سرگال: بین الاکوامین کونسلئ رپوٹ گشیت کہ اوگان گون تروس وتی زندا دیما برنت۔

شہ ای رپوٹ تھا حالاتانی سَکی ھمی وڑا درا و اسپیت بیت کہ ھیچ زرورتئ نہ انت کہ آی وضاحت آ بکننت، اوگانستانئ استمان بہ نونین وھدہ بہ چہ تروس و لرز و نا امیتئ وتی زند آ دیما برنت۔ شہ بین الاکوامین کونسلئ رپوٹانی دیما، تھانکا بہ شش ماہ وھدہ تھا اوگانئن سیکورٹی کارکنوک و طالبانی جنگئ تھا ۳۸۱۲ مردم کشتگ و ٹپی بوتگنت، ھما دم ای ھا رستگیت کہ اوگانستانئ امن گپ و ترانئ وجا آمریکہ خاسین نمایندگ زلمئ خلیلزاد دیم بہ دوحہ رادگ انت کہ گون طالبان آخری و اھمتری دیوانا تسر کننت۔ مگہ ھور گون ای ھبرا ای ھبرئ ھال ھم رستگیت کہ ھرات و قندھارئ سیمانی بنجاہ یکجا کنوکین شاہراہ سرا بہ آب خورمہ سیمان یک بس ترکتگیت و بہآی تھا ۳۵ مردم کشتگ بوتگنت و ۳۰ مردمئ دیگہ سَکین وڑئ ٹپی بوتگنت۔ بہ کربانیانی تھا کسانئن ورنانی اشمار باز بوتہ۔

پولیسئ گوشوک محب اللہ محب دعوی کرتگیت کہ ای بمب آ طالب مان داتگ بوتگنت کہ اوگان و گیرمُلکین پوج آ نشان گپتگ کننت، مگہ طالب انکار کرتگیت و نہ منتگنت کہ آوان بری ھلگرئ تھا گجام کوتئ داشتگنت۔ بہرحال ای دپ دیگ انچین وھدہ دیما آتگیت کہ ای ھبرئ چرچہ بہ برزین کچانہ انت کہ آمریکہ و طالبانی نیاما گپ و تران بہ آخری مرحلہ رستگیت و امیت انت کہ بہ زوترین وھدہ آمریکہ و آی قیادتئ گیرمُلکین پوج شہاوگانستان پہ دوارگ بہ وتی مُلکا برگردنت و ۱۸ سالگین جنگ اوگانستانئ بالاخرہ الاس بیت۔ بہ ایشی پسوئ آ طالب پہ آمریکہ ای ھبرئ یقین آ دینت کہ آوان مدد کننت کہ پر امنئن وڑئ ای گیرمُلکین پوج شہ اوگانستان ڈنا دربنت و اجازت مہ دینت کہ شہ اوگانستانئ سرڈگارا بہ دھشت گردیئ راہ کٹ گپتگ بیت۔ بہر حال گشتگ بوتہ کہ ای ھما گپ و ترانانی مکسد انت۔

یک نیمگا بین الاکوامین کونسل وتی رپوٹا بہ اوگانستانئ تھا ھر روچگین ھلگر و کشگانی باروا جاری کرتگیت کہ شہ آی ای ھبر درا بیت کہ شہ اوگانستانئ سیکورٹئ پوج و گیرمُلکین پوجئ طالبانئ محاذ آرائی وجا بی گناھینگیر پوجی وتی زندا شہ دست دینت و یک نیمگا گپ و ترانئ سلسلہ ھم رادگ انت و ھور گون آی سفارتین موشکولئ ھم رادگ انت کہ پہ اوگانستانئ سَکیان یک پر امنئن حلئ راھئ ودی کرتگ کننت۔ بین الاکوامین کونسلئمددانی مشن بہ اوگانستانئ رپوٹ داتگیت کہ بہ دوکین نیمگانی نیمئ جنگ و ھلگران شھروندانی آباتی ھون ریچی بیت و آ وتی زند ا شہ دست دینت یا کہ ٹپی بنت۔ شہ طالبانی نیمگا ھمی وت کُشین ھلگر کہ تسر بنت یا ترکگکہ تسر بنت بہ آوانی تھا ھم عامین شھروند نشان گپتگ بنت و بہ آوانی پسوئ آ ھما ھلگرئ کہ شہ سیکورٹئ ڈل و پوجئ نیمگا بنت یا ھوائین اسٹرائک بنت بہ آوانی تھا ھم بی گناھین عامین شھروند نشان گپتگ بنت۔

ای سالی شہ اول جنوری تہ ۳۰ جون تاریخا یعنی شش ماہ وھدہ تھا، طالب و داعش ۵۳۱ شھروندانا کشتگنت و ۱۴۳۷ مردمانا ٹپی کرتگنت کہ بری اشمارئ تھا گونڈک و بانوک ھم ھور انت۔ بہ دھشت گردانی دستا ۹۸۵ مردمنشان گپتگ بنت۔ ای ھلگرانا مُچانا زانتگ کرتگنت۔ بہ ای ھلگرانی تھا سرکارین کارکنوک، قبائلین مزن، و کارکنوک و مذھبین اسکالر ھم کشتگ بوتنت۔ شہ رپوٹانی دیما بہ حکومتئ ھلگر و پسوئ ھلگرانی تھا کہ شہ سیکورٹئپوجئ نیمگا تسر بوتگنت ۷۱۷ اوگان کشتگ بوتگنت و ۶۸۰ ٹپی بوتگنت۔ بہ گئوستگین سالئ تھا بہ ھما کچانہ کہ مردم کشتگ بوتتنت بہ آی دیما ای سالی تھا ای اشمار ۳۱ فیسد گیش بوتگیت۔ بہ کشتگ بوتگین مردمانئ تھا،۱۴۴ بانوک بوتگنت و ۳۲۷ گونڈک وھدہ کہ ٹپی بوتگین بانوک و گونڈکانی اشمار بہ یک ھزارئ کچانہ ات۔ بہ ھوائین ھلگرانی تھا کشتگ بوتگین مردمانئ اشمار ۵۱۹ ات کہ شہ آوانی تھا ۱۵۰ گونڈک بوتگنت۔ ای تنازعہ تھاھما مردمئ کہ کوت دارنت ھر گام شہ وت یک دعوی داریت۔

و ھر گجام نیمگ پہ وتی کاروائیانی شرّ نشان دیگا جواز دیما کنت۔ بین الاکوامین کونسل گشتگیت کہ بہ انچین وھدہ آن تھانکا ای ھبر اھمیتئ وڑ نہ انت کہ بین الاکوامین کانون ساتتگ بنت بلکہ بہ انچین حالاتان بی نھایتزروری انت کہ ای ھبر خاسین وڑئ چمئ چیرا گپتگ بیت کہ پہ مردمان گجام ٹپئ مہ رسیت۔ یک ھبرئ دیگہ ھم یات کنگئ وڑ انت کہ ای رپوٹئ کہ بین الاکوامین کونسل دیما کرتگیت گون آمریکہ پوجی گوشوکئ تعینات آ بہبرزین کچانہ توپیر داریت۔ آوان گشتگنت کہ گیرمُلکین پوج پورہ ئن وڑئ کوشست کرتگنت کہ پہ گیرپوجین شھروندان ٹپ رسینتگ مہ بیت۔ سرئ ای متضاد ئن بیان و دعوئ ای ھبر وتی جا راست انت کہ نونین وھدہاوگانستانئ گیشتر شہ نیمئ سیمانی سرا طالبانی کنٹرل انت۔ رندا شہ ایشی کہ واک شہ آوان گپتگ بوت ھیچ وھدہ آوانی حیثیت اینکس باز نہ بوتہ۔ آوانی ھلگر نون ھم رادگ انت و نون معلوم نہ انت کہ رندا شہ معاھدہ گونآمریکہ اوگانستانئ آیوکین منظرنامہ چی بیت۔