سرگال:جمہوری ایں صدر اۓ نوخیں ھِند اۓ تعمیر اۓ اپیل

جمہوری ایں صدر رام ناتھ کووند آ ۷۳ می آجوئی اۓ روش آژ یک روش پیشا قوم اۓ نام وتی گشتانگ آ گوشتا کہ ھِند یک خاصیں موقع چکا وتی آجوئی اۓ ۷۲ سال پورا کھنغیں۔چند ہپتغ پھدا باباۓ قوم مہاتما گاندھی اۓ پیدا بی اغ اۓ روش منائینتھی آ رؤ۔گاندھی مۓ آجوئی اۓ کوشش آنی سجوں آنژ مزن ایں ہیرو اسا۔آں معاشرہ آ مُچھیں وڑ اۓ بے انصافی آنژ چھُٹینغ اۓ کوشش آنی اندرا مۓ سروک دی اسا۔جمہوری ایں صدر آ گوشتا کہ مروشی اۓ ھِند مہاتما گاندھی اۓ زمانہ اۓ ھِند آژ بالکل جتا ایں۔آنہی باوجوت مہاتما گاندھی اۓ واہریائی اۓ معنی مروشی دی ہماں وڑا برقرار آں۔اے وخت مُلک آ جُزوخیں چُنتی کوشش گاندھی اۓ ویچار آنر ہی اصلیت اۓ دیم دۓ غیں۔واجہ کووند آ گوشتا کہ اے سال گرونانک دیو جی اۓ ۵۵۰ می جینتی اۓ سال دی ایں۔آں ھِند اۓ عظیم سنت آنژ یک ایں۔سکھ پنت اۓ سروک اۓ ڈؤل چکا مڑدم آنی دل آنی اندرا آنہی آپا احترام اۓ ہماں کہ جزبہ ایں،آں نہ چھڑوئی آ مۓ سکھ براس او گوار آنی تکا محدود نعیں بلکہ ھِند او مُچھین جہان آ رہغ والا کروڑیں عقیدت مند آنہی چکا سَک باور ایر کھناں۔آنہی آ گوشتا کہ ہمیں سال گرمی آ مُچھیں ھِندوستانی آں ۱۷ می عامین گچین کاری آ بہر گتؤ جہان اۓ سجوں آنژ مزن ایں جمہوری عمل کھُزا۔آنہی آپا آنہی آ مُچھیں ووٹر آنر مبارک داسا۔آنہی آ گوشتا کہ مڑدم آں باز جوش آگو گچین کاری آ بہر گتا او وتی ووٹ داسیش او گچین کاری آپا وتی مُچھیں زمہ واری پھیلو کھُزیش۔ووٹر او عوامی نمائیندگ آنی نیمگا،شہری او سرکار اۓ نیمگا او سول سوسائیتی او انتظامیہ اۓ نیمگا یک بے مٹ سنگتداری آگو قوم اۓ ود او ترقی اۓ مۓ مشن مضبوط بی۔آنہی آپا مۓ ادارہ او پالیسی ٹھائینغ والا آنر لوٹھی کہ شہری آنژ آنہانر ہماں کہ فنڈ بیک مِلی،آنہی چکا مُچھیں دھیان دیاں او اہل وطن اۓ لوٹھغ آنی مُچھیں احترام کھناں۔ھِند اۓ صدر اۓ ڈؤل چکا مناں مُلک اۓ جتا جتا ھَند آنی دؤرہ کھنغ اۓ موقع مِلی۔ہمیں دؤرہ آنی نیمگا جتا شعبہ آنژ بستی ایں مڑدم آنگو مِنی بیٹھک بی۔منا محسوس کھُزا کہ ھِند اۓ مردم آنی دل لوٹھی او عادت چاہے جتا بی،مگن آنہاں نی واہو یک بھیرۓ غیں۔۱۹۴۷ آژ سرا مُچھیں ھِندوستانی آنی یک مقصد اسا،مُلک آ آجوئی دیائینغ۔مگن مروشی مۓ مقصد ایں ترقی آ گیش کھنغ او انتظامیہ آ شَر کھنغ تاکہ مڑدم آنی زِند وشتر بیس بی۔آنہی آ گوشتا کہ سماج او قوم اۓ ترقی آپا ٹھائینتھی ایں بنیاتی ایں خاکہ اۓ وشتر استعمال کھنغ او آنہی اۓ مھاپظت کھنغ مۓ زمہ واری ایں۔ہمیں بنیاتی ایں خاکہ چکا ھِندوستانی آنی حق ایں،مۓ حق ایں پھرچھے کہ اے قوم اۓ جائیداد ایں۔قوم اۓ جائیداد اۓ مھافظت دی آجوئی اۓ مھافظت آگو جُڑسی ایں۔آنہی آ گوشتا کہ دیگر مُلک آنگو وتی سیال داری آ دی ما تعاون اۓ جزبہ ایر کھنوں۔مۓ آگو ہماں دی خاصیں زانتکاری ایں آنہی آ سنگت مُلک آنگو ونڈغ آ مارا وشی بی۔آخیر آ صدر آ عظیم شاعر سبرا منیم بھارتی اۓ حوالہ داسؤ وتی پھیغام آ پورا کھُزا سبرامنیم بھارتی آ گوشتغۓ سا :ما مقدس کتاو او سائینس ہڑ دوایں سِکھوں ما آزمان او سمندر اۓ سیماں اۓ پیمائیش کھنوں،ما ماہ اۓ راز آ پدھر کھنوں او ما سرا صفائی ایر کھنغ اۓ ہُنر دی سِکھوں۔