سرگال:ماحول اۓ آلودگی اۓ بارو آ صدر ٹرمپ اۓ سختیں پیرا نا مناسو

امریکہ اۓ صدر ڈونلڈ ٹرمپ آ وتی یک نی ایں انترویو آ ماحولیاتی بدلاؤ آپا ھِند،چین او روس آ زمہ وار منسا او الزام جھزئی کہ ہمیں مُلک آں ماحولیاتی بدلاؤ اۓ مسلہ آ ھِچھ نہ کھُزا۔آنہی اۓ اے دی گُشغ ایں کہ ہمیں مُلک آں ہمیں دمغ آ یک اینگے جاگاہ آ مٹینتھا ہموزا ساہ گِرغ دی مشکل بیسا۔درگتہ کہ امریکہ اۓ بارو آآنہی دعوی ایں کہ ہموزا باز صاف صفائی ایں ۔آنہی آ یک برطانیہ اۓ ٹی وی آ انترویو داسؤ ۲۰۱۷ آ ماحولیات اۓ بارو آ پیرس منغ نامہ آژ امریکہ آ جتا بی اغ آپا ہمیں مُلک آنر زمہ وار منسا او وتی ہمیں فیصلہ اۓ دپاع کھُزئی۔آنہی اۓ اے دی گُشغ ایں کہ ھِند،چین او روس آ نہ تہ صفائی بیسا او نہ ہی ورغ اۓ آف صاف ایں۔ہمیں مُلک آنی اندرا آلودگی باز گیش ایں۔آنہی ہمیں پیرا باز حیران کھنوخ نعیں پھرچھے کہ آنہی آ پیرس منغ نامہ آژ جتا بی اغ آپا ھِچھ نہ ھِچھ جواز تہ دۓ غی اسا۔آنہی ہمیں پیرا آژ اے اُمیت آسر بیسا کہ آں ماحولیاتی بدلاؤ اۓ بارو آ مزکورہ مُلک آنی بارو آ وتی لہجہ آ نرم کھنت۔اگر ما ٹرمپ اۓ پیرا آ گِندوں تہ پدھر ایں ڈؤل چکا اے محسوس بی کہ آں ماحول او موسم آ یک دوہمی اۓ براور یا یک دوہمی اۓ مترادف پوہ بی غیں۔درگتہ کہ ماحول اۓ حدت ھِچھ دیگر ایں او موسم اۓ بدلاؤ دیگر ۔ہماں وخت آں اے گُشی کہ مئی ویچار ایں کہ موسم بدل بیسا او مناں مان کھاۓ کہ اے دوایں طریقہ آنگو بدل بی تہ اینگا مان کھاۓ کہ آنہی آ موسم او ماحولیات اۓ فرق اۓ بارو آ ھِچھ کَل نعیں۔او اے ٹؤک جہان اۓ سجوں آنژ طاغتور مُلک اۓ صدر اۓ زوان آژ درا بیسا ۔اگر ما ماحولیاتی بدلاؤ آ قابو کھنغ آپا جتا مُلک آنی کار آنی مشاہدہ کھنوں تہ کَل بی کہ وا صدر ٹرمپ آ شاید وتی مُلک اۓ کارکردگی اۓ بارو آ گیش علم نعیں۔آں دیگر مُلک آنر تہ زمہ وار منغیں مگن اے گِندغ آ باڑہ نعیں کہ وا آنہی مُلک اۓ ٹریک ریکارڈ چھے رہسا۔آں اے دعوی کھنت کہ امریکہ جہان اۓ ہماں مُلک آ اوار ایں ہموزا ماحول باز صاف ایں ۔حالانکہ اصل آ اِش ایں کہ امریکہ گرین ہاؤس گیس درا کھنغ والا جہان اۓ دوہمی سجوں آنژ مزن ایں مُلک ایں۔اے گرین ہاؤس گیس جہان آ آلودگی پیدا کھنغ آپا مزن ایں وجہ ایں۔مگن شاید ٹرمپ ہمیں ٹؤک آ پوہ بی اغ آپا تیار نعیں ۔امریکہ آ سرا آژ ہمیں ٹؤک آژ انکار کھُزا کہ آں دی کھدیں ماحول اۓ بدلاؤ اۓ زمہ وار ایں۔نی دی آں ہمیں ٹؤک کھنغیں۔ہماں وڑا ٹرمپ آ امریکہ آر پیرس منغ نامہ آژ جتا کھُزا ہماں وڑا ہموزا اۓ پیسر اۓ صدر جارج ڈبلیو بُش ۲۰۱۱ آ کیوٹو پروٹوکول آژ جتا بیسغۓ سا۔ہمیں وڑا سینئیر بش آ اے پیرا داسغۓ سا کہ امریکہ اۓ زِند اۓ طریقہ آنی چکا ٹؤک نویس بی ۔آنہی اۓ ہمیں پیرا ماحولیاتی بدلاؤ اۓ بارو آ پیرا آ یک بدنام پیرا ثابت بیسغۓ سا۔بہر حال جہان سینئیر او جونئیر بش اۓ دؤر آژ باز اگا بیسؤ شُزا۔گیر بی کہ ہماں وخت صدر ٹرمپ آ امریکہ آ پیرس منغ نامہ آژ جتا کھُزغۓ سا تہ ھِند اۓ سروزیر نریندر مودی آ وتی یک ڈن اۓ مُلکی دؤرہ اۓ موقع چکا گوشتغۓ سا کہ پیرس منغ نامہ رہی یا نہ رہی ھِند آئیغ والا نسل آنر صاف ماحول دۓ اغ اۓ وتی وعدہ اۓ پابند ایں۔ٹرمپ آر لوٹھی کہ آں امریکہ اۓ رسمی انکاری موڈ آژ درا بی او ماحولیاتی بدلاؤ اۓ بارو آ وتی زمہ واری آنی احساس کھُزؤ دوہمی مُلک آنی چکا الزام جھنغ اۓ رویہ آ ترک کھنت۔