سرگال:افغانستان آ صدارتی گچین کاری اۓ موقع چکا مزن ایں ھِلگر اۓ گُمان

۲۸ ستمبر آ افغانستان آ صدارتی گچین کاری بی اغ والا ایں۔اے گچین کاری یک اینگے وخت آ بی اغ والا ایں ہماں وخت امریکہ او طالبان اۓ نیمگا افگانستان آ امن اۓ قیام آپا دوحہ آ بی اغ والا گپتران وتی خاصیں او آخیری ایں مرحلہ چکا پُجھغ والا ایں۔مگن اے ٹؤک پدھر ایں وڑا محسوس کھُزی آ شُزا کہ ہموزا تکا طالبان اۓ سوال ایں تہ ہمیں ٹلہ آ افگانستان آ امن اۓ قیام اۓ حوالہ ھِچھ پکر نعیں ۔آنہی آ اگر ھِچھ پکر ایں تہ اے کہ ھِچھ صورت آ امریکہ اۓ سروکی اۓ بُنا ڈن اۓ مُلکی پؤجی مُچھیں ڈؤل چکا افغانستان آژ گڑداں برواں تاکہ آنہی آپا سروکی چکا قوضہ کھنغ اۓ دگ سدھا بی۔افغانستان آ بہر حال اے وخت یک آئینی ڈؤل چکا گچین سرکار کار کھنغیں مگن طالبان اۓ لیڈر شپ نہ تہ ہمیں ٹؤک آپا راضی بیسا او نہ ہی تشدد اۓ دگ ترک کھُزئی۔امریکہ او طالبان نمائیندگ آنی نیمگا ہمینگا ہمینگا گپتران اگا ودھسا ہمانگا ہمانگا طالبان اۓ ھلگر گیش بیسا ۔ہموزا تکا امریکہ اۓ ٹؤک ایں تہ امریکہ اۓ صدر ڈونلڈ ٹرمپ آ ہماں کہ اچانکی آگو فیصلہ کھنغ او گُڈا اچانکی آگو یو ٹرن گرغ آپا دی مشہور ایں ،سرا تہ افگانستان آپا نوخیں امریکی پالیسی اۓ جار جھزئی۔ہمیں نوخیں پالیسی اۓ خاصین عنصر اے اسا کہ آں پاکستان آ طالبان اۓ سجوں آنژ مزن ایں حامی او واہریا پوہ بی سی آ شُزا او اے گُشت کہ آں طالبان آگو مڑغ آپا امریکہ آژ کروڑو ڈالر زر آنی پؤجی او اقتصادی مدد وصول کھُزا او بدلہ آ امریکہ آژ دروغ گوشتئی او آنہی آ دغا داسئی۔مگن گُڈا اچانکی آگو آنہی ویچار بدل بیسا او آنہی آ افغانستان آژ وتی پؤجی گڑدینتھؤ لوٹھائینغ اۓ پکر لاحق بیسا او دوحہ آ طالبان اۓ خاصیں ایلچی زلمۓ خلیل زاد آ گپتران بِنا کھُزا۔گپتران اۓ کے ای راؤنڈ بیسغاں او نی ہماں سلسلہ وتی آخیری ایں مرحلہ چکا ایں۔دوہمی وٹا افغانستان آ گچین کاری اۓ تیاری بی غاں مگن تشدد اۓ یک اینگے گواس جُزغیں ہماں کہ جکھغ اۓ نام نہ گرغیں ۔مُچھیں آثار اے ڈساں کہ صدارتی گچین کاری آپا ہماں کہ ریلی او جلسہ بی آں آنہانر مزن ایں پھیمانہ چکا تشدد اۓ نشانہ کھزی آ رؤ۔آنہی اشارہ ہماں وخت دی ملسغۓ سا ہماں وخت گوستی ایں ۲۸ جولائی آ نائیب صدر اۓ عہدہ اۓ امیت وار امر اللہ صالح اۓ دپتر چکا ھِلگر بیسا۔ہماں ھلگر آ ۸۰ مڑدم جنجیسغاں او باز ٹھپی بیسغۓ ساں۔طالبان آنی ارادہ ہر کھسے چکا پدھر ایں آں ھِچھ دی حالت اے نہ لوٹھاں کہ افغانستان آ جمہوری ڈؤل چکا او آئین اۓ روگاگچین کاری بی۔