سرگال:جموں و کشمیر او لداخ اۓ ترقی آپا سر وزیر اۓ باور دیائینغ

سروزیر نریندر مودی آ دوشی پیشین اُمت آگو گشتانگ کھُزؤ پیسر اۓ ریاست جموں وکشمیر اۓ بارو آ دفعہ ۳۷۰ اۓ رد بی اغ اۓ وجہ چکا تفصیل آگو روژنائی ماکھُزا۔ہمیں دفعہ اۓ روگا پیسر اۓ ریاست آ خاصیں درجہ مِلسی آ اسا۔ہمیں ہپتغ پارلیمان اۓ ہڑ دوایں ایوان آ دفعہ ۳۷۰ آ آسر کھنغ اۓ منظوری داسغۓ سا۔ہمیں وڑا پیسر اۓ ریاست مرکز اۓ انتظام اۓ بُنا دو جاگاہ یعنی جموں و کشمیر او لداخ آ بہر بیسا۔سروزیر آ وتی گشتانگ آ گوشتا کہ دفعہ ۳۷۰ او ۳۵ اے آ جموں کشمیر آ دہائی آنی دھشت گردی،جتائی ،بد عنوانی او کنبہ پروری اۓ علاوہ ھِچھ نہ داسا ۔آنہی آ گوشتا کہ دفعہ ۳۷۰ آژ آزادی نی یک اصلیت بیسا۔آنہی آ گوشتا کہ ہمیں دفعہ اۓ وجہ آژ پاکستان مڑدم آنی جزبہ آنر تیش دیائینغۓ سا اووتی مقصد پھیلو کھنغ آپا آنہی آ ہتھیار اۓ ڈؤل چکا استعمال کھنغۓ سا۔گوستی ایں سی سال آنی اندرا ۴۲ ہزار آژ گیش ھندوستانی جموں وکشمیر آ کُشتی آ شزغاں ہمائی زمہ وار پاکستان ایں۔آنہی آ گوشتا کہ ہمیں آرتیکل اۓ سبب آژ مُلک اۓ قانون جموں و کشمیر آ شَر ایں وڑا لاگو نیا۔پیسر اۓ ریاست آ سجوں آنژ گیش نقصان نوجوان،زائیف او سماج اۓ پھدا بیسغیں طبقہ آنر بیسا۔آنہی آ گوشتا کہ آرتیکل ۳۷۰ اۓ رد بی اغ آژ سردار پٹیل،بابا صاحب امبیڈکر ،داغدار شیاما پرسادمکھرجی،اٹل بہاری واجپائی او ملک اۓ کروڑ ایں مڑدم آنی واہو پورا بیسا ۔سروزیر آ گوشتا کہ ہماں کہ آساقی او حق نی مرکز اۓ انتظام بُنا ہمیں دو نوخیں جاگاہ آنر دی مِلی۔سروزیر آ گوشتا کہ ہمیں دو ایں جاگاہ آنی اُمت تِکھائی آ گِندی کہ آنہاں نی ترقی تھانگا بی۔آنہی آ قوم او مرکز اۓ انتظام بُنا ہمیں ہڑ دوایں جاگاہ آنر باور دیائینتھا کہ ھند سرکار ہر وخت آنہاں نی گون بی۔آنہی آ گوشتا کہ کشمیر سال آنژ فلم آنی شوٹنگ اۓ مرکز رہسا مگن ھند فلم انڈستری نی ہموزا شوٹنگ نہ کھنت۔آنہی آ فلم آنی شوٹنگ آپا فلم اندستری آ کشمیر آ شوٹنگ کھنغ آپا گام گیج کھنغ اۓ اپیل کھُزا۔سروزیر آ نوخیں جموں کشمیر اۓ ود او ترقی آ وتی عمل کھنغ آپا نوجوان او زائیف آنژ اپیل کھُزا۔آنہی آ گوشتا کہ اسمبلی اۓ آؤخین گچین کاری آ آنہانر اگا بیسؤ گیشتر بہر گرغ لوٹھی تاکہ آں ترقی اۓ عمل آنی بہر بیس بی آں۔آنہی آ مُچھیں مڑدم آنر قومی مفاد آ سجوں آنژ گیش اہمیت دۓ اغ او جموں و کشمیر آ یک نوخیں دگ دۓ اغ آپا واہریائی کھنغ اۓ اپیل کھُزا۔وتی ۳۸ دمان اۓ گشتانگ آ سر وزیر آ چھڑوئی آ ترقی اۓ ٹؤک کھُزا ۔ہماں وخت آژ آرتیکل ۳۷۰ آسر بی اغ آ پھدا پیسر اۓ ریاست جموں وکشمیر مرکز اۓ انتظام بُنا اۓ دو جاگاہ آ بہر بیسا ،پاکستان آ کشمیر اۓ مسلہ آ بین الاقوامی دیم دۓ اغ اۓ ردین لیو بِنا کھُزا۔مگن شے دھکا بین الاقوامی براسی چکا آنہی ھِچھ اثر نیاہ نیاغیں۔