سرگال:دھشت گرد ٹلہ آنی حلاپ پاکستان اۓ نی ایں ریاکاری گام گیج آنی نوخیں مثال

گوستی ایں چھیار شمبھے اۓ روش پاکستان اۓ حاکم آنی وٹاژ اے جار جھزی آ شُزا کہ ممبئی اۓ ماستر مائینڈ حافظ سعید او آنہی چھی اے سنگت آنی حلاپ گام زُڑتھی آ رؤغیں۔اصل آ ہماں گام گیج کھنغ اۓ دعوی کھُزی آ رؤغاں ،آنہی بنیاتی مقصد عالمی براسی اۓ چھم آنی اندرا ریخ ماکھنغ گیش ایں او اصل آ کاروائی کھنغ کھمین ایں۔پاکستان اۓ انسداد دہشت گردی محکمہ آ اے وضاحت کھُزغۓ سا کہ آنہی آ سعید او آنہی دوازد سنگت آنی حلاپ ۲۳ مسلہ درج کھُزغاں۔اے مڑدم اینگے ٹرسٹ جُزینغاں ہماں کہ لشکر طیبہ آپا فنڈ جوڑ کھناں۔ہمیں متعلقہ محکمہ آ اے دی ڈسسا کہ لشکر طیبہ آگو جُڑسی ایں ،چھڑوئی آ نام اۓ فلاحی ادارہ جماعت الدعوی او فلاح انسانیت فاؤنڈیشن اۓ حلاپ دی کاروائی بی غیں۔اے دی دعوی کھُزی آ شُزا کہ اے گام ہمیں خاطرہ زُڑتھی آ شُزا کہ اقوام متحدہ اۓ فیصلہ آنر منغ بیس بی۔اینگا مان آغیں کہ پاکستان آ احساس بیسا کہ اقوام متحدہ اۓ یک باسک اۓ ڈؤل چکا آنہی فیصلہ او ہدایت آنر آنہی آ منغ لوٹھی ۔مگن چھے اصلیت دی ہمِش ایں؟ممبئی ھِلگر آنی منسوبہ کھنوخ حافظ سعید اۓ حلاپ نی تکا پاکستان آ ہمیختر دی کاروائی کھُزا،آں جہان اۓ دیما ایں۔آں مُچھیں آزاتی آگو پاکستان آ تھرغیں او ھِند اۓ حلاپ او کشمیر او جہاد اۓ نام چکا تیش پیدا کھناناں پھیزاغیں۔پاکستان اۓ حاکم آنی وٹاژ آنہی دستگیری اۓ ڈرامہ کے ای دھکا بیسغاں مگن ہر دھکا آں آسانی آگو عدالت اۓ وٹاژ یَل داسی آ شُزا۔پاکستان اۓ ریاکاری اۓ سجوں آنژ مزن ایں ثبوت ہمِش ایں کہ گوستی ایں یک دھائی آژ ممبئی ھِلگر آ اوار ہماں ڈوہی آنی حلاپ پاکستان آ مقدمہ قایم کھُزی آ شُزغۓ ساں آں یک گام دی اگا نویسغاں۔اگر پاکستان اصل آ سنجیدہ بیس تہ چھے ہمیں مقدمہ اینگا جکھسی آ بیس۔ہموزا تکا حافظ سعید او آنہی سنگت آنی حلاپ کاروائی کھنغ اۓ جار اۓ ٹؤک ایں تہ اے دی چھڑوئی آ پھیدھارغ اۓ کاروائی مان کھاۓ پھرچھے کہ فائینینشل ایکشن ٹاسک فورس آ باز سختی آگو وارننگ داسا کہ آؤخیں اکتوبر تکا دھشت گرد ٹلہ آنی مالیاتی واہریائی کھنغ آ آنہی آ اگر نہ داشتا تہ آنہی آ سَک نتیجہ دیما کھنغی بی آں۔اگر پاکستان آ نی دی روایتی بے حسی آگو کار گِتا تہ آنہی ہمیں غلط فہمی دل آژ کشغی بی کہ سرا آں عالمی براسی آ پھَرامغ آ سوب مند نویس بی۔