سرگال:بشکیک آ مودی ۔ عمران بیٹھک اۓ گُمان نعیں

ھِند او پاکستان دوایں مُلک آنی باز حلقہ آنی اندرا اے اُمیت کھُزی آ رؤغۓ سا کہ ہماں وخت دوایں مُلک آنی سر وزیر کرغستان اۓ بنجہ بشکیک آ ۱۳ او ۱۴ جون آ منعقد بی اغ والا چوٹی کانفرنس آ بہر گِرغ آپا رواں تہ جتا آژ دی ھِند او پاکستان اۓ سروک آپس آ مِلاں او ہورین مسلہ آنی چکا چھی اے ٹؤک توار کھناں ۔مگن پنچ شمبھے آ ھِند اۓ ڈن اۓ وزارت اۓ وٹاژ اے پیرا داسی آ شُزا کہ سر وزیر مودی او آنہی پاکستان اۓ ہم منصب اۓ نیمگا ھِچھ وڑ اۓ بیٹھک اۓ گُمان نعیں پھرچھے کہ انگے ھِچھ پروگرام نہ ٹھائینتھی آ شُزا۔گیر بی کہ ھِند او پاکستان اۓ نیمگا نی ایں روش آں باز ناوشی پیدا بیسا۔گوستی ایں ٹؤک آنژ اگر چھم چھَرینتھی آ برواں او چھڑوئی آ نی ایں ماہ آنی ٹؤک کھُزی آ برؤ تہ اے گوشغی بی کہ ھِند اۓ مَہل اۓ دی چھی اے حد بی۔پلوامہ آ جیش محمد اۓ دھشت گرد آں ود کُش بم ھِلگر آ چھِل آژ گیش سی آر پی ایف اۓ جوان آنر شہید کھُزغۓ سا ۔ھِند آ ہمیں دپ آ پھدا بالا کوٹ آ سرجیکل استرائیک کھُزغۓ سا پھرچھے کہ اِشی سوا آنہی آگو دوہمی ھِچھ دَگ نیا ۔پاکستان اۓ دھشت گرد ٹلہ بازی آ اینگے ھِلگر آنی منسوبہ کھناں او ہماں وخت ھِند اۓ وٹاژ جواب داسی آ رؤ یا آں پاکستان آژ شکایت کھنت تہ پاکستان آ کھدیں دی نہ منسا کہ ہمیں ھِلگر آ آنہی دست اوار ایں۔پلوامہ ھِلگر آ پھدا دی پاکستان آ ہمیں گوشتا کہ ھِچھ پاکستانی تنظیم آ اینگے ھِچھ نہ کھُزا۔چوش کہ ھِلگر آ پھدا جیش محمد آ وا آنہی زمہ واری منسا،مگن پاکستان آ گُڈا دی آنہی آژ انکار کھُزا او ثبوت او شواہد لوٹھسئی۔ھِند آگو اِشی اۓ علاوہ دوہمی ھِچھ دگ نیا کہ آں وتی ڈؤل چکا دھشت گرد آنر اے باور کھنائینی کہ آف سغر آژ بُڑزا بیسا۔بالا کوٹ اۓ استرائیک ھِند اۓ بدل بسغیں حکمت عملی آ پدھر کھنت۔ھِند اۓ ہمیں موقف ایں کہ ہماں وخت تکا دھشت گردی اۓ سلسلہ بند نوی ہماں وخت تکا ھِچھ وڑ اۓ گپتران اۓ ھِچھ گُمان پیدا نوی۔نی پاکستان آر وا فیصلہ کھنغی بی آں سیال داری آ وشتر کھنغ آپا تھاں دگ چکا رؤ۔ہموزا تکا ثبوت او شواہد دۓ اغ اۓ ٹؤک انت تہ یک وار نہ کے ای دھکا چُنتی ثبوت پاکستان آر داسغاں۔ممبئی ھِلگر آنی بارو آ اینگے ھِچھ جاگاہ نعیلسی آ شُزا ہماں کہ پُختہ ثبوت آنی دۓ اغ آپا گُمان پیدا کھنت مگن نی تکا ہمیں دھشت گرد آنی حلاپ عدالتی کاروائی نویسا۔بہر حال عمران خان اگر اصل آ سنجیدہ ایں او لوٹھی کہ ھِند او پاک سیال داری آ وشتری بی تہ نی اے آنہی زمہ واری بی کہ وتی سرکار آ دھشت گردی آ آسر کھنغ آپا مناسو گام گیج کھنت ہمائی آژ ھِند اۓ باور برحال بی۔