سرگال: پاکستانئ تشویش بہ اوگانستانئ نوکین صورتحال بھرا۔

ای ھبر راست انت کہ آیوکین وھدہ و یا ھمی نزیکین آیوکین وھدہ بہ اوگانستانئ تھا چی بیگا انت بہ ایشی باروا چیزئ گشتگ نہ کننت و ھمی وڑا گشتگ نہ کننت کہ شہ گجام نیمگا چی وڑئ گامئ زورتگ بیت مگہ درا بیت کہ شہ وھدہ کہ جمھورین سدر واجہ ٹرامپ گپ و ترانئ سلسلہ گون طالبان اوشتارینتگیت پاکستانئ تشویش دو برابیر بوتگنت۔ ایشی وجا ھم زانتگ کننت۔ اصلین ھبر ایش انت کہ بہ سیمان شہ وھدہ کہ طالب و آمریکائیانی نیاما گپ وتران بناہ بوتنت شہ مُچان گیشترین اطمینان پاکستان آ حاصل بوت۔ ایشی اطمینان و وشھالئ مزنتری وج ایش ات کہ ھور گون گپ و ترانن طالبانی ھلگر ھم رادگ اتنت و ای راز معلوم بوت کہ ھیچ مردمئ آوانا اوشتارینتگ و سوجو پرسان نہ کرت۔ ای ھبرئ معنی ایش انت کہ ای تاثر بہ آ وھدہ باز ات کہ آمریکہ انتظامیہ تھانکا لوٹوک انت کہ وتی پوجیانا شہ اوگانستان پہ دوارگ بلوٹیت و آی تھانکا لوٹگ ایش ات کہ شہ طالبانی نیمگا ای ھبرئ گارنٹیداتگ بیت کہ بہ آی پوجیان گجام ٹپئ نہ رسیننت و ھمی وڑا شہ ای ھبرا اطمینان حاصل بیت کہ اوگانستان گیرمُلکین دھشت گردانی کودوگ جور نہ بیت۔

رازئ کہ گپ و تران دیمرئی کرتنت ھور گون آی گپ و تران و تپاکئ امیت ھم دیمرئی کرتنت و ھور گون آی طالبانی ھلگر ھم گیشتر بوتنت۔ اوگانستانئ حکومت ھیچ بستگی گون ای گپ و ترانان نہ داشت، بلکہ ای راز درا بوتکہ اوگانستانئ حکومت ھیچ وجود نہ داریت۔ ای مُچین ھبر پاکستانئ وشھالیا دو برابیر کرتنت۔ یک مرحلہ تھا ای راز درا بوت کہ تپاک و معاھدہ تفصیلات ھم چما اتنت۔ بہ ھمی وھدان ای ھبر ھم بہ نیاما ات کہ دیم شہ ایشی کہمعاھدہ قطعی کننت جمورین سدر ٹرامپ و طالبانی نمایندگ گون اوگانستانئ جمھورین سدر اشرف غنی بہ کیمپ ڈیویڈ تھا خفیہ ئن گیند و نیندئ کننت۔ مگہ بہ ھمی وھدان طالبانی دھشت گرد ھور گون یک آمریکائی ۱۲ مردمانا بہیک وت کُشین ھلگرئ تھا کشتنت۔ ای ھلگرئ ذمہ ھم ھما زورتنت۔ آمریکہ جمھورین سدر واجہ ٹرامپ بری ھلگرئ بھرا نہ تھانکا وتی ناوشنودی و غم آ شہ ٹوءیٹرئ پیگامانی راہ درا کرتنت بلکہ جار جتنت کہ ای خفیہ ئن گیند ونیند ھم کنسل بوتگیت و ھمی وڑا طالب و آمریکہ نیامئ گپ و تران ھم کہ شہ چُنتی ماھان رادگ اتنت کنسل بنت۔

گپ و ترانانی کنسل بیگئ جار ھور گون پاکستان پہ طالبان ھم گیر متوقع ات۔ پہ چہ کہ طالب نہ تھانکا وتی سوبئ جارا جتنت بلکہ دود گرگئ تیاریانا ھم بناہ کرتتنت۔ آ نیمگا بہ پاکستانئ تا ھم خاسین وڑئ بہ پوجین ٹولئ تھا و خفیہئن ایجنسیانی تھا ھم وشھالئ ماحول ات پہ چہ کہ آ بری پکر و حیالا اتنت کہ مُچین چیز شہ آوانی پروگرامئ دیما تسر بیت۔ آوانی وشھالیشہ دو وجان ات، یکئ ایش کہ رندا شہ ای معاھدہ طالبانی بالادستی بہ اوگانستانئ تھا حتمیات و گون ایشی پاکستان شہ وتی روکپتئ سیمسرا بی پکر بیت و وتی پورہ ئن زور و توجہ آ بہ روش دراتئ سرحدئ سیمان دنت۔ یعنی پہ ھندوستان آ نوکین سَکی ودی کنت، و کشمیرئ تھا دراندازی و دھشت گردیئ آ دیمرئیدیگی سرا وتی پورہ ئن توجہ آ صرف کنت بلکہ بہ لائن آف کنٹرل سرا ھم چُنتی رازئ موشکولیانا رادگ ساتیت۔

مگہ فی الحال ای مُچین اوشتارینت بوتگنت۔ طالب و آمریکہ نون یکئ آ دیگرا اخطار دینت، یک نیمگا طالب پہ آمریکہ اخطار دینت کہ اوگانستانئ آمریکہ کبرستان ثابت بیت و دیگہ نیمگا آمریکہ پہ طالبان اخطار دنت کہ پہ آوانانچین سبق یات دنت کہ ھیچ وھدہ شموشتگ مہ کننت۔

ھمی وھدان شہ اوگانستانئ حکومتئ نیمگا ھم عزمئ ھبر اوشکینتگ بنت۔ امن و امانئ گپ و ترانئ وھدہ آی توار جال ات مگہ نون نوکین لھجہ و ولولہ اوشکینتگ بنت۔ اوگانستانئ جمھورین سدرئ گوشوک واجہ صادق صدیقینوکین بیانئ جاری بوتگیت کہ اگہ گون طالبان ھر رازئ گپ و ترانئ ھم تسر بیگا بیت رندا شہ جمھورین سدرئ گیچئن کاریان تسر بوتگ کنت۔ ای ھبر یات کگئ وڑ انت کہ ھمی ماھئ ۱۸ تاریخا جمھورین سدرئ گیچئن کاریتسر بیگا انت۔ آوان ھمی وڑا ای ھبرئ دعوئ کرتنت کہ اوگانستانئ تھا بہ ھمی گیچئن بوتگین تاریخا گیچئن کاری تسر بنت و کانونین وڑئ اوگانستانئ حکومت گیچئن بیت۔ دیگہ نیمگا ای ھبر ھم محسوس بیت کہ رندا شہ امنئ گپو ترانانی کنسل کنگا طالب شوکہ بوتگنت۔ صورتحال نون ھم بہ اوگانستانئ تھا نامعلوم انت و تھانکا گڈ و وڈی و کنفیوژن ماحول بری مُلکئ تھا رادگ انت۔