سرگال:پاکستان آ سنسرشپ اۓ تھُڑس

عمران خان آ سروزیر اۓ کھُرسی چکا نِشتؤ یک سال گوستا۔بُنگیج آ تہ آنہی آ نعرہ جھزا کہ یک نوخیں پاکستان وجود آ آئیغ والا ایں ہمائی آ موک خوری آپا ھِچھ جاگاہ نوی او اقتصادی حالت آنر وشتر کھنغ آپا شَر ایں او سخت گام زُڑتھی آ رواں۔گچین کاری آژ سرا تہ آنہی آ اے دعوی دی کھُزغۓ سا کہ ھِچھ عالمی مالیاتی ادارہ آگو کاسہ گدائی بَرغ اۓ مقابلہ آں وضہار کُشغ پسند کھنت۔مگن اصلیت اِش انت کہ شش بلین ڈالر آپا آنہی آ کاسہ گدائی زُڑتھؤ بین الاقوامی مالیاتی فنڈ تکا روغی ہی بیسا او ہمیں پیکیج اۓ بارو آ ڈیل طۓ دی بیسا حیر سیاستزانتکار آنی ہمیں وڑ اۓ کلابازی کھاۓ روش مشاہدہ آ بی۔ایزا ٹؤک جمہوریت اۓ غیں ۔آں جمہوریت آ باز شفاف اصول آنی چکا جُزینغ اۓ دعوی دی کھنغۓ سا او اے گُشاناں نہ متغاں کہ تحریک انصاف پارٹی اۓ سرکار آ ہر یک اۓ پھجی آ انصاف بی او پریس ہر ڈؤل اۓ زور آژ آزات بی۔چوش کہ گچین کاری اۓ زمانہ آژ دی ہر وٹاژ اے آواز کھڑو بی غۓ ساں کہ پریس او الیکترانک میڈیا چکا پؤج او ایجنسی آنی باز زور ایں کہ آں گچین کاری اۓ بارو آ رپورٹنگ ایجنسی آنی مرضی اۓ روگا کھناں۔پؤج او ایجنسی آں یک وڑ اۓ تھُڑس اۓ ماحول پیدا کھُزغۓ سا او ہیومن رائیٹس کمیشن آ آنہی اۓ سخت نوٹس دی گِتغۓ سا۔بہرحال نی درگتہ کہ عمران سرکار آ سروکی آ آئیغ آ یک سال بی اغ والا ایں گُڈا دی حوال کار تھُڑس آ زِند گوازینغاں۔اینگا مان کھاۓ کہ مارشل لاء لاگو کھنغ آ بغیر ہی اخبار او ٹی وی چینل آنی چکا سنسرشپ لاگو کھُزی آ شُزا آنہی نی ایں مثال اش انت کہ گوستی ایں دو شمبھے آ پرائیوٹ چینل جیو ٹی وی آژ ہشت بجہ شف آ پیسر اۓ صدر پاکستان او پاکستان پیلپلز پارٹی اۓ شریک چئیر مین آصف زرداری اۓ انٹرویو نشر بی اغ والا اسا۔اے انٹرویو گوستی ایں شمبھے آ پارلیمان ہاؤس آ مشہور حوال کار او جیو ٹی وی اۓ اینکر حامد میر آ گِتغۓ سا۔انترویو مقرر وخت چکا بِنا دی بیسا مگن چند دمان پھدا انترویو آ داشتی آ شُزا۔اصل آ چینل چکا زور ماکھُزؤ نشریہ آ داشتی آ شُزا۔بہر حال سرکار اۓ دپاع کھُزؤ یک وفاقی وزیر علی حیدر زیدی آ گوشتا کہ ما اینگے ڈوہی آنی انترویو تھانگا نشر کھُز کھنوں ہماں کہ مالی گھپلہ آنی دوہ آ دستگیر کھُزی آ شُزغاں؟مگن آزات زانتکار او اپوزیشن لیڈر آنی گُشغ ایں کہ چھڑوئی آ الزام او دستگیری اۓ بُنشت چکا کھسے آر ڈوہی منغ نویس بی درگتہ کہ زرداری اۓ حلاپ نی تکا ھِچھ ڈوہ ثابت نویسا او نہ ہی سزا ۔وا زرداری اۓ انترویو کھنغ والا ممتاز حوال کار حامد میر اۓ گُشغ ایں کہ ہماں روش زرداری رسمی ایں اجازت نامہ گِتؤ پارلیمان اۓ اجلاس آ بہر گرغ آپا آتکغۓ سا او آنہی آ چُنتی دیگر حوال کار آنگو دی ٹؤک کھزغۓ سا مگن آنہی آ جیو ٹی وی آپا جتا آژ یک انترویو دی داسغۓ سا ۔واجہ حامد میر اۓ روگا انترویو آ دارغ اۓ یک وجہ اے بیس بی کہ زرداری آ آنہی آ اے گُمان پدھر کھُزغۓ سا کہ برطانیہ آ سروزیر عمران خان اۓ حلاپ ھِچھ گھپلہ اۓ پٹ او پھول جُزغیں۔پاکستان اۓ باز سیاسی زانتکار آنی ہمیں ویچار ایں کہ اے وخت سیویلین سرکار اۓ آڑ آ ہمیں وڑ اۓ مُچھیں فیصلہ پؤج او ایجنسی کھنغاں۔