سرگال:کشمیر اۓ بارو آ پاکستان اۓ تیش او ناوشی منفی ویچار آنی عکس

کشمیر اۓ بارو آ ھِند اۓ باز ایں انتظامی او قانونی وڑ اۓ فیصلہ آنی بارو آ پاکستان آ ہماں کہ تیش پدھر کھُزا آں ھِچھ وڑا گو دی آنہی حق آ ھِچھ مثبت نتیجہ درا نہ کھنت بلکہ سفارتی ڈؤل آژ آنہی آ جہانی ایں براسی آ جتا کھنغ اۓ باعث بیس بی۔آنہی آ ھِچھ ویچار کھنغ آ بغیر ھِند ہائی کمشنر آ پاکستان آژ دیم دۓ اغ ،سؤداگری سیال داری آسر کھنغ او ۱۵ اگست آ جموں و کشمیر اۓ عوام آپا چھڑوئی آ نام اۓ ایکا آ پدھر کھنغ اۓ ڈؤل چکا ،یوم سیاہ ،منائینغ اۓ ہماں کہ فیصلہ کھُزا آں سفارتی سیال داری چکا ردین اثر ماکھنت۔ہمیں شدید رد عمل آ انگریزی محاورہ آ نی جرک رد عمل ہی گشغ بیس بی۔ہمیں بارو آ سر وزیر عمران خان اۓ پھجی آ وفاقی وزیر براۓ سائینس او تیکنالوجی فواد چودھری اۓ رد عمل سجوں آنژ گیش اسا۔آں پارلیمان اۓ مشترکہ اجلاس آگو گشتانگ اۓ نیمگا گری اغ بنِا کھُزیش او گوشتیش کہ مارا مِڑغی بی۔آنہاں نی روگا اے مڑائی ھِچھ رسمی مڑائی نوی۔بلکہ واشنگٹن آژ لندن تکا او ریاض آژ تہران تکا مچھیں جہان ہمیں مڑائی اۓ تیزی آ محسوس کھنت۔آنہاں جہانی براسی آر گوشتا کہ جہان آ ہاغ بی اغ لوٹھی او محسوس کھنغ لوٹھی کہ ھِند سرکار آس آگو لیو کھنغ آپا رؤغیں۔حالانکہ پاکستان اۓ سرکار اۓ رد عمل چکا وا پاکستان اۓ باز زانتکار او حوال کار آں حیرانی پدھر کھُزا او گوشتیش کہ پاکستانی لیڈر ھِچھ ویچار کھنغ آ بغیر ٹؤک کھنغیں۔بہر حال پاکستان اۓ لیڈر او حاکم آں وتی ہمیں سلوخ آگو وا وتی ریاکاری آ مُچھیں وڑا بے پردہ کھُزا۔ہماں دفعہ ۳۷۰ آ ہٹائینغ اۓ حلاپ آنہاں مڑائی کھنغ اۓ جار جھزا ہمیں دفعہ اۓ روگا کشمیر آر ہماں کہ خاصیں اختیار ملسغۓ ساں آنہی چکا سرا آژ آںہاں باز چگھ بازی کھُزغۓ سا۔آں جموں کشمیر اۓ وزیر اعلی آر ھِند اۓ پٹھو پوہ بی آں ۔او نی اچانکی آژ آنہانر اے مان آتکا کہ کشمیر اۓ مڑدم آنژ چھی اے چھنسی آ شُزا۔اے ریاکاری نعیں تہ گڈا چھے انت؟شاید ہمیں خاطرہ پاکستان اۓ چُنتی زانتکار آں پاکستان اۓ لیڈر آنی پیرا آنی چکا انگل کھڑو کھُزا۔پاکستان آ اے محسوس کھنغ لوٹھی کہ جموں وکشمیر اۓ بارو آ ھِند سرکار آ ہماں دی فیصلہ کھُزا اے آنہی اۓ وتی جند اۓ مسلہ ایں۔وا پاکستان آ مقبوضہ کشمیر اۓ بارو آ نی تکا ہماں دی چھی اے کھُزا آں باز غیر قانونی رہسا۔کشمیر اۓ ہی یک جاگاہ جال جاگاہ آنی نام آژ پھجھارتھی آ رؤغۓ سا ہمائی آ مہاراجہ آف کشمیر آ کھدیں لیز چکا انگریز آنر داسغۓ سا۔انگریز آنی سرکار آسر بی اغ او برصغیر ھند و پاک اۓ آجو بی اغ آ پھدا آں وا کشمیر اۓ بہر بیسا مگن پاکستان آ کھدیں دی آنہی آ مقبوضہ کشمیر آ اوار نہ کھُزا۔ایزا تکا کہ ہموزا اۓ مزن ایں عدالت آ دی اے فیصلہ کھزغۓ سا کہ آنہی آ کشمیر آ اوار کھنغ لوٹھی مگن پاکستان آ ہمیں فیصلہ آ دی نہ منسا بلکہ ہمیں جاگاہ آنر گلگت ۔ بلتستان اۓ نام داسؤ یک جتا صوبہ کھُزا ہماں کہ قطعی غیر قانونی اسا،دیگر دی چنتی فیصلہ پاکستان آ مقبوضہ کشمیر اۓ بارو آ کھُزغاں ہماں ہانر ھِچھ ڈؤل آگو دی قانونی جواز دۓ اغ نویس بی۔بہر حال اگر پاکستان آ وتی ڈؤل چکا مڑائی بنِا کھُزا تہ شؤق آگو اگا بی۔ھِند وا دی ہمیں امیت کھنغیں کہ آئیغ والا ایں روش آ پاکستان کشمیر اۓ مسلہ آ اقوام متحدہ آ زیری۔ھِند سفارتی ڈؤل چکا پاکستان اۓ یُرش آنر دیما کھنغ اۓ صلاحیت ایر کھنت۔آنہی اٹکل پاکستان آ دی بی برؤ۔