سرگال:امریکہ طالبان گپتران آسر بیسا:منغ نامہ اۓ انتظار

کابل آژ ملغ والا ایں حبر آنی روگا امریکہ او طالبان اۓ نیمگا گوستی ایں سال اۓ بُنگیج آژ افغانستان آ امن اۓ قیام آپا گپتران اۓ ہماں کہ سلسلہ بِنِا بیسغۓ سا آں آخیر آسر بیسا مگن منغ نامہ اۓ بارو آ تنِک ھِچھ وڑ اۓ جار نہ جھزی آ شُزا۔گیر بی کہ ہمیں گپتران اۓ اصل ایں مقصد اے ڈسسی آ شُزغۓ سا کہ امریکہ آ ۲۰۰۱ آ افغانستان آ ہماں کہ مڑائی بنِا کھُزؤ ایر کھُزغۓ سا ،آنہی آ آسر کھنغ آپا آں وتی سروکی والا پؤجی ہموزا آژ گڑدینیتھؤ لوٹھائینی آنہی عیوض آنہی آ طالبان آژ اے گارنٹی درکار ایں کہ آنہی پؤجی آنی چکا ھِلگر نہ کھناں او اے کہ افغانستان اۓ سرڈغار آ دھشت گردی اۓ عمل آنی آپا استعمال بی اغ نہ داسی آ رؤ۔ایسوسی ایٹڈ پریس اۓ یک رپورٹ اۓ روگا گوستی ایں دو شمبھے آ کابل آ طالبان اۓ نمائیندگ آ ڈسسا کہ گپتران اۓ ہشتمی او آخیری ایں دور دوحہ آ آسر بیسا مگن منغ نامہ اۓ تفصیل تنِک دیما نیاتکغاں ۔طالبان اۓ نمائیندگ زبیع اللہ مجاہد اۓ روگا نی دوایں دھُر آنی نمائیندگ وتی وتی سروک آنژ پھول کھناں ۔آنہی آ پھدا ہی ھِچھ اگی ایں گام اۓ بارو آ ھِچھ فیصلہ بی۔حالانکہ گوستی ایں ہپتغ طالبان اۓ یک دوہمی نمائیندگ آ اے گوشتغۓ سا کہ ہشت می دور اۓ گپتران اۓ پھدا امیت ایں کہ منغ نامہ اۓ تفصیل دی دیما کھاۓ برؤ۔بہر حال دوایں وٹا اے اُمیت پدھر کھُزی آ رؤغیں کہ اگر منغ نامہ آ آخیری ایں دیم دۓ غی ایں تہ آنہی آ طالبان اۓ وٹاژ اے باور دیائینتھی آ رؤ کہ افغانستان آؤخین روش آنی اندرا ھِچھ دیگر انتہا پسند ٹلہ اۓ لوغ نوی۔مگن افغانستان اۓ نی ایں ڈغاری اصلیت اش انت کہ داعش او القاعدہ دوایں آنی اتحادی افغانستان آ سرگرم آں او وا طالبان دی نزیخ ہر روش افغانستان آ ھَندے ھَندے آ ھلگر کھنغاں او آنہاں نی نشانہ چکا خاص افغانستان اۓ سیکیورتی فورس اۓ مڑدم او سرکاری اپسر آں۔شہری دی باز مرغاں۔اے دی گوشتی آ رؤغیں کہ ہماں منغ نامہ بی آنہی آ اے ٹؤک دی اوار بیس بی کہ طالبان،افغانستان نمائیندگ آنگو گپتران کھناں حالانکہ اے اصلیت ایں کہ ہمیں ٹلہ آ نی تکا افغانستان اۓ سرکار اۓ نمائیندگ آنگو ھِچھ وڑ اۓ گپتران کھنغ آژ بروبر انکار کھُزا۔غرضیکہ امریکہ او طالبان اۓ گپتران اۓ سلسلہ آسر بی اغ اۓ باوجوت افغانستان آ امن اۓ قیام اۓ حوالہ آژ نی دی کنفیوژن اۓ ماحول ایں۔چوش کہ طالبان آگو گپتران کھنغ اۓ مسلہ آ امریکہ آ پاکستان آژ تعاون دی گِتا ہمیں خاطرہ اے اٹکل جھنغ مشکل نعیں کہ آئیغ والا ایں وخت آ افغانستان آ گواس تھاں وٹا روغ والا ایں ۔طالبان اۓ دست رکھیائی پاکستان اسٹیبلشمنٹ سرا آژ کھناناں پھیزاغیں۔ہمیں خاطرہ گُمان ہمیں ٹؤک اۓ غیں کہ بالادستی طالبان آ ہی مِلی۔