عمران خان یک حکیکتئ را منتگنت و یکئ دیگہ را وتی حیالا نیاورتگنت۔

حالانکہ پاکستانئ حکمران چُنتی وھدان بہ چُنتی رازان ای ھبرا درا کرتگنت و اعتراف کرتگنت کہ پاکستانئ تھا سلیح بندین دھشت گردئن ڈل موشکول انت مگہ ای اولی وار ای راز بوتہ کہ گیچئن بوتگین سرئ وزیرئ آمریکہ سرڈگارئسرا بہ یک تھنک ٹینک دیوانئ تھا درائین وڑئ ای ھبرئ اعتراف آ کرتگنت کہ نون ھم پاکستانئ تھا ۳۰ تہ ۴۰ ھزار دھشت گردئن ڈل موشکول انت کہ پہ آوان پہ اوگانستان و کشمیرئ بھرا تعلیم داتگ بوتہ۔ 

مگہ عمران خان مُچین ذمہ بہ وتی گئوستگین حکومتئ گوٹا پرینتگیت و گشتگیت کہ آ حکومت سرئ ایشی کہ کومین ایکشن پلان آ جور کرتگیت مگہ بہ آی سرا عمل نہ کرتگیت و ای ڈلانا گیر مسلح کنگئ کوشست آ نہ کرت۔ اولی ھبر ایشانت کہ ای ڈلانا سلیحبند کنگ و رودینگئ ذمہ پورہ ئن وڑئ پاکستانئ پوجئ سرا عائد بیت، پہ چہ کہ آ پاکستانئ ڈنئ کارانی پالسئ کنٹرل آ پورہ ئن وڑئ وتی دستا گپتگیت و ڈنئ کارانی پالسئ یک جیتا نبوگین کوتئ دشمنی گون ھندوستانانت۔ 

و بہ امیشی سیائگا سلیحبندئن دھشت گردین ڈل بہ پاکستانئ تھا شہ پاکستان آ ناوشنود بوتنت و بہ پاکستانئ تھا ھم دھشت گردین ھلگرانی تسر کنگا بناہ کرتنت و پاکسانئ پوج رندا آوانی درجہ بندی کنگا بناہ کرت۔ ھما ڈلئ کہ پاکستان واوگانستانئ تھا ھلگر کرتنت آ بہ جوانین دھشت گردین ڈلانئ لسٹ تھا اتنت و ھما دھشت گردین ڈلئ کہ بہ پاکستانئ تھا ھلگر کرتنت و پوجین اسٹبلشمنٹ آ نشان گپتنت آوانا بہ خرابین دھشت گردین ڈلانی لسٹ تھا پرینتنت۔ تحریک طالبان،پنجابی طالب و آوانی نیمہ دار و کمکار ھم بہ ھمی دھشت گردین ڈلانی لسٹ تھا اتنت۔ بیدئ ایشان پاکستانئ تھا دیگہ دھشت گردین ڈل ھم استنت کہ تشدد آ دیمرئی دینت و شیعہ، احمدی و دیگہ کومانی مردمانا نشان گرنت۔

بہ نونین روچان یک بریلوی مسلکئ یک ڈلئ بہ تحریک لبیک پاکستانئ ناما ھم موشکول انت۔ پاکستانئ بھانت بھانت انتھاپسندانی یک مینابازارئ انت۔ شہ ایشان چُنتی ڈل انچین انت کہ شہ بین الاکوامین کونسلئ نیمگا دھشت گردانی نام داتگبوتگنت۔ 

شہ ھمی وجا کہ انچین ڈلانی فنڈنگ و پول شودیی اوشتارینگئ بھرا پاکستان ھیچ وڑئ شرّین گام نہ زورتگیت شہ ایف آ ٹی ایف دپترئ نیمگا ھم پہ آی سَکین وارننگ داتگ بوتہ۔ ای وارننگ داتگ بوتہ کہ دیم شہ اکتبر آ اگہ ای دھشتگردین ڈلانی پول شودیئ و فنڈنگ اوشتارینتگ مہ بنت پاکستانئ نام بہ سیائن لسٹ تھا پرینتگ بیت۔ حاف سعیدیی گرفتاری وج ھم ای بوتگ کنت کہ بہ زوترین وھدہ شہ ایف آ ٹی ایف اعتاب آ پاکستان آ رکینتگ کننت مگہ رندا شہ عمرانخانی ای ھبران کہ نون ھم بہ پاکستانئ تھا ۳۰ تہ ۴۰ ھزار دھشت گردین ڈل موشکول انت پہ ایف آ ٹی ایف وھدہ داتگ بوتہ کہ آ تول و ترازو کنت کہ عمران خانی ای اعترافئ بھرا چی پکر کنت۔ پہ چہ کہ پاکستان ھیچ وھدہ پہ ایف آ ٹیایف نہ گشتگیت کہ نون ھم پاکستانئ تھا بہ انچین برزین کچانہ دھشت گرد موجود انت۔ عمران خان بہ وتی گئوستگین حکومتانی سرا الزام جتگیت کہ آوان پہ ای دھشت گردانی گار کنگا ھیچ کوشست ھم نہ کرتگنت۔ 

ای دیرینہ ئن ھبرئ نہ انت بہ ۲۰۱۶ سالا نواز شریف حکومتئ سروکین باسک و پوجین ٹولہ سربراہ و دیگہ پوجین اپسرانی نیاما ھما دیوانئ کہ بستگین دروازگانی پھدا تسر بوت بہ آی تا سیویلین حکومت پہ پوجین حکامان گشتت کہ آلوٹوک انت کہ بہ سلیحبندین دھشت گردین ڈلانی حلاپا کاروائی کننت مگہ پوج رندا شہ ای ھبرا طوفانئ پھاد کرت۔ و بہ نواز شریف حلاپا منصوبہ بندین وڑئ راز رازئ کاروائی تسر بوتنت کہ بہ آوانی پھد گڈی آ نواز شریف مجبور بوتکہ شہ وتی پیما یک نیمگ بیت۔ پہ چہ کہ ڈان نیوز بری کلوزڈ ڈور میٹنگ باروا رپوٹئ لیکتت بہ آی حلاپا و آی ھال دیوکانی حلاپا ھم پوج کریک ڈاون کرت۔ 

عمران خان نون اعتراف کرتگیت کہ دھشت گردئن ڈل بہ پاکستانئ تا استنت و آی حکومت بہ آوانی حلاپا کاروائی کنت نون ما سرپھد بوتگ کننت کہ شہ پوجئ نیمگا پہ آی شاید اجازت داتگ بوتہ، پہ چہ کہ شہ دوکینانی نیمگا نون ھمی تاثرداتگ بیت کہ دوکین بہ یک پکر و حیالا انت۔ عالمین براسدارئ چم بہ پاکستانئ سرا سَک انت۔ و بیدئ ایف آ ٹیف آ پھد بہ پھدین سَکین فشار آ دھشت گردانی حلاپا کاروائی ممکن نہ انت۔