سرگال:روس،ھِند او چین اۓ نیمگا سہ فریقی گپتران

جاپان اۓ شہر اوساکا آ گروہ ۲۰ اۓ سروک آنی بیٹھک آژ جتائی آگو سر وزیر نریندر مودی آ چین اۓ صدر شی جن پنگ او روس اۓ صدر ولدیمیرپوتن آگو سہ فریقی گپتران اۓ مزمانی کھُزا۔ہمیں گپتران آژ اٹکل جھنغ بیس بی کہ عالمی براسی آ ھِند اۓ چھیختر اہمیت ایں۔ہڑ دوایں مُلک یعنی چین او روس امریکہ اۓ زور اۓ وجہ آژ ھِند آ وتی وٹا کھنغ اۓ کوشش کھنغاں۔امریکہ آ روس چکا معاشی پابندی جھزؤ ایر کھُزغاں درگتہ کہ چین اۓ پھجی آ محصول اۓ ناوشی ایں۔چوش کہ ہمیں حالت آنر دیستؤ ہڑسـیں مُلک آں آپس آ گپتران کھُزا گُڈا دی بین الاقوامی نظام آ برقرار ایر کھنغ آ دی ہمیں مُلک آں وتی مفاد آں ۔ہمیں ہڑ سۓ مُلک آنی ڈن اۓ وزیر آنی بیٹھک ۲۰۰۳ آژ بروبر بی آناں پھیزاغاں او آنہاں نی اولی ایں سروک آنی بیٹھک ۲۰۰۶ آ بیسغۓ سا۔ہماں وخت چین اۓ ہماں وخت اۓ صدر ہوجنتاؤ ،روس اۓ صدر ولادیمیر پوتن او ھِند اۓ آں وخت اۓ سروزیر داغدار من موہن سنگھ آ روس اۓ شہر پیٹرس برگ آ گروہ ہشت مُلک آنی سروک آنی بیٹھک اۓ آسر بی اغ آ بیٹھک کھُزغۓ سا۔ہمیں ہڑ سۓ سروک آنی نیمگا نی ایں گپتران پدھر کھنت کہ ہڑ سۓ آنی نیمگا گپتران نوخین سطح چکا پُجھسا۔اُمیت ایں ہمیں سۓ اوں سروک ہمیں سال ستمبر آ روس اۓ شہر ولاڈی ووسٹک آ ایسترن اکونامک فورم اۓ موقع چکا پدوارغ بیٹھک کھناں۔مُلکی صنعت آنر ڈن اۓ مال چکا محاپظت دۓ اغ اۓ ویچار او یک وٹی ایں پالیسی آ نی چھڑوئی آ جہانی معاشی ترقی او بُڑزا بیسغیں بازار چکا منفی اثر ماکھُزا بلکہ ترقی پزیر مُلک آنی چکا دی آنہی اثر بیسا ۔ہمیں یک وٹی ایں پالیسی اۓ وجہ آژ ہمیں ہڑسۓ مُلک آنی نیمگا گپتران لازمی اسا۔ہمیں بیٹھک آنی یک اہمیت اے دی ایں کہ آنہی آژ ہمیں سروک آنر یک دوہمی آر پوہ بی اغ او وتی سیال داری آ وشتر کھنغ اۓ موقع ملی۔اِشی پھجی آ ہمیں بیٹھک آپسی ایں مفاد والا نپ او کھٹ اۓ مسلہ آنی چکا دی داس گپت اۓ موقع دا۔اوساکا آ بی اغ والا ایں گپتران آ ہماں ٹِک آنی چکا داس گپت بیسا آنہی آ عالمی دہشت گردی ،ہڑ سۓ آنی نیمگا گیش بیسغیں سؤداگری سیال داری ،آف او گواس آ بدلاؤ او دیگر خاصیں بین الاقوامی مسلہ اوار آں۔چین اۓ ویچار آگو اگر گِندوں تہ ہمیں سہ فریقی بیٹھک آژ یوریسیا اۓ اہمیت گیش بی درگتہ کہ آنہی اۓ دو وٹی ایں سیال داری چکا دی مثبت اثر بی۔چین اۓ نائیب ڈن اۓ وزیر آ گوشتا کہ ھِند او روس اۓ پھجی آ آنہی مُلک اۓ سیال داری باز وشتر بی غیں۔روس اۓ ویچار آنی روگا ہمیں ہڑ سۓ مُلک آنی ٹلہ ماسکو آپا باز اہم ایں پھرچھے کہ چین آ آنہی آ مُچھیں محاذ آنی چکا پھدا اِلسا۔ہمیں خاطرہ عالمی سیاست آ وتی رسوخ قائیم ایر کھنغ آپا آنہی آ ہمیں گروہ آ برقرار رہغ ضروری ایں۔ھِند ہمیں غیر واضع عالمی نظام آ یک اینگے طاغت بیسؤ بُڑزا بی غیں ہماں کہ ہمیں نظام آ توازن پیدا کھنغ اۓ صلاحیت ایر کھنت ہمیں خاطرہ روس او چین ہڑ دوایں لوٹھاں کہ عالمی سیاست آ ھِند امریکہ آژ آزاد بیسؤ کار کھنت۔