سرگال:کشمیر چکا ثالثی ھِند آ منظور نعیں

ہر مُلک وتی پالیسی باز ویچار آنی پھدا ٹھائینی،آنہی پالیسی آچانکی آگو بدل نوی۔ھِند آژ دی ہمیں اُمیت کھنغ نویس بی کہ آنہی پالیسی یک شف آ بدل بی،آں وتی ویچار آنژ پھدا ہٹی برؤ۔کشمیر چکا ھِند اۓ پدھر ایں موقف رہسا کہ آں آنہی اۓ مضبوط بہر ایں مگن کشمیر اۓ مسلہ چکا ہمسائیگ مُلک پاکستان اۓ پھجی آ ٹؤک توار کھنغ آژ کھدیں دی پھدا نہ ہٹسا،البت آں آنہی نیمگا سۓ می فریق آ اوار کھنغ آپا تیار نعیں ۔دوہمی وٹا پاکستان اۓ اے کوشش رہسا کہ کشمیر اۓ مسلہ آ حل کھنغ آپا امریکہ آنہی ثالثی کھنت،ہمیں خاطرہ عمران خان آ پاکستان اۓ سروزیر اۓ ڈؤل چکا وتی اولی ایں امریکہ اۓ دؤرہ آ امریکہ اۓ صدر ڈونلڈ ٹرمپ آگو بیٹھک آ کشمیر اۓ مسلہ آپا ثالثی کھنغ اۓ مِنت کھُزا آنہی آ ٹرمپ آ منسا دی ۔آنہی آ گوشتا کہ دو ہپتغ سرا ھِند اۓ سر وزیر نریندر مودی آ دی آنہی آ ہمیں مسلہ آ ثالثی کھنغ آپا گوشتغۓ سا مگن ھِند آ ہمیں ٹؤک اۓ تردید کھُزا کہ سر وزیر نریندر مودی آ اینگے ھِچھ ٹؤک نہ کھُزغۓ سا۔ھِند اۓ سرکار اۓ ڈن اۓ نمائیندگ رویش کمار آ گوشتا کہ ھِند اۓ سرا آژ اے موقف رہسا کہ پاکستان اۓ پھجی آ مسلہ آنر دو نیمغی گپتران آگو حل کھُزی آ برؤ ۔پاکستان اۓ پھجی آ گپتران اۓ شرط اے رہسا کہ سیماں اۓ آں وٹاژ دھشت گردی بند بی،وا امریکہ اۓ ڈیموکریٹک پارٹی اۓ باسک بریڈ شرمین آ ٹرمپ اۓ پیرا چکا حیرانی آ پدھر کھُزا۔شرمین آ ٹویٹ کھُزؤ گوشتا کہ ،ہر ہماں مڑدم ہماں کہ بُرز آسیا آ ڈن اۓ پالیسی اۓ بارو آ چھی اے زانتکاری ایر کھنت،آں زانی کہ کشمیر چکا ھِند سۓ می فریق اۓ ثالثی اۓ حلاپ ایں۔ہر کھسے زانی کہ سروزیر مودی اینگے ٹؤک کھُز نہ کھنت۔ٹرمپ اۓ پیرا پھَرامغ او گُمراہ کھنوخ ایں۔شرمناک دی ایں ،ھِند اے تہ لوٹھی کہ مسلہ کشمیر اۓ حل ہورین گپتران آگو درا بی مگن اے نہ لوٹھی کہ یک وٹا مان پوت رگ جُزی ،سیماں چکا آچ بندی اۓ حلاپ ورزی بی ،پاکستان اۓ سر ڈغار چکا سرگرم دھشت گرد ھِندوستانی آنر کُشاں او دوہمی وٹا کشمیر اۓ مسلہ آ حل کھنغ آپا گپتران دی جُزی پاکستان آ کھدیں دی گپتران آپا وشتر ماحول نہ ٹھائینتھا۔ھِند آ امن آپا گپتران آ دل لوٹھی نہ گِتا،ماحول وشتر بی اغ اۓ امیت بیسا مگن ھِچھ نہ ھِچھ اینگے دپ بیسا کہ ھِند او پاکستان اۓ نیمگا ناوشی گیش بیسا او کشمیر اۓ مسلہ چکا گپتران ہموزا آژ بنِا بیسغۓ سا ہموزا آسر بیسا۔اصل آ پاکستان آر مسلہ کشمیر آ حل کھنغ آپا دل لوٹھی کھمین ایں او آنہی آپا ھِند آ زمہ وار منغ آژ گیش ایں او ہمیں خاطرہ آنہی آ مسلہ کشمیر آ مشکل کھُزؤ ایر کھُزا درگتہ کہ ھِند کشمیر اۓ مسلہ اۓ پھائیدار او مستقل حل لوٹھی ۔آنہی کوشش ایں کہ ہمینگا کہ دیگر ہمسائیگ آنگو آنہی وشتر سیال داری رہسا ہمانگا پاکستان آگو دی بی،ھِچھ مسلہ آنہاں نی نیمگا ناوشی اۓ سبب نوی۔