سرگال:کراس فائیر آ مِرغ او گرئیغ والا افغان چُکھ

آنگا تہ افغان چھِل سال آنژ مڑائی ،خانہ جنگی او حونی منظر آنی شاہد رہسا مگن نواد اۓ دہائی اۓ نیمگا ہموزا اۓ تاریخ آ یک نوخیں دیم گِتا ہماں وخت طالبان آں سروکی چکا قوضہ کھُزا۔آنہاں شرعی یا اسلامی قانون آ لاگو کھنغ اۓ دعوی کھُزا ہمائی آ کہ زائیف آنی پڑھیائی چکا پابندی جھزی آ شُزا او آنہانر لوغ آنژ درا بی اغ اۓ اجازت نیا۔شرع اۓ نام چکا مڑدم آنر کوڑہ آنژ کُٹسی آ شُز،نہ چھڑوئی آ موصیقی او چھاپ چکا پابندی جھزی آ شُزا بلکہ ہر وڑ اۓ کلچرل پروگرام آنی چکا پابندی جھزی آ شُزا۔اے آنہاں نی مزہب او شرع اۓ معنی اسا۔بہر حال ۲۰۰۱ آ نیویارک او واشنگٹن آ بی اغ والا دھشت گرد ھِلگر آنی پھدا ہماں وخت امریکہ آ دھشت گردی اۓ حلاپ مڑائی بنِا کھُزا او طالبان آ القاعدہ او آنہی اۓ لیڈر اوسامہ بن لادن آگو وتی سیال داری بھورینغ آژ انکار کھُزا تہ طالبان سرکار دی آنہی زد آ آتکا او آنہی سروکی آسر بیسا۔امریکہ اۓ سروکی آ ناٹو پؤج افغانستان آ تعینات بیسغاں۔۲۰۱۴ آ بہرحال ڈن اۓ مُلکی پؤجی آنی مزن ایں تعداد گڑتھؤ شُزامگن چھی اے تعداد اۓ پؤجی افگان سیکیورتی فورس اۓ مدد آپا تعینات رہسغاں۔اے پؤجی جارج ڈبلیو بُش اۓ زمانہ آ آتکغۓ ساں او صدر اوبامہ اۓ زمانہ آ آنہاں نی گڑدغ بںا بٖسغۓ سا۔اُمیت اسا کہ امریکی پؤجی آنی گڑدغ آ پھدا طالبان اۓ ھِلگر آ کمی بی مگن بیسا آنہی برعکس۔امریکہ اۓ پؤجی آنی گڑدغ آ پھدا طالبان اۓ ھِلگر باز گیش بیسغاں۔ٹرمپ سرکار آ افغانستان اۓ بارو آ نوخیں پالیسی اۓ جار جھزا او پھجی آ ہی پاکستان آپا سخت ایں سلوخ اپنائینتھؤ آنہی مدد دارغ اۓ سلسلہ دی بنا کھُزا او پاکستان چکا الزام جھزئی کہ کروڑو ڈالر اۓ مدد گِرغ اۓ باوجوت آنہی آ امریکہ آ پھَرامتھا۔گُڈا اچانکی آژ چھی اے اینگا بیسا کہ ٹرمپ اۓ پالیسی آ یک نوخیں دیم گِتا او طالبان آگو امن گپتران اۓ سلسلہ دوحہ آ بنا بیسا۔طالبان اۓ ویچار اے اسا کہ آں امریکہ آگو تہ گپتران کھنت مگن افگان سرکار آگو آنہی ھِچھ سروکار نعیں۔ویچار کھُزی آ رؤغیں کہ افغانستان جہان اۓ ہماں ردین او خطرناک مُلک آنژ یک ایں ہموزا چکھ سجوں آنژ گیش نشانہ بی آں ۔