سرگال:ایف اے ٹی ایف ٹلہ اۓ وٹاژ پاکستان آ سجوں آنژ بُنی ایں سطح اۓ لِسٹ آ اوار کھنغ

ھِند اۓ حلاپ آنگا تہ پاکستان اۓ سفارتی عمل ہر وخت جُزاں او وتی کوشش آنر سوب مند کھنغ آپا ہموزا اۓ سفارتکار دروغ گوئی آگو کار گِرغ آ دی شرم محسوس نہ کھناں ۔کشمیر اۓ مسلہ آ نی ایں روش آں پاکستان اۓ سفارتکار آں وتی سفارتی کمی آنر اینگا پدھر کھُزا کہ وا ہی بے پردہ بیسا۔اقوام متحدہ اۓ سیکیورتی کونسل اۓ غیر رسمی ایں بند کمرہ آ بی اغ والا بیٹھک آر وتی کھٹغ منسؤ وتی چگھ تھنائینتھی ،آنہی آژ دی آنہی آ ھچھ سبق نہ زڑتھا۔ہمیں نیمگا یک ٹؤک اے بیسا کہ پاکستان اۓ سپر براۓ سری لنکا آ گوشتا کہ سری لنکا اۓ صدر آ کشمیر آ ھِند او پاکستان اۓ نیمگا یک جھیڑوئی جاگاہ منسا ۔مگن سری لنکا اۓ سرکار آ پاکستان اۓ سپیر اۓ دروغ آ پدھر کھُزؤ آنہی تردید کھُزئی کہ صدر آ ہمیں بارو آ ھِچھ دی نہ گوشتا۔چھے پاکستان اۓ حاکم اینگے دروغیں ایں حبر آنگو جہانی براسی اۓ دیما وتی گار کھُزی ایں عزت پدوارغ آرغ آ باڑہ آں ؟اصلیت تہ اش انت کہ پاکستان اۓ عزت او باور اۓ برحال بی اغ ہمیختر آسان نعیں۔عزت آنہاں نی برحال بی ہماں ہانر وتی غلطی آنی احساس بی او آں اے کوشش کھناں کہ وتی غلطی یا منفی پالیسی آنر درست کھناں۔بہر حال اے آنہاں نی سفارتی عمل آنی یک مثال ایں ۔اگر دھشت گردی اۓ حوالہ آژ ٹؤک کھُزی آ برؤ تہ ہمیں محاذ چکا پاکستان اۓ ریکارڈ ہمیختر باز ردین ایں کہ کھسے دی آنہی چکا باور نہ کھنت ۔جہانی براسی آ ہر وٹاژ آنہی آ صلاح داسی آ شُزا کہ آں دھشت گردی اۓ حلاپ گام زیری او وتی ہموزا آژ دھشت گرد آنی جھوک آنر آسر کھنت مگن راست پھول کھنے تہ آنہی آ دھشت گردی آسر کھنغ آ ھچھ دل لوٹھی نعیں ۔اقوام متحدہ اۓ وٹاژ پاکستان آ سرگرم چنتی ٹلہ آنر عالمی دھشت گرد منسی آ شُزا مگن پاکستان آ ہمیں خطرناکین دھشت گرد آنی حلاپ چھڑوئی آ نام اۓ کاروائی کھُزا۔دھشت گرد ٹلہ آنی مالیاتی واہریائی او مدد آ دارغ آپا آنہی آ ایف اے ٹی ایف اۓ وٹاژ کے دھکا ھَکل داسی آ شُزا۔آنہی آ گرے لِسٹ آ اوار کھُزی آ شُزا مگن آنہی باوجوت آنہی آ ایکشن پلان اۓ پدھر کھُزی ایں ٹِک آنی روگا عمل نہ کھُزا۔ایف اےٹی ایف آ ہماں وخت آنہی آ گرے لسٹ آ اوار کھُزغۓ سا تہ کے ای سال آں ہمیں لسٹ آ اوار رہسا ۔چھی اے کاروائی کھُزؤ اگا دی کھنغ اۓ وعدہ کھُزؤ آں آنہی آژ درا تہ بیسا مگن وتی وعدہ پھیلو نہ کھُزئی او وتی گوستی ایں بیٹھک آ ایف اے ٹی ایف آ آنہی آ پدوارغ گرے لسٹ آ ماکھُزا او ھَکل داسئی کہ اگر آنہی آ ئیغ والا ایں اکتوبر تکا مطلوبہ کاروائی نہ کھُزا تہ آنہی آ بلیک لسٹ کھُزی آ رؤ۔ایشیا پیسیفک ٹلہ آ پاکستان اۓ ناقص عمل آنی سبب آژ آنہی آ باز بُنی ایں سطح اۓ لسٹ آ ماکھُزا ہماں کہ بلیک لسٹ اۓ براور ایں ۔چوش کہ ایشیا پیسیفک ٹلہ اۓ فائینل رپورٹ اکتوبر آ کھاۓ مگن پنچ ستمبر آ آنہی اۓ یک دیگر بیٹھک بی ہمائی آ پاکستان اۓ پھانزدھ ماہ آنی عمل آنی جائیزہ گِتی آ برؤ آنہی پھدا ہی ایف اے ٹی ایف اۓ ایکشن اجلاس آپا ضروری سفارش داسی آ برواں ۔اے اجلاس پیرس آ ہشدھ آژ بیست او سۓ اکتوبر تکا جُزی۔آنہی پھدا ہی ایف اے ٹی ایف اے فیصلہ کھنت کہ پاکستان آ گرے لسٹ آژ درا کھُزی آ برؤ یا گُڈا آنہی آ بلیک لسٹ آ اوار کھُزی آ برؤ۔