سرگال:سروزیر نریندر مودی اۓ وٹاژ ثالثی اۓ تجویز مسترد:ٹرمپ مطمئین

پاکستان آ وتی یک ٹک اۓ ایجنڈہ اۓ روگا کشمیر اۓ سوال چکا ہموزا یک وٹا بین الاقوامی براسی آ ھِند اۓ حلاپ وتی سفارتی عمل آنگو تیر جُزینتھغاں،دوہمی وٹا اندری ایں پاکستان تیش دیائینغ والا ٹؤک کھُزؤ مڑدم آنر ہموزا اۓ حاکم تیش دیائیناں ۔مقصد اے اسا کہ کشمیر اۓ مسلہ آ ھِچھ وڑا گو بین الاقوامی دیم داسی آ برؤ او ھِند ہمیں سوال چکا جہانی براسی اۓ اگا ایکا بی برؤ ۔پاکستانی حاکم عالمی براسی اۓ یک بہر بی اغ رندا دی نہ تہ عالمی حالت او دپ آنر وشتر کھنغ آ سوب مند بیسا او نہ ہی اے پوہ بیسا کہ جہان اے وخت تھاں وٹا رؤغیں تھانگے مسلہ آں ہماں ہانر کہ جہانی براسی دیر کھنغ آ باڑہ ایں ۔یعنی ہماں وخت جہان اۓ مڑدم عالمی براسی آ دیما کھُزی ایں مسلہ آنر دیر کھنغ اۓ کوشش کھنغاں تہ پاکستان،ھِند اۓ حلاپ کشمیر اۓ سوال کھڑو کھُزی ایں۔کَل نعیں کہ نی دی پاکستانی حاکم آنر اے احساس بیسا کہ نہ آنہاں نی ڈفلی آر اُش کھنغ والا کھسے دی نعیں ۔یک کار تہ سر وزیر عمران خان اے کھُزا کہ چوش کہ امریکہ افغانستان آژ وتی پؤجی آنر گڑدینغ آپا طالبان آگو ٹؤک کھنغیں او ہمیں حوالہ آژ آنہی آ پاکستان اۓ ضرورت بی غیں ،ہمیں خاطرہ آں حالت آنژ فائیدہ زڑتھؤ کشمیر اۓ مسلہ آ امریکہ اۓ صدر آ وتی وٹا کھنت تاکہ ھند چکا زور بی کہ آں امریکہ اۓ ثالثی منی۔ہمینگا پاکستان آپا حالت وشتر بی آں مگن واجہ عمران اے ٹؤک شمشتھا کہ ھِند اۓ موقف اٹل ایں کہ آں کشمیر پھجی آ ہورین وڑ اۓ مسلہ آنر چھڑوئی آ گپتران آگو حل کھنغ آپا باڑہ ایں او ھِچھ سۓ می دھُر اۓ ثالثی آ قبول نہ کھنت۔صدر ٹرمپ آ سرا دی ھند آر گوشتا کہ اگر ہڑ دوکین ملک لوٹھاں تہ آں ثالثی آپا تیار ایں مگن ھند آ پدھر کھُزا کہ آں ہمیں ٹؤک آر منغ آپا تیار نعیں۔اقوام متحدہ اۓ سیکیورتی کونسل اۓ غیر رسمی بیٹھک آژ سرا دی عمران خان آ ڈونلد ٹرمپ آ فون کھزؤ آنہی آر منت کھُزئی کہ آں ھِچھ دی وڑا آں پاکستان اۓ ویچار آنی حق آپا دگ سدھا کھنت مگن آں مسلہ دی ناسوب بیسا۔گُڈا جی ہپت اۓ بیٹھک آ فرانس او صدر ٹرمپ او سروزیر مودی اۓ بیٹھک بی اغ والا اسا ہماں وخت دی عمران خان آ اے مچھیں امیت اسا کہ ہمیں موقع چکا ہماں وخت سروک آپس آ مِلاں تہ ٹرمپ،سروزیر مودی آ ہمیں ٹؤک آپا راضی کھنت کہ آں امریکہ اۓ ثالثی آ قبول کھنت۔بہر حال ہڑ دوکین لیڈر آنی گپتران بیسا او کشمیر اۓ مسلہ چکا دی ویچار کھُزی آ شُزا مگن سروزیر مودی آ باز پدھر ایں لپظ آنی اندرا گوشتا کہ کشمیر اۓ سوال چکا ھچھ وڑ اۓ ثالثی اۓ سوال پیدا نوی ۔سروزیر مودی آ صدر ٹرمپ اۓ پھجی آ میڈیا آگو ٹؤک کھُزؤ اے مچھیں ٹؤک گوشتغاں ،دوہمی وٹا صدر ٹرمپ آ حوال کار آنگو ٹؤک کھزؤ گوشتا کہ یک شمبھے اۓ شف آ سروزیر مودی آگو آنہی بیٹھک بیسغۓ سا او آنہی اۓ ویچار ایں کہ ہڑ دوکین ملک آنر وتی ڈؤل چکا مسلہ آنر حل کھنغ لوٹھی ۔واجہ ٹرمپ آ گوشتا کہ آنہی آ عمران خان اۓ پھجی آ دو فون چکا ٹؤک کھُزا ۔اے دوایں سروزیر آنہی سنگت آں او آنہی آر امیت ایں کہ دوایں ملک وش ایں بھیرا حالت آنر وشتر کھناں ۔