سرگال : رندا شہ عمران خان دورہ آمریکہ پاکستانئ اکتسادین مددانا پھدا بناہ کرت۔

بہ عمران خانی دورہ مکسد و لوٹگان شہ آمریکہ دیم شہ ایشی ھم ھبر و قیاس بوت مگہ شہ آمریکہ نیمگا پہ پاکستانئ ۶ اف - ۱ جھازانی ٹکنکل سپورٹ ناما اکتسادین مددانئ پہ دوارگین بناہ بیگئ جارا رندا ای ھبر درا بوت کہواجہ ٹرامپ پالسی بہ پاکستانئ بھرا بدل بوتگنت۔ بہ گئوستگین سالئ اول سرا آمریکہ جمھورین سدر واجہ ڈونالڈ ٹرامپ انتظامیہ بہ پاکستانئ دیما سَکین مواقف اختیار کرت و گشت کہ پاکستان بہ دھشت گردیئ حلاپا جنگکنگئ ناما شہ آمریکہ چُنتی کروڑ ڈالر زر گپتگیت و بہ آی پسوئ آ بیدئ دروگ و درم آ پہ آمریکہ ھیچ چیزئ دیگہ نہ داتگیت۔

ھور گون ای سَکین بیانا آ ھمی وڑا ھما پوجین مددا کہ پہ پاکستان دات آی را ھم بند کرت۔ ای جار وھدہ جتگ بوت کہ پاکستان دیم شہ آی ھم بہ سَکین اکتسادین بحران تھا گیر منتت۔ اکتساد گون سَکیان دیم پہ دیم ات و توازنادائیگی صورتحال ھم گون سَکیان دیم پہ دیم ات۔ مگہ عالمین براسداری ای ھبرا سرپھد بوتگیت کہ جمھورین سدر واجہ ڈونالڈ ٹرامپ ھر وھدہ شہ وتی مواقفان یک نیمگ بوتگ کننت و یو ٹرن گپتگ کننت و بہ آوانی گامگرگانی باروا ھیچ دیم گشی کرتگ نہ بیت۔ ھمی راز بہ اوگانستانئ بھرا ھم آوان فیصلہ کرتنت کہ آوان وتی گڈین مواقف آ بہ اوگانستانئ بھرا شموشنت و وتی پوجیانا شہ آ مُلکا برگردینیت۔ ای فیصلہ پھدا چی وڑئ پھد گڈی بہدیما کائینت بہ ایشی سرا بازین غورئ نہ کرتگیت و شہ ھمی وجا طالبانی ای شرط آ منتگیت کہ گون آمریکہ راستامین وڑئ گپ و ھبر کنت۔

دیم شہ ایشی آمریکہ ای ھبرئ سرا سَک ات کہ طالب باید انت کہ گون اوگانستانئ سرکار آ راستامین وڑئ گپ و تران کننت مگہ رندا ای ھبر درا بوت کہ جمھورین سدر ڈونالڈ ٹرامپ پہ گپ و ترانان گون طالبان زلمئ خلیلزاد آ گیچئن و ملازم کرتگنت و گپ و ترانئ سلسلہ بہ دوحہ تھا بناہ بوت۔ درا انت کہ گون طالبان راستامین وڑئ گپ و تران کنگ یک رازئ نہ یک رازئ گون پاکستان بستگی داریت و آمریکہ زرورت داریت کہ پاکستان آ بہبرزین کچانہ بری گپ و ترانانی تھا کوت دنت۔ رندا شہ ایشی کہ ٹرامپئ ہالسی بہ اوگانستانئ بھرا بدل بوت راہ پہ گپ و ترانا گون پاکستان ساپ بوت۔ ای راز عمران خانی آمریکہ دورہ دو نیمگ درائین وڑئ درا بوتنت۔ یکئایش کہ آمریکہ و پاکستانئ نیاما گیتیرین بستگیانی امکانات چما کائینت، یکئ دیگہ ایش کہ رندا شہ آمریکائین مددئ پہ دوارگین بناہ بیگا پہ عمران خانی حکومت آ اگہ بازین مددئ مہ بیت مگہ بہ زوترین وھدہ کمئ مدد بیت وپاکستانئ اکتسادین سَکی بھوج کمتر بیت۔

پہ چہ کہ یک ھپتگ رندا شہ عمران خانی دورہ شہ آمریکہ، آمریکہ دپاع محکمہ جار جتگیت کہ ۱۲۵ ملین ڈالر کچانہ پاکستانین زر پہ جھاز اف ۱۶ ٹکنکل سپورٹ و لوجیسٹیک سپورٹ بھرا پہ پاکستان مدد داتگ بیت۔ گڈینھپتگا شہ پنٹاگن نیمگا ای ھبر درا بوت کہ رندا شہ آمریکہ لوٹگا ای مددئ پہ دوارگین بناہ کنگئ فیصلہ بوتہ۔ آمریکہ لھتین سروکین اپسر بری بھرا گشتگنت کہ اف ۱۶ سپورٹ پروگرام پہ دوارگین بناہ کنگئ ای معنی نہ انت کہآمریکہ پہ پاکستان پوجین مددانا پہ دوارگ بناہ کنت۔ ھور گون ایشی ای ھبرئ امکان ھم نہ انت کہ بہ جنورئ ۲۰۱۸ ھمی سیکورٹین مددئ اوشتارینگئ جارا کہ ٹرامپ جتت پہ دوارگ بناہ بیت۔ مگہ لھتین زانتکارین حلقہ بریپکر و حیالا انت کہ عمران خان و سدر ڈونالڈ ٹرامپ بری ھبرئ سرا تپاک کرتگنت کہ اگہ شہ اوگانستان آمریکہ پوجی شرّین و محفوظ ئن وڑئ ڈنا در بنت و بری بھرا پاکستان پہ آمریکہ شرّین وڑئ مدد کنت رندا آمریکہ ھماسالینہ ئن پوجی امداد آ کہ بہ ۱ اعشاریہ ۳ ملین ڈالرئ کچانہ ات آ پہ دوارگ بناہ کنت۔

بہر حال صورتحال ھر چیزئ کہ بیت ای مُچین فیصلہ و ھبر بہ پاکستان و آمریکہ مربوط بنت و بہ آیوکین وھدہ چی بیت و چی نہ بیت ایشی را دوکین نیمگ زاننت مگہ تہ جائ کہ پاکستانئ بنیادین رویہ ھبر انت ھندوستان نونھم بری خوش فھمی آ نہ انت کہ بہ دھشت گردیئ حلاپا پاکستان پہ راستی شرّین گام زوریت۔ ٹرامپ انتظامیہ درائین وڑئ بازین ھبرئ داتت مگہ بہ نوکین صورتحالئ پس منظر آ چی بیت، بہ ایشی بھرا تھانکا قیاس کرتگکننت۔