عمران خان منتگنت: دھشت گردین ڈل پاکستانئ تھا موشکول بوتگنت۔

پاکستانئ سرئ وزیر واجہ عمران خان بہ وتی دورہ وھدہ شہ آمریکہ ای ھبرا منتگنت کہ بہ آوانی مُلکئ تھا گیش شہ ۴۰ دھشت گردئن ڈلانئ نیٹ ورک کار کرت۔ شہ عمران خانی دیما، گڈین نواز شریفئ حکومت تہ ۱۵ سالئ وھدہ ای ھبرا شہ آمریکہ دیما چیر کرتگیت، تہ ای جا کہ آوان شہ ای ھبرا ھم سی اتنت کہ بہپاکستانئ ایبٹ آباد تھا اوساکہ بن لادن چیر انت۔ بری بھرا عمران خان شہ وتی حکومتئ گام گرگان بہ دھشت گردیی حلاپا یات کرتنت، و ای دعوا کرتنت کہ عمران خانی حکومت ای معلوماتانا بہ دھشت گردیی باروا گون آمریکہ شریک کنت۔ مگہ آوانی ای بیان نشان دیوک انت کہ اعتراف گناہ بدتر شہ گناہ انت۔ پہ چہ کہگون وتی ای اعتراف آ عمران خان کوشست کرتگیت کہ پوج آ ھم برکینیت و نواز شریفی گڈین حکومت سرا مُچین ذمہ پرینیت۔ ای ھبرئ تھا ایچ وڑئ شکئ نہ انت کہ نواز شریفئ حکومت ھم بہ دھشت گردیئ حلاپا گجام مزنئن گام نہ زورتگیت مگہ اصلین ھبر ایش انت کہ پاکستانئ ایچ گجام گیچئن بوتگین حکومت ایچوھدہ بری بھرا گجام مزنئن و شرّین کارئ نہ کرتگنت۔

ایشی اصلین وج ایش انت کہ پاکستانئ تھا دھشت گردیی نیٹ ورک پاکستانئ پوجئ اشارہ چیرا انت و آی حکمت عملئ یک کوتئ انت۔ ھیش گجام جمھورین حکومتئ ای جرات آ نہ داریت کہ بری ھرا گون پوج آ وتی بستگیانا خراب کنت و آی دیما اوشتیت۔ عمران خانی سرا پوجئ احسان بیدئ ایشی ھم درا انت۔ شہ ھمیوجا دھشت گردیئ دیمرئی دیگئ ذمہ آوان نواز شریفئ گڈین حکومتئ سرا پرینتگنت و گون ای کارا نہ تھانکا وترا پاک و ساپ نشان داتگنت بلکہ پوجئ حَک آ ھم ادا کنگئ کوشست آ کرتگنت۔ ای گجام چیرین ھبرئ نہ انت کہ پاکستانئ تھا دھشت گردانی نیمہ داری و آوانی تعلیم دیگ و سیمسرئ آ نیمگا دیم داتنئ تھا پوجاصلین و کلیدین کوتئ داریت۔ پہ عمران خان باید انت کہ ای ھبر یک وارئ یات بیت کہ نواز شریف بہ وتی اقتدارئ دورہ تھا دھشت گردئن ڈلانی نیٹ ورکئ ھبرا تسلیم بوت و بری بھرا پوجئ سرا ھم ناونک آ برز کرت، و آ وعدہ عمران خانی حکومت شہ آی بیانا سَکین وڑئ بدگشی کرتتنت و آوانی بیانا نہ منتنت۔

مروچی اگہ عمران خان وت ای کارا کننت ای بری معنا نہ انت کہ آ وت بہ دھشت گردیئ دیمرئی مسئلہ تھا پاک و ساپ انت۔ بلکہ اصلین ھبر ایش انت کہ آ نون بہ عالمین فشارئ چیرا انت و شہ مجبوری آ ای ھبرا دنت و اعتراف کنت مگہ بہ ایشی تھا ھم آ چالانکئ کرتگیت و وتی حکومت و پوج آ بی گناہ نشان دیگئکوشست آ کرتگیت وھدہ کہ بیدئ پوجئ مدد و نیمہ داری آ دھشت گردئن ڈل ھیچ وڑئ وتی موشکولیانا رادگ ساتتگ نہ کننت۔ عمران خان یا پاکستانئ ھر ذموارئ بہ دھشت گردئن ڈلانی حلاپا اَکین کاروائی کنگئ بھرا خواہ بہ ھر کچانہ دعوا کنت مگہ عالمین براسداری پاکستانئ قول و فعل تضاد آ شرّین وڑئ سرپھدبوتگیت۔ آمریکہ و پورہ ئن عالم شہ ای ھبرا شرّین وڑئ سی انت کہ ای ھبرئ کہ آی اعتراف آ عمران خان کرتگنت نون آوانی مجبوری بوتگیت۔ حافظ سعید یا دیگہ دھشت گردانی حلاپا کاروائی ھم پاکستانئ مجبوری بوتہ، و ای کاروائیانا تسر نہ کرتنئ پھد گڈی آ پاکستان شہ عالمین براسدارئ نیمگا تحریم بیگئ راز آمتحمل بوتگ کنت۔ مگہ عمران خان کہ ھر وھدہ کوشست کنت عالمی چمانی تھا ھاک پاش دنت ای ھبرا باید انت کہ سرپھد بیت کہ بری مسئلہ بھرا آ دنیا گمراہ کرتگ نہ کنت و آی کم واکین صفائی و تشریحات عالمین براسداری آ مطمئن کرتگ نہ کننت۔

پاکستانئ پوج تہ نون ھما دھشت گردین درختئ را کہ آپ داتنت باید انت کہ آی را شہ بن و ریشگا سیندنت و دور پریننت و بہ دھشت گردیئ حلاپا سَکین کاروائی کننت اگہ ای راز مہ کنت پاکستان باید انت کہ مزنئن کیمتئ را ادا کنت۔ نون دنیا لوٹوک انت کہ بہ دھشت گردیئ حلاپا فیصلہ کنوک ئن وڑئ لڑگا بیت۔پاکستانئ ھم پلّین مُلک خاسین وڑئ ھندوستان ھم چمبراہ انت کہ پاکستان بہ دھشت گردیئ حلاپا چی وڑئ گام زوریت کہ شہ آوانی دیما وتی بستگیانا گون پاکستان گیتیر کرتگ کننت۔