سرگال:اگر دھشت گردی بند نویسا تہ ہورین گپتران دی ممکن نعیں

پاکستان آ وتی وٹاژ مچھیں سفارتی کوشش کھُزا کہ کشمیر اۓ سوال چکا بین الاقوامی براسی اۓ دھیان ہمیں وٹا کھنائینتھ کھنت مگن اقوام متحدہ اۓ سیکیورتی کونسل اۓ غیررسمی او بند کمرہ آ بی اغ والا بیٹھک آ پھدا وا پاکستان آر دی ہمیں ٹؤک اۓ اٹکل بیسا کہ عالمی براسی کشمیر مسلہ آ ہماں وڑا نہ گندی ہماں وڑا پاکستان آ پھیدھارغ اۓ کوشش کھُزا۔امیت اۓ عین روگا ،چین اۓ سوا باقی ھچھ ملک آ آنہی آ بینالاقوامی مسلہ پوہ نویسا او باز باسک آں ہمیں ویچار پدھر کھُزا کہ اے مسلہ ھِند او پاکستان آ مِلسؤ گپتران آگو حل کھنغ لوٹھی۔البت عالمی براسی آ گیش بیسغیں ناوشی اۓ سبب آژ پِکر ضرور لاحق ایں پھرچھے کہ دوایں ملک بہر حال نیوکلائی صلاحیت ایر کھنوخ ملک آں او عالمی براسی ہمیں ٹؤک آ شَر ایں وڑا پوہ ایں کہ ھِند او پاکستان اۓ نیمگا ناوشی اۓ سجوں آنژ مزن ایں سبب اش انت کہ پاکستان آ دھشت گردی آ ڈن اۓ پالیسی اۓ یک حربہ اۓ وڑا استعمال کھُزا۔امریکہ اۓ صدر ڈونلڈ ٹرمپ آ چند روش سرا ہڑ دوکین ملک آنی سروزیر آنگو فون چکا ٹؤک کھُزا او ناوشی آ کھمیں کھنغ آپا گوشتئی۔سروزیر مودی آ آنہی آ پدھر ایں لپظ آنی اندرا گوشتغۓ سا کہ کشمیر اۓ بارو آ نی ایں روش آں ھِند آ ہماں کہ فیصلہ کھُزا آں مچھیں وڑا گو اندری ایں مسلہ اۓ زمرہ آ کھاۓ مگن آنہی آ ہمیں جاگاہ اۓ چھی اے سیاستزانتکار تیش دیائینغ او ناوشی پیدا کھنغ اۓ کوشش کھُزا،آں اصل آ حالت آنر ردین کھنغ اۓ کوشش کھنغاں ۔صدر ٹرمپ آ عمران خان آ وتی لہجہ نرم کھنغ اۓ مشورہ دی داسا مگن جہان اے زانی کہ ہموزا اۓ سیویلن سرکار اۓ ھچھ آواز نوی۔پردہ اۓ پھدا آژ مچھیں کار راولپنڈی اۓ پؤجی ہیڈ کوارتر آژ کھزی آ رؤ ۔نی ایں روش آں کشمیر اۓ سوال چکا پاکستان اۓ آرمی چیف جنرل قمر باجوا آ باز تیش پھیدھارتھغۓ سا او نی تہ اے فیصلہ دی بیسؤ شزا کہ آنہی مدتکار آ مچھیں سۓ سال گیشتر کھزی آ شزغاں ۔بہرحال اے آنہاں نی اندری ایں مسلہ ایں مگن پاکستان دوہمی آنی اندری مسلہ آنی نیمگا کھاۓ تہ آں کھسے آپا دی منغ اۓ لائیق نویس بی۔صدر ٹرمپ آ یک وار پدوارغ وتی وٹاژ اے پیشکش کھزا کہ آں ناوشی دیر کھنغ آپا ہڑ دوکین ملک آنی نیمگا ثالثی کھنغ آپا تیار ایں ۔البت آنہی آ اے دی گوشتا کہ کشمیر اۓ مسلہ آ مزہب اۓ مسلہ دی اوار ایں ۔ہمیں خاطرہ اے باز مشکل مسلہ بیسا۔صدر ٹرمپ اۓ ہمیں خلوص اۓ ھند قدر کھنت کہ آں ناوشی دیر کھنغ اۓ حق آ ایں مگن ھند آ مزہب اۓ نام چکا ھچھ دی جاگاہ آ ناوشی نعیں پھرچھے کہ ھند آئینی ڈؤل چکا اول روش آژ یک جمہوری ملک ایں۔مزہب اۓ نام چکا مڑدم آنر تیش دیائینغ او جھیڑو پیدا کھنغ پاکستان اۓ سیاست اۓ کار رہسا۔ہموزا تکا جموں کشمیر اۓ بارو آ سرکار اۓ نی ایں فیصلہ اۓ سوال ایں تہ اطمینان دؤخ ٹؤک اش انت کہ چین او پاکستان اۓ دوہمی کسن ایں اتحادی ملک آنی علاوہ ہر کھسے آ ھِند اۓ موقف اۓ وشادگی کھزااو آنہی آ ھند اۓ اندری مسلہ منسیش او باز ملک آں اے دی محسوس کھُزا کہ پاکستان آ نی ایں حالت آنی اندرا کشمیر اۓ مسلہ آ افغانستان آگو جوڑغ اۓ کوشش کھُزا۔افغانستان اۓ پیسر اۓ صدر حامد کرزئی آ دی گوشتا کہ افگان گپتران آ کشمیر اۓ مسلہ آگو جوڑغ اۓ کوشش آ پاکستان اۓ اصل ایں دیم پدھر کھُزا۔