سرگال:دہشت گردی اۓ حلاپ پاکستان اۓ مصنوعی کاروائی

پاکستان آ اے ہپتغ لشکر طیبہ او جماعتالدعوی اۓ یک درجن نفر آنی حلاپ انسداد دھشت گردی قانون اۓ روگا ایف آئی آر درج کھُزی آ شُزا۔ہمیں دوازد مڑدم آنی اندرا ۲۶/۱۱ ھِلگر اۓ ماستر مائینڈ حافظ سعید دی اوار ایں۔ہمیں مُچھیں مڑدم آنی چکا دھشت گردی اۓ مالیاتی واہرایئی کھنغ اۓ ڈوہ ایں۔ہماں دیگر مڑدم آنی حلاپ ایف آئی آر درج کھُزی آ شُزا آنہی آ سعید اۓ راست دست عبدالرحمن مگی،ملک ظفر اقبال،امیر حمزہ،محمد یحیی عزیز او محسن بلال اۓ نام اوار آں۔ہمیں مڑدم آنی چکا الزام ایں کہ آنہاں جماعت الدعوہ او فلاح انسانیت فاؤنڈیشن ٹرسٹ آپا جوڑ کھُزی ایں زر آنژ دھشت گردی اۓ مدد کھُزا۔ہمیں مُچھیں مڑدم آنی حلاپ ایف آئی آر پنجاب سرکار اۓ انسداد دہشت گردی محکمہ اۓ وٹاژ درج کھنائینتھی آ شُزغاں ہمائی آ تفصیل اۓ پٹ او پھول آ پھدا کَل کھپتا کہ اے مڑدم پنچ دیگر ٹرسٹ آنی زریعہ آگو دھشت گرد آنی مالی واہریائی کھنغۓ ساں ۔ہمیں مُچھیں تنظیم آں ود او ترقی اۓ کار اۓ نام چکا باز ماڑی او زر جوڑ کھُزغاں۔چوش کہ ہمیں دہشت گرد آنی حلاپ کاروائی اۓ وشادگی کھُزی آ رؤ گُدا دی ہمیں بارو آ چُنتی سوال ضرور پیدا بی آں ۔حافظ سعید او آنہی فلاحی تنظیم اے کار کم چہ کم سۓ دہائی آنژ کھنانا پھیزاغیں تہ گُڈا آنہی آ نی پھرچھے منسی آ شُزا؟چھے ہمیں اصلیت اۓ کَل جھنغ آپا پاکستان آ اصل آ ہمیختر مزن ایں مُدت اۓ ضرورت اسا؟منسی آ دی برؤ کہ ہمیں دھشت گرد آنی حلاپ کاروائی آ پاکستان سنجیدہ ایں تہ گُڈا پاکستان اۓ سرکار آ اینگے کاروائی کھنغ آ ہمیختر دیر پھرچھے کھُزا؟ہمیں مُچھیں سوال آنی جواب بالکل پدھر آں۔دوہمی مُلک آنی اندرا ھِلگر کھنائینغ آپا پاکستان آ ہمیں دھشت گرد تنظیم آنر وتی استریتجک جائیداد پوہ بیسا۔اصل آ پاکستان اۓ پیسر اۓ صدر جنرل پرویز مشرف آ وا منسغۓ سا کہ ہمیں مُچھیں دھشت گرد آنر پاکستان آ ہی پیدا کھُزا ہمائی آ کہ آں یک خاصیں جائیداد اۓ وڑا پالغیں۔پاکستان ہمیں دھشت گرد آنر کشمیر او ھِند اۓ دیگر بہر آ ھِلگر کھنائینغ آپا استعمال کھناناں پھیزاغیں۔اگر اسلام آباد ہمیں بارو آ لا علمی پدھر کھنغیں تہ اے چھڑوئی آ وتی ردین عمل آنر لکینغ آپا ایں ۔پاکستان اصل آ اے وخت باز مزنیں سنجیدہ حالت آنر دیما کھنغیں ۔اندری او دری ہڑ دوایں محاذ چکا آنہی آ پریشانی دیما آں۔فنانشل ایکشن ٹاسک فورس اۓ وٹاژ دی آنہی چکا باز زور ایں۔اگر آں دھشت گردی اۓ مالی واہریائی کھنغ والا آنی حلاپ سخت ایں کاروائی نہ کھنت تہ آنہی آ بلیک لسٹ آ اوار کھنغ بیس بی۔ہمیں بارو آ آنہی آ سرا دی ہَکل داسی آ شُزا۔اوساکا آ جی ۲۰ سروک آنی بیٹھک آ پاکستان چکا اے ٹؤک پدھر کھُزی آ شُزغۓ سا کہ اگر آنہی آ دھشت گردی اۓ حلاپ کاروائی نہ کھُزا تہ آؤخیں روش آنی اندرا آنہی اۓ ھِچھ دی مدد نہ کھُزی آ رؤ۔داخلی ایں ڈؤل چکا آنہی آ معاشی بحران دیما ایں۔اسلام آباد آ دھشت گردی اۓ حلاپ کھدیں دی ھِچھ سنجیدہ کاروائی نہ کھُزا مگن شے دھکی ہماں کہ کاروائی کھُزی آ شُزا آنہی خاصین ٹؤک اش انت کہ آنہی آپا سول انتظامیہ او پؤج آ مِلسؤ فیصلہ گِتغۓ سا۔اگر اینگا نویس تہ ہمیں دھشت گرد آنی حلاپ کاروائی کھنغ باز مشکل اسا۔نی مُچھیں جہان اُمیت کھنغیں کہ پاکستان مُچھیں ایمان آگو دھشت گرد او آنہاں نی تنظیم آنی حلاپ کاروائی کھنت۔اے نہ چھڑوئی آ پاکستان اۓ مفاد آپا ایں بلکہ امن عالم اۓ مفاد آپا دی۔ھِند اۓ گُشغ ایں کہ پاکستان آر دھشت گرد ٹلہ آنی حلاپ اینگے کاروائی کھنغی بی ہماں کہ باور اۓ لائیق بی او ہمائی آ بار بار بدل کھنغ نویس بی۔