سرگال:دھشت گرد آنی سروک حافظ سعید آر عبوری ایں ضمانت

حبر ایں کہ پاکستان اۓ شہر لاہور آ انسداد دھشت گردی اۓ یک عدالت آ جماعت الدعوی اۓ سروک حافظ سعید آر او سۓ دیگر مڑدم آنر پیشگی ضمانت داسا ۔ہمیں مسلہ اۓ تعلق جماعت الدعوی اۓ وٹاژ وتی مدرسہ آپا ڈغار اۓ غیر قانونی استعمال او دھشت گردی اۓ مالیاتی واہریائی کھنغ آگو ایں۔عدالت آ ہماں مڑدم آنر عبوری ایں ضمانت داسا ،آنہی آ حافظ سعید ،آنہی براس حافظ مسعود او لشکر طیبہ اۓ دو شریک بائیان ،امیر حمزہ او ملک ظفر اۓ نام اوار آں ۔حمزہ او ظفر ہڑ دوایں آگو جماعت الدعوی آپا فنڈ جوڑ کھنغ اۓ زمہ واری اسا۔حبر آنی روگا حمزہ آ یک سال سرا لشکر طیبہ آژ جتا بیسؤ وتی جِند اۓ دھشت گرد تنظیم ٹھائینتھغۓ سا،ہمائی نام آنہی آ جیش منقفہ ایر کھُزا۔زکر اۓ لائیق انت کہ قومی ایکشن پلان اۓ روگا نیشنل سیکیورتی کمیتی اۓ ہدایت چکا عمل کھُزؤ پاکستان اۓ انسداد دھشت گردی اۓ محکمہ آ جولائی اۓ اولی ایں ہپتغ آ جماعت الدعوی اۓ سروک آنی حلاپ لاہور،گجرانوالا،ملتان،فیصل آباد او سرگودہ آ ۲۳ ایف آئی آر درج کھنائینتھغاں۔ہمیں رپورٹ آنی اندرا کالعدم تنظیم اۓ چھیار مزن ایں سروک آنی پھجی آ آنہاں نی ۱۳ دیگر سنگت آنی نام اوار آں ۔مئی آ سعید اۓ براس نسبتی عبدالرحمن مکی او یک دیگر لیڈر محمد شہباز آ پولیس آ دستگیر کھُزغۓ سا۔نیشنل سیکیورتی اۓ وٹاژ جماعت الدعوی او آنہی فلاحی تنظیم فلاح انسانیت چکا پابندی جھنغ آ پھدا انسداد دھشت گردی اۓ محمکہ آ ہماں کہ پٹ او پھول کھُزا،ہمائی آژ کل بی کہ جماعت الدعوی ،فلاح انسانت فاؤنڈیشن ڈؤل اۓ رفاحی تنظیم او ال انفال دعوۃ الارشاد او معاذ بن جبل ڈؤل اۓ جتا ٹرسٹ آنی زریعہ فنڈ جوڑ کھُزؤ آنہی استعمال دھشت گردی اۓ مالی واہریائی کھنغۓ ساں،درگتہ کہ ہمیں ٹؤک اۓ دعوی کھُزی آ شُزغۓ سا کہ سرکار آ ہمیں مُچھیں تنظیم او ٹرسٹ آنر وتی کنترول آ گِتا۔لاہور اۓ انسداد دھشت گردی عدالت اۓ وٹاژ جماعت الدعوی اۓ سۓ اعلی سروک آنر ضمانت داسی آ روغ ہمیں ٹؤک اۓ دلیل ایں کہ پاکستان اۓ قانون لاگو کھنغ والا ایجنسی ہمیں دھشت گرد تنظیم اۓ سروک آنر آنہاں نی دھشت گرد عمل آنی آپا سزا دیائینغ آ سنجیدہ نیاں۔ضمانت اۓ منظوری اے ٹؤک دی ثابت کھنت کہ دھشت گرد عنصر آنر دیما کھنغ آ پاکستان اۓ جتا ادارہ جتا ڈؤل آگو کار کھنگاں۔پاکستان اۓ سرکار آ سری ایں دھکا ہمیں وڑ اۓ کاروائی نہ کھُزا اِشی آژ پیشا دی حافظ سعید آر دھ ماہ تکا لوغ آ نیاہ بند کھنغ آ پھدا لاہور اۓ یک عدالت آ رہا کھُزغۓ سا۔گوستی ایں ماہ امریکہ اۓ شہر اور لینڈو آ وتی جائیزہ بیٹھک آ ٹاسک فورس آ پاکستان اۓ ہمیں ناسوبی چکا پِکر پدھر کھُزا او گوشتئی کہ ہمیں سال اکتوبر تکا آں ایکشن پلان چکا کاروائی پورا کھنت اگر اینگا نویسا تہ پاکستان آر بلیک لسٹ آ اوار کھنغ بیس بی۔دُکھ اۓ ٹؤک اش انت کہ پاکستان اۓ پؤج ،آئی ایس آئی او لشکر طیبہ ڈؤل اۓ دھشت گرد ٹلہ آنی نیمگا سیال داری ہمیختر مضبوط ایں کہ سرکار آپا حافظ سعید ڈؤل اۓ عالمی دھشت گرد اۓ حلاپ فیصلہ اۓ کاروائی کھنغ مشکل بی غیں۔