سرگال:عمران۔ٹرمپ بیٹھک آژ سرا پاکستان آ ہر وٹا گُمان،کنفیوژن او سنسر شپ

دوشی وہائیٹ ہاؤس آ امریکہ اۓ صدرڈونلڈ ٹرمپ او پاکستان اۓ سروزیر عمران خان اۓ نیمگا چھے او تھانگے ڈؤل اۓ گپتران بیسا،آنہی تفصیل تہ پھدا دیما کھاۓ ،مگن آنہی آژ سرا پاکستان آ پریس سنسرشپ او زانتکار او تھنک ٹینک آ بلیک لسٹ آ اوار کھنغ او آنہی کردار کشی کھنغ اۓ سلسلہ جُزتھا۔اتفاق آگو عین ہماں وخت پاکستان اۓ جال رونشت جاگاہ آ یک چیک پوائینٹ او آنہی آ پھدا یک اسپتال چکا دی ود کُش ھِلگر بیسا،ہمائی آ نوہ مڑدم جنجیسغاں۔ڈسی آ رؤغیں کہ ہمیں ھِلگر پاکستانی طالبان آ کھُزا۔ھِلگر آژ یک روش سرا صوبہ خیبر پختون خواہ اۓ ہماں قبائیلی ضلع آ سری ایں دھکا گچین کاری بیسغۓ سا،ہماں ہانر نی ایں روش آ ہمیں صوبہ آ اوار کھُزی آ شُزا۔مِرغ والا آنی اندرا شش پولیس والا دی اوار آں ،درگتہ کہ چھِل مڑدم ٹھپی دی بیسغاں ۔ٹھپی آنر ہماں اسپتال آ داخل کھنائینتھی آ شُزا ہموزا یک نقاب مان کھُزی ایں زائیف سرا آژ موجوت اسا،ہمائی آ ود کُش بم ھِلگر کھُزا۔ہمیں ہڑ دوایں دپ ڈیرہ اسمائیل خان ضلع آ بیسغاں۔زائیف بمبار اۓ دست آژ چھیار پولیس والا او سۓ شہری کُشتی آ شُزغاں۔پاکستانی پؤج آ مزن ایں دعوی کھُزغۓسا کہ کے ای آپریشن بِنا کھُزؤ آنہی آ ہمیں دھشت گرد آنی سرین بھورینتھا ،ہماں کہ پاکستان اندرا ھِلگر کھناں ۔مگن اصلیت تہ اِش انت کہ نی دی طالبان ھِلگر کھنغاں او خاصیں وڑا پولیس والا آنر نشانہ کھنغاں۔مگن ہمیں وڑ اۓ دپ پاکستان اندرا ھِچھ نوخیں ٹؤک نعیں او ہمیں حبر آ دی مڑدم آنی دھیان وتی وٹا گیش نہ چھکسا پھرچھے کہ ہر وٹا عمران خان اۓ امریکہ اۓ دؤرہ او ٹرمپ آگو آنہی مجوزہ بیٹھک اۓ چرچہ اسا۔سرکار آ منغ والا ایں دھُرآنی وٹاژ اے ویچار پدھر کھُزی آ رؤغیں کہ اے بیٹھک پاک امریکہ سیال داری اۓ یک نوخیں باب بِنا کھنت۔بہر حال ہمینگا کہ سرا گوشتی آ شُزا کہ تفصیل تہ پھدا کھاۓ اے وخت اے اٹکل جھنغ بیس بی کہ عمران خان چھیختر سوب مند یا ناسوب بیسؤ امریکہ آژ پاکستان گڑدی کھاۓ۔اے دی گوشتی آ رؤغیں کہ گپتران اۓ خاصیں ٹِک افغانستان آ امن اۓ قیام دھشت گردی آ دارغ او پاکستان آ مِلغ والا پؤجی مدد ڈؤل اۓ مسلہ بی آں۔امریکہ اۓ زانتکار دھُر آنی گُشغ ایں کہ امریکہ ہمیں ٹؤک چکا چکا زور دا کہ پاکستان ہماں ٹلہ آنی حلاپ سخت ایں کاروائی کھنت ہماں کہ پاکستان اۓ سرڈغار آ دھشت گردی آپا استعمال کھنغاں،مگن عمران خان اۓ دؤرہ آژ سرا او ہمیں دؤرہ اۓ نیمگا میڈیا زانتکار او امریکہ آ رہغ والا پاکستان اۓ ہماں زانتکار ،تھنک ٹینک آگو جُڑسی مڑدم،پاکستان اۓ پؤج اۓ تنقیدکھنغ والا او ہماں ڈن اۓ مُلکی زانتکار آنی لکھِغ چکا نہ چھڑوئی آ پابندی جھزی آ شُزا بلکہ باز آنر بلیک لسٹ کھُزی آ شُزا۔چھڑوئی آ یک سال اۓ مُدت آ پاکستان اۓ حالت اے بیسا کہ عمران خان اۓ چُنتی منغ والا دی نی اے گوشغاں کہ آنہی آ نوخیں پاکستان آپا چھے چھے واہو پھیدھارتھغۓ ساں او چھے چھے دیما پھیزاغیں۔اپوزیشن اۓ حلاپ بدلہ اۓ کاروائی
سخت ایں ڈؤل اۓ سنسرشپ او ہر مسلہ آ پؤج آگو وتی سنگتی کھنغ اۓ سبب آژ عمران خان اۓ حالت اینگے بیسا۔