۴ بلین ڈالر اسا۔۲۰۱۸ آ پؤج چکا ہماں کہ زر خرچ بیسا آں پاکستان اۓ مجموعی لوغی پیداوار اۓ چھیار پیصد بہر اۓ براور ایں۔۲۰۰۴ آ پھدا آژ اے سجوں آنژ بُڑزی ایں سطح اسا۔جہان آ وتی پؤج چکا سجوں آنژ گیش زر خرچ کھنغ والا مُلک امریکہ ایں ہمائی آ گوستی ایں سال ۶۴۹ بلین ڈالر اۓ زر مختص کھُزغۓ سا۔گوستی ایں یک دھائی آ آنہی آ وتی دپاع اۓ خرچ آ ۱۷ فیصد اۓ کمی کھُزا۔بہر حال مِلغ والا ایں حبر آنی روگا پاکستان اۓ پؤج آ یک سال آپا وتی بجٹ آ کمی کھنغ اۓ فیصلہ کھُزا ۔اے پاکستان آپا یک مزن ایں ٹؤک منسی آ رؤغیں۔آنہی مقصد اے ڈسسی آ رؤغیں کہ پؤج ،سویلین سرکار اۓ پھجی آ ہمیں ٹؤک آپا تعاون کھنغ آ باڑہ ایں کہ نی ایں اقتصادی بحران چکا قابو کھنغ بیس بی۔انٹر سروسز پبلک ریلیشنز اۓ داریکتر جنرل،میجر جنرل آصف غفور آ وتی تویتر پھیغام آ اے گوشتا کہ دپاعی بجٹ آ اے کمی رضاکاری ڈؤل چکا کھُزی آ رؤغیں او اینگا یک سال آپا کھُزی آ رؤغیں۔پھجی آ ہی آنہی آ اے دی گوشتا کہ اِشی آژ دپاع اۓ او سیکیورتی اۓ مسلہ آنی چکا اثر بی۔دوہمی وٹا سر وزیر عمران خان آ پؤج اۓ ہمیں ٹؤک آپا وشادگی کھُزا کہ آنہاں رضاکارانہ ڈؤل چکا وتی بجٹ آ کمی کھنغ اۓ جار جھزا۔آنہی آ پؤج اۓ تعریف کھُزؤ اے دی گوشتا کہ آں پؤج اۓ منت وار ایں کہ چُنتی چیلنجز آنی باوجوت آنہی آ ہمیں گام زُڑتھا۔باز زانتکار آنی اے ویچار دی ایں کہ اگر اصل آ پؤج آ پاکستان اۓ معیشت وشتر کھنغ اۓ پِکر بیس تہ آں اینگے گام سرا زُڑتھ۔ ۔گُڈا دی آنہی آ یک شَر ایں گام منسی آ رؤ۔مگن چھڑوئی آ یک سال آپا دپاع اۓ بجٹ آ کمی اۓ فیصلہ یک علامت اۓ حیثیت ایر کھنت۔اگر اصل آ پاکستان اۓ معیشت آ مستحکم کھنغی ایں تہ آنہی آپا مزن ایں مُدتی منصوبہ بندی اۓ ضرورت کھوی۔