سرگال:ریپوریٹ آ کمی پھرچھے ضروری اسا؟

گوستی ایں چھی اے عرصہ آژ ھِند معیشت اۓ بارو آ ہماں کہ زانتکاری مِلغۓ سا آنہی آژ عوام اۓ پھجی پھجی آ سرکار اۓ دی پِکر کھنغ فطری اسا،خاصیں وڑا ہمیں خاطرہ کہ ہمیں روش آں جُزغ والا ایں مندی اۓ ماحول یک مزن ایں حد تکا ڈن اۓ بدلاؤ آنی نتیجہ ایں ہمائی چکا مۓ ھِچھ اختیار نوی۔ہمیں خاطرہ نی ایں روش آں ریزرو بینک آف آف انڈیا آ وتی ریپوریٹ آ ہماں کہ کمی کھُزا آنہی اۓ یک حد تکا اُمیت اسا۔ریپوریٹ سود اۓ ہماں شرح بی ہمائی چکا ھِچھ مُلک اۓ مرکزی بینک سؤداگری بینک آنر زر اُدھاری چکا دا او ہمیں سؤداگری بینک ہمیں زر آنر قرض جات اۓ دیم آ عوام اۓ وٹا منتقل کھنت۔بہر حال ریزرو بینک آ شے دھکا ریپوریٹ آ ہماں کہ ۳۵ پوائینٹ اۓ کمی کھُزا آنہی اُمیت نیا ،پھرچھے کہ ہمیں شرح آ ۲۵ یا ۵۰ پوائینٹ اۓ کمی کھنغ اۓ رواج رہسا۔مگن ریزرو بینک اۓ روگا ۲۵ پوائینٹ اۓ کمی نی ایں حالت آنی اندرا ناکافی ثابت بیس درگتہ کہ بین الاقوامی حالت آنر دیستؤ او باز ایں دیگر اصلیت آنی روژنائی آ ۵۰ پوائینٹ اۓ کمی چھی اے نقصان دؤخ ثابت بیس بی۔ویچار کھنغ لوٹھی کہ ریپوریٹ آ ۳۵ پوائینٹ اۓ کمی اۓ مطلو صفر اعشاریہ سۓ پنچ پیصد اۓ کمی ایں ہمائی پھدا ریپوریٹ کھمیں بیسؤ پنچ اعشاریہ چھیار پیصد بیسا ہماں کہ گوستی ایں نوہ سال آنی سجوں آنژ کھمیں شرح ایں۔امیت کھُزی آ روغیں کہ ریپوریٹ آ ہمیں کمی آگو مندی اۓ نی ایں وخت آ دیما کھنغ آ آسانی پیدا بی۔ریپوریٹ آ کمی اۓ سبب آژ بینک سود اۓ شرح دی کھمیں بی او بینک آنژ مِلغ والا قرض اڑزاں بی،ہمائی سبب آژ مڑدم لوغ یا لاری یا دیگر ضروری شۓ گِرغ آپا سرا آژ گیش قرض گراں۔گُڈا ہمیں ڈؤل آژ پھائیدار شۓ آنی لوٹھغ گیش بی ہمائی آژ جتا صنعت آ تیزی کھاۓ ۔ہمیں ٹؤک کشت کاری آپا مَلغ والا قرض آنی بارو آ گُشغ بیس بی او کسان طبقہ گیش قرض زیری ہمائی آژ صنعت آ پیداوار گیش بی۔ہمیں وڑا کھُل ملائینتھؤ معیشت کِرا کِرا وتی گوستی ایں حالت اۓ وٹا گڑدی۔جزوخیں مالی سال آپا ملکی او ڈن اۓ شماریاتی ادارہ آ ہماں کہ اٹکل جھزغۓ سا آنہی بنا چکا ھند سرکار آ دی کھُل لوغی ایں پیداوار اۓ ہپت پیصد بی اوخیں شرح آ کھمیں کھُزؤ شش اعشاریہ نوہ پیصد کھُزغۓ سا،چوش کہ باز زانتکار آنی ویچار آ آؤخیں مارچ آ پھدا اے شرح شاید شش اعشاریہ پنچ پیصد ہی نیاہ کھاۓ۔ہماں دی بی ،جزوخیں مندی آ دیستؤ باز گام گیج آنی باز سَک ضرورت اسا او گوستی ایں روش آں ریپوریٹ آ کھُزی ایں کٹوٹی ہمیں گام گیج آنژ یک اسا۔دوہمی خاصیں ٹؤک اش ایں کہ ہماں وخت ریپوریٹ آ کمی بی تہ کسن ایں بچت کار خاص ڈؤل آژ نقصان آ بی آں ہماں ہاں نی بچت چکا مِلغ والا سود اۓ شرح او کھُل مقدار آ دی کمی بی۔آنہی آژ پینشن گتی ایں طبقہ آنی چکا گیش اثر بی ہماں کہ یک مزن ایں حد تکا وتی بچت اۓ زور چکا زند گوازیناں۔