سرگال: پاکستانئ میڈیائ سنسرشپ حلاپا مخالپین گلانی احتجاج۔

دیرین وھدہ نگوئستگیت شہ آ وھدان کہ عمران خان بہ مخالپین گلئ پیما بہ پاکستانئ تھا احتجاج و مظاھرہ کرتنت و پہ ای کاران نام داشتنت۔ اسلام آبادئ تھا وھدہ کہ آوان گیچئن کارئ فسات حلاپا احتجاج کرتنت بہ آی تھا و مُچین جمھورین رویہ و طریقہ آنا یک نیمگا اشتتنت و ھور گون وتی نیمہ داران گیرکانونین طریقہ و رویہ اختیار کرتتنت۔ رندا شہ جنرل پرویز مشرفی زوال آ بہ ۲۰۰۸ سالا، وھدہ کہ پاکستان پیپلز پارٹی سروکیا حکومت جور بوت، آ وھدہ ھم آوان پر شہ احتجاج آ اتنت و رندا شہ پنچ سالان وھدہ کہ پاکستان مسلم لیگ نواز حکومت جور بوت و آ شہ اقتدار آ پورہ ئن وڑئ دور منتت آ وھدہ ھم بیدئ احتجاج آ ھیچ کارئ دیگہ نہ کرتنت وھدہ کہ آ سیاسین سربراھئ اتنت و اوانی اولی ذمواری ایش ات کہ آوان بہ آ کوشستان مدد کننت کہ گون آوان جمھوریت دیگہ ھم مستحکم بیت۔ 

مگہ چو آوانی سیاسین موشکولیان امتیاز ایش ات کہ آوان پاکستانئ پوج آ ایماندار و پاک نشان دینت و پورہ ئن وڑئ بیدئ وت شہ مُچین سیاسین کارکنوکان و کرپرٹ کارکنوکان بدگشی کرتنت و اوانا بی ایمان گشتنت۔ پاکستانئ مردم ای ھبرا ھم نہ شموشتگنت کہ آوان بہ دھشت گردین ھلگرانی حلاپا ھم گجام بیانئ نہ داتگنت و شہ گئوستگین حکومتان بری ھبرئ سرا بدگشی کرتگنت کہ آوان بہ دھشت گردیئ حلاپئ جنگئ تھا گون آمریکہ و عالمین براسداری آ یکجا بوتہ بہ پاکستان ٹپ رسینتگنت۔ شہ آوان بہ طالبان خان ناما ھم یات بیت۔ آوانی ھمی سیاسین رویہ پہ آوان مدد کرت کہ پاکستانئ پوجئ مزنتری سیاسین نیمہ دار بنت۔ رندا کسمت آی زبر ات و کہ پوجئ بستگی گون نواز شریفی حکومتا خراب بوتنت و آکر سرا نواز شریف مجبور بوت کہ وترا شہ وتی پیما یک نیمگ کنت۔ مگہ آوانی پارٹئ حکومت بہر حال قائم منت۔ بہ گئوستگین سالئ تھا ھما عامین گیچئن کاری کہ تسر بوتنت پوج پورہ ئن وڑئ کوشست کرت کہ عمران خانی پارٹی آ بہ واکئ سرا بیاریت۔ 

ھالانی سرا سنسرشپ نافذ کرتنت و میڈیائ سرا فشار آورتنت کہ آ انچین رپوٹ دیما کنت کہ شہ آوانی وجا بہ دیگہ پارٹیان ٹپ برسیت و پاکستان تحریک انصاف گل شہ آی کٹ بارت۔ بہ ایشی بھرا پاکستانئ بنیادمین حکانی کمشن سَکین احتجاج درج کرت و گیرمُلکین ابزرور ھم دیم بہ ای ھبرا اشارہ کرتنت کہ آزات و منصفانہ ئن وڑئ ای کار تسر نہ بوتہ۔ 

بہر حال گیچئن کاریانی نتائج بہ برزین کچانہ شہ عمران خان و پوجئ لوٹگانی دیما ات، سرئ ایشی کہ پاکستان تحریک انصاف انچین درائین اکثریتئ حاصل کرتگ نہ کرت رازئ کہ گئوستگین حکومت حاصل کرتنت۔ مگہ جمھوریت، شفافیت و ایماندارئ دعوا کنوکین عمران خان وھدہ رازئ کہ میڈیائ سرا پابندی ات شہ آی نہ تھانکا مخالپین گل ناوشنود انت بلکہ وت عمران خانی چُنتی نیمہ دار ھم وتی دلا ناوشنود انت۔ 

پاکستان نونین وھدہ بہ یک سَکین اکتسادین بحران تھا انت، و عمران خان ای مُچین چیزانی ذمواری آ بہ ھما حکومتانی سرا پرینیت کہ دیمترا شہ آی واکا بہ دستا داشتنت۔ آوان پہ وام و قرض کنگا شہ چُنتی مُلکان دورہ کرتنت۔ آوان دیم شہ ایشی وام و قرض شہ عالمین دپترانا یک مزنئن عیبئ زانتنت و بہ آئی ایم ایف باروا و تہ ای حد آوان گشتتنت کہ آوان دیم بہ ای دپترا گدائی کاسگ آ گپتنئ جاگہ آوان وت کشی کنگا پسند کننت۔ مگہ بہ وتی ای ھبرانی سرا آوان قائم نہ منتنت و مجبور بوتنت کہ بہ ۶ بلین ڈالرئ پکیج جاگہ مُچین شرطانا مننت۔ 

آوانی ھمی گئوستگین دورہ کہ شہ آمریکہ کرتنت ھم ھمی مکسد آ داشت، کہ یک راز نہ یک رازئ پوجین مددانا شہ آمریکہ نیمگا پہ دوارگ بناہ کننت۔ بہ واشینگتن یک تھنک ٹینک دیوانئ تھا آوان بری ھبرئ سرا اعتراف کرتنت کہ نون ھم سی تہ چل ھزار دھشت گرد پاکستان تھا موشکول انت مگہ ستم ظریفی ایش ات کہ آوان ای الزاما بہ گئوستگین حکومتئ سرا پرینتنت کہ آوان ای ڈلانی حلاپا گجام کاروائی نہ کرتگنت۔ 

آوان ھمی وڑا کوشست کرتنت کہ ای ھبرئ کریڈیٹ آ ھم گرنت کہ نون آوانی حکومت شرّین وڑئ کاروائی کنت۔ ای راز معلوم بیت کہ عمران خان گون وتی ای کاران وتی دوستی و سنگٹی آ گون پوج آ دیما برنت۔ وھدہ کہ ای مُچین ھبر میڈیائ تھا کاینت بہ ھالانی چینلانی سرا پابندی عائد بیت کہ آوان شہ حکومت یا شہ پوجا بدگشی مہ کننت۔ اگہ شہ حکومت آ گجام چینلئ بدگشی شینک کنت ھما دم ا چینل و نشریات سرا پابندی عاید بیت۔ مخالپین گلانی انٹریو، پریس کنفرانس و بیان پورہ ئن وڑئ بلیک اوٹ بنت۔ بہ ھمی دورہ وھدہ آمریکہ تھا وھدہ کہ چُنت ھالانی نمایندگ شہ آوان بہ میڈیائ سنسرشپ باروا سوج و پرسان کرتنت، آوان ای الزام آ نہ منتنت و ای ھبرا چو یک مذاق تیر کرتنت۔ شہ لیکوکانی یک رپوٹئ دیما، حکیکت ایش انت کہ میڈیائ ڈل شہ عمران خانی حکومتا سَک بیزار انت و نون ھم انچین تجویز اتگنت کہ بہ میڈیائ سَکیانی بھرا یک خاسین عدالتئ قائم بیت۔ بہ ای مُچین ھبرانی حلاپا شہ مخالپین گلئ نیمگا و میڈیائ نیمگا پھد بہ پھدین وڑئ احتجاج بیت و عالمین میڈیائ تنظیم ھم وتی توارا برز کنت۔