پاکستان مضحکہ خیزئن دعوئ بہ کشمیریی مسئلہ بین الاکوامی کنگئ باروا۔

بہ گئوستگین جمعہ روچا بستگین دروازگانی پھدا بین الاکوامین کونسلئ سیکورٹی کونسلئ گیررسمین دیوانئ تسر بوتگیت اگہ بری دیوانئ باروا پاکستان دعوئ داریت کہ آی سوبئ نشان انت، ای سوب پہ آی مبارک بیت مگہ سوج بری ھبرئ پھدا درا بیت کہ پاکستان بہ برزین کچانہ اینکس سفارتین کوشست کرت کہ بین الاکوامین کونسلئ سیکورٹی کونسلئ مستقل و گیرمستقل ئن باسک گجام دیوانئ کننت و بہ آی تھا شہ ھندوستانئ ۳۷۰ دفعہ فیصلہ بدگشی کننت، یا گجام معاھدہ پاس کننت و یا گجام بیانئ جار کننت و وتی تشویش آ بری بھرا درا کننت مگہ ای رازین چیزئ نہ بوت۔ تھانکا بستگین دروازگانی پھدا یک گیررسمین دیوانئ بوت و بہ آی تھا پاکستانئ ای لوٹگ منتگ نہ بوت کہ رسمین دیوانئ بری سرگلئ سرا تسر بیت۔

شہ پاکستان آ نیمہ داری کرتہ تھانکا چین کوشستگ کرتگیت کہ ای مسئلہ یک بین الاکوامین رنگئ دنت مگہ سیکورٹی کونسلئ دیگہ باسک ای لوٹگا نہ منتنت۔ تہ ای حد کہ رندا شہ ای گررسمین دیوانا گجام گیررسمین بیانئ ھم جاری نہ کرتنت۔ سرئ ایشی پاکستانئ دائمین نمایندگ ملیحہ لودھی بستگین دروازگانی پھدئ ای تسر بوتگین گیررسمین دیوانا پاکستانئ سوب گشتنت و پاکستانئ میڈیا و ھال دیوک کہ بہ سَکین فشارئ چیرا کار کننت و ھر وھدہ شہ سنسرشپ آ شکایت کننت مُچین ای ھبرئ چاپ کنگ و شینک کنگا موشکول بوتنت۔ ای راز نشان داتنت کہ پاکستانئ سفارت کاری گجام سورین میڈالئ سوبین بوتگیت۔ وتی سوبئ جارا ھر جا جتنا پاکستان نوکین رویہ اختیار کرتگیت۔

زرورت ایش انت کہ بہ بین الاکوامین کونسلئ سیکورٹی کونسلئ تھا چی چیزئ چما آتگنت آی سرا غور بیت و پاکستانئ ای دعوئ آنا بری تناظر آ اشتگ بنت۔ پاکستانئ نمایندگ بانوک ملیحہ لودھی ای دعوئ کرتنت کہ پاکستان بہ کشمیریی مسئلہ بین الاکوامی کنگا سوبین بوتہ کہ بہ ای ھبرئ پسوئ آ ھندوستانئ دائمین باسک واجہ سید اکبرالدین شاہ گشتگنت کہ بری بیانئ ھبرا گشتگ کننت کہ چین و پاکستان یکجا بوتہ بہ بین الاکوامین براسدارئ دیما شہ پاکستانئ کومین احساساتانی باروا ھبر کرتگنت۔ ای احساساتانی ترجمانی آ بین الاکوامین براسدارئ فیصلہ و رائ پکر کرتگ کننت؟ پاکستانئ سفارت کار شہ ھر نیما ای کوشستا کرتنت کہ بین الاکوامین کونسلئ سیکورٹی کونسلئ گیشترکین باسک شہ ھند نفرت کننت و ھر نیمگا بہ ھندیی حلاپا اوشتنت۔ وت عمران خان بہ آخرین دما گون آمریکہ جمھورین سدر واجہ ڈونالڈ ٹرامپ بہ کشمیرئ مسئلہ باروا ھبر کرتگنت و امیت کرتنت کہ بہ پاکستانئ کٹا فضا راست بیت مگہ منظر ایش ات کہ، بیدئ چین ھیچ گجام باسک حتئ یک لفظئ ھم نہ گشتگنت کہ پہ پاکستانئ اطمینانئ وڑ بیت بلکہ شہ ھر نیمگا ای حکیکت درا بیت کہ کہ بہ کشمیرئ مسئلہ بھرا پاکستان یک نیمگ و تھانکا منتگیت۔

پاکستانئ پروشئ مزنتری علامت و نشان ایش انت کہ بیدئ چین ھیچ گجام دیگہ باسکین مُلکئ پہ رسمین دیوانئ کنگا بری مسئلہ باروا تیار نہ بوتگیت، وھدہ کہ بہ گیررسمین دیوانانی تھا نہ گجام منٹ استیت و نہ گجام ووٹنگ گنجائش۔ ھیچ مُلکئ دستا بال اورتہ گجام مردمئ مواقفئ نیمہ داری آ نہ کنت، بری دیوانا و یک بیانئ ھم جاری نہ بوت۔ سرئ ایشی پاکستان دعوئ داریت کہ آ بہ وتی مکسد آ رستگیت و سوبین بوتگیت۔ گیشترکین باسکین مُلک ای صلاح داتگنت کہ ھندوستان و پاکستان باید انت کہ یکجا نیندنت و وتی گیسویین مسئلہ آنا حل بکننت۔

چین سرئ ایشی کہ شہ پاکستانئ مواقف آ نیمہ داری کرتگیت آ ھمی وڑا گشتگیت کہ اگہ دوکین مُلک ای مسئلہ یکجا حل کننت گیتیر انت۔ بہر حال ھندوستان پہ دو نیمگین گپ و ترانا ھر وھدہ تیار انت تھاناک بری شرطئ سرا کہ پاکستان نیمہ داری شہ دھشت گردیا اوشتارینیت۔ خلاصہ ئن ھبر ایش کہ بین الاکوامین کونسلئ تھا بہ کشمیرئ بھرا ھر چیزئ کہ بوتہ شہ آی پورہ ئن وڑئ تاثر ای درا بوتہ کہ ھند و پاکستانئ نیامئ سَکیانی دور کنگئ بنیادین ذمواری بہ پاکستانئ سرا انت، پہ چہ کہ آ دھشت گردیی آ دیمرئی داتہ بہ ھر گامئ سرا پہ ھندوستان سَکی ودی کرتگیت۔

در اصل بہ آمریکہ و طالبانی نیاما ای گپ و تران کہ رادگ انت و شہ قیاس دیما بہ آخری مرحلہ رستگنت، و شہ اوگانستان آمریکائین پوجیانی ڈنا در کنگئ ای ھبر کہ رادگ انت، بری بھرا آمریکہ و پاکستانئ نیاما ھر وڑئ مفاھمتئ کہ بوتگیت ھندوستان گون آی ھیچ کارئ نہ داریت۔ مگہ ای راز معلوم بیت کہ پاکستانئ حکمران بری غلط فھمی تھا انت کہ بہ پاکستانئ دیما آمریکہ بدل بوتگین رویہ پیش نظر آ پاکستانا شہ بین الاکوامین براسدارئ نیمگا یک نوکین واکئ رستگیت کہ بہ آی سیائگا آ ھندوستان آ بہ عالمین براسدارئ یک راز نہ یک رازئ جنبینتگ کنت۔ مگہ ای رازین چیزئ تہ نون چما نیاتگیت۔ ھبر پھدا بہ ھمی ھبرئ سرا رسیت کہ ھندوستان و پاکستان باید انت کہ یکجا گپ و تران کننت۔ امیت انت کہ ای پیگام پہ عمران خان رستگ بیت۔