سرگال:جادھو اۓ کیس آ ھِند اۓ موقف اۓ انترنیشنل کورت آف جستس اۓ وٹاژ تصدیق

پاکستان اۓ یک پؤجی عدالت آ ھِند بحریہ اۓ یک پیسر اۓ اپسر بھوشن جادھو آ جاسوسی او دھشت گردی اۓ ڈوہ آ پھاہو دۓ اغ اۓ سزا اُش کھنائینتھغۓ سا۔ہمیں سزا اۓ تصدیق پاکستان اۓ آرمی چیف جنرل اپسر جاوید باجوا آ دی کھُزغۓ سا۔مگن ہمیں پؤجی عدالت اۓ حیثیت ھِچھ کنگارو کورت آژ گیش نیا۔ڈوہی آر ھِچھ اینگے موقع دی ناسی آ شُزغۓ سا کہ آں وتی دپاع اۓ انتظام کھُز کھنت۔ھِند آر دی ہمیں ٹؤک اۓ اجازت ناسی آ شُزا کہ آں ڈوہی آگو مِلی ۔نہ تہ ھِچھ سفارتی بستگی قائیم بیسا او نہ تہ کونسلر آگو۔مدعی او منصف پاکستان اۓ پؤجی عدالت او پؤج ہی اسا۔پاکستان اۓ الزام اے اسا کہ کل بھوشن جادھو ھِند ایجنسی را آپا کار کھنغۓ سااو آنہی آ بلوچستان آژ دستگیر کھُزی آ شُزغۓ سا درگتہ کہ اصلیت اے اسا کہ آں یک بحریہ اۓ ریٹائیرڈ اپسر اسا ہمائی اۓ نی ھِچھ سرکاری ادارہ یا ایجنسی آگو ھِچھ بستگی نیا۔آنہی اۓ وتی جند اۓ کاروبار اسا او ہمائی بارو آ آں ایران اسا ہموزا آژ آنہی آر یرغمال کھُزؤ پاکستان آڑتھی آ شُزا۔ہمیں ٹؤک اۓ اشارہ ایران اۓ وٹاژ دی داسی آ شُزا۔آنہی آ وتی دستگیری آ ایر کھُزؤ ہی پاکستان اۓ حاکم آں آنہی آژ اقبالیہ بیان ریکارڈ کھُزؤ یک ویڈیو اۓ زریعہ آگو آنہی مشہوری کھُزؤ ہماں بُنشت چکا آنہی آ پھاہو دۓ سزا دی اُش کھنائینتھا۔مگن ہمیں مُچھیں ڈرامہ اۓ اصلیت بُنگیج آژ ہی پدھر نیاہ پھیزاغۓ سا او ھِچھ دی آزات او غیر جانبدار مڑدم وتی ویچار قائیم کھُز کھنت کہ ہمیں وڑ اۓ فیصلہ ھِچھ کنگارو کورت اۓ ہی بیس بی۔بہر حال ھِند آ دی ہیگ آ واقع انترنیشنل کورت آف جستس آگو رابطہ کھُزا او جادھو اۓ مسلہ پیش کھُزا۔دوشی آنہی آ وتی فیصلہ تفصیل آگو اُش کھنائینتھؤ اے گوشتا کہ پاکستان اۓ پؤجی عدالت اۓ ہمیں فیصلہ بین الاقوامی قانون اۓ حلاپ ورزی اسا۔بین الاقوامی عدالت آ وتی فیصلہ آ اے دی گوشتا کہ پاکستان آ وتی پھاہو دۓ اغ اۓ فیصلہ چکا پدوارغ ویچار کھنغ لوٹھی۔بہر حال بین القوامی عدالت اۓ فیصلہ مُچھین جہان اۓ دیما ایں۔ہموزا ہمیں فیصلہ آژ پدھر بی کہ پاکستان اۓ پؤجی عدالت آنی حیثیت کنگارو کورت آژ گیش نوی ہموزا ہمیں ٹؤک اۓ دی اشارہ مِلسا کہ دھشت گردی آ گیش کھنغ اۓ پاکستان اۓ دماغ ہمیں ٹؤک آپا نوخیں جواز پھولی کہ وتی ہمیں ویچار آنی چکا پڑدہ ماکھنغ آپا آں ھِند چکا دی اینگے دروغی الزام جھزؤ بین الاقوامی براسی آ بدنام کھنت او اے ثابت کھنغ اۓ کوشش کھنت کہ ھِند دی پاکستان آ دھشت گردی آ گیش کھنغیں ،مگن آں وتی ہمیں کوشش آ دی بروبر ناسوب بی غیں۔نی بہر حال پاکستان آ پھاہو اۓ سزا چکا پدوارغ ویچار کھنغی بی او مقدمہ اۓ کاروائی پدوارغ بنِا کھنغی بی ہمائی آ جادھو آ اے موقع دی دۓ غی بی آں کونسلر آگو مِلی۔