"اف آ ٹی اف" و " آی ام اف" سَکین شرط : پاکستان پہ آمریکہ مددا زرورت داریت۔

پاکستانئ منفین پکر و حیال و آی عجیب و غریب ئن کردار بہ آی ھم پلّین مُلکانی دیما، گیشترکین وھدان آی را گون انچین حالاتان آشنا کرتگنت کہ شہ آی وجا عالمین براسدارئ تھا نہ تھانکا آی پیما ٹپی دیستگیت بلکہ آ گون چُنتی رازئ پریشانی و سَکیان دیم پہ دیم بوتگیت، مگہ شہ ایشی ھم مزنتری ستم ظریفی ایش انت کہ پاکستانئ حکمران سرئ ای مُچین نتائجان شہ وتی گڈین اشتباہ و غلطیان سبق نہ گرنت۔ اصلین ھبر ایش انت کہ واک گیشترکین وھدان راستامین وڑئ و یا بالواسطہ بہ گیرسیاسین واکانی دستا بوتہ و ھما سیاسین واک کہ گون ذمواری کار کننت ھیچ وھدہ و فرصتئ پہ آوان داتگ نہ بوتہ کہ واکا بہ دستا گرنت یا دیمرئی کننت، ھر وھدہ سیاسین قیادت گیتیر حکومتئ جور کنگئ وابا دیستگنت آوانا شہ راھ سرا یک نیمگ کرتگنت۔ ھما نمایندگئ کہ شہ استمانئ بینگا گیچئن بوتگنت بازین وھدہ بہ گیر گیچئن بوتگین واکانی دستان دار تختہ سرا ھم اوشتارینتگ بوتگنت، بازی وھدان جلا وطن بوتگنت و بازین وھدان بہ آئنین میلہ آنی پھدا مجبور بوتگنت کہ چمبراہ ماننت کہ آوانی کئسمتئ سرا فیصلہ بیت۔

گیرسیاسین واک وھدہ بہ سیاسین وائدہ آن زرورت ودی کننت کہ ھبر خراب بیت، و پہ ھبرئ کہ بین الاکوامین وڑئ خراب بوتگیت سیاسین چھرگئ پہ کار انت۔ اگہ شہ ای اعتبارا دیم برئ مسئلہ آن سیل کننت نونین وھدہ سرئ وزیر عمران خان پہ گیرسیاسین واکان اھمین کار آمد ئن شئ انت۔ بیدئ ایشی ھم آ پوجئ مورد پسندین نمایندگ اتنت۔ گئوستگین سالئ تھا وھدہ کہ گیچئن کاری تسر بوتنت بہ آ وھدہ پہ نووز شریفی دور ساتتنا شہ اقتدار آ و عمران خانی گلا بہ گیچئن کاریانی تھا سوبین کنگا پوج یک درائین کوت و رول داتشتگیت۔ بہ کشمیرئ بھرا ھندعستان بہ ھمی گوئستگین روچان فیصلہ کہ کرتگیت بہ آی بنیاد آ پوجین اسٹیبلشمنٹ بہ ھندوستانئ حلاپا اشتعال انگیزئ دیمرئی بھرا شہ عمران خان پورہ ئن وڑئ کٹ گپتگیت۔ پاکستانئ حکومت کہ بہ ھندوستانئ حلاپا ای سفارتین مھم آ بناہ کرت ای بنیادین مکسد ایش ات کہ عالمین براسدارئ توجہ شہ پاکستانئ نیمگا دشت گردیئ دیمرئی دیگئ مسئلہ سرا یک نیمگ بیت و پورہ ئن توجہ بہ کشمیرئ سرا بیائیت، کہ ھندوستانئ خالص ئن گیوسیین مسئلہ انت۔ و ای راز نہ بوت و ای راز بوتگ ھم نہ کرت بلکہ پاکستانئ پیما بہ عالمین براددارئ تھا دیگہ ھم خراب بوت۔

اف آ ٹی ایف کہ بہ ناجائیزین وڑئ فنڈئ یکجا کنگ و پول شودیی معاملہ انا پٹ و پولئ چیرا گیت و بین الاکوامین اکتسادین واچ ڈاگ انت چُنت ماہ دیما پہ پاکستان وارننگ داتت کہ اگہ پاکستان بہ دھشت گردین موشکولیانی و پول شودیی حلاپا شرّین و موثرین کاروائی مہ کنت آی را بہ سیائن لسٹ تھا شامل کننت۔ ھما روچان کہ پاکستان بہ کشمیرئ سفارتین دوڑ تھا موشکول ات اف آ ٹی اف ایشیا پسفیک گروپ پاکستانئ موجودہ ئن حالاتانا پٹ و پولئ چیرا گپ و بازین سَکین ھبر دات کہ ای معنا ایش ات کہ پاکستانئ ریکارڈ تہ ای کچانہ خراب انت کہ پورہ ئن وڑئ امکان انت کہ آی را بہ سیائن لسٹ تھا شامل کننت۔ اکتوبر ماہ نزیک انت و بہ ھما ماہ تھا اف آ ٹی اف اھمین دیوان بہ فرانس تھا تسر بیگا انت کہ بہ آی تھا پاکستانئ بھرا فیصلہ بیت۔ دیگہ نیمگا بین الاکوامین اکتسادین فنڈ ، آی ام اف شرائط ھم پہ پاکستان گجام کمین پریشانئ نہ انت۔ پاکستانئ اکتسادین حالات بہ برزین کچانہ خراب انت۔ بین الاکوامین اکتسادین فنڈ ۶ بلین ڈالر مددئ منظوری آ پہ پاکستان داتگیت و آی شرط ھم سَک انت، شہ اتفاق بہ اکتوبر ماہ آئ ام اف ھم پاکستانئ سہ ماھگین کارکردگی آ پٹ و پولئ چیرا گرگا انت۔

ای راز درا بیت کہ پاکستان باید پہ دوکین آی ام اف و اف آ ٹی اف بہ اکتوبر ماہ پسوئ دنت۔ ھور گون عمران خان آوانی حکومتئ دیگہ وزیر ھم پریشان انت۔ پاکستانئ حکومتئ ھال دیوک گشتگنت کہ سرئ وزیر عمران خان بہ ھمی وھدان شہ آمریکہ دورہ کنگا بنت و بہ بین الاکوامین کونسلئ جنرل اسمبلئ دیوانانی تھا کوت گرگا بنت۔ بری فرصتئ تھا آوان شہ جمھورین سدر واجہ ڈونالڈ ٹرامپ لوٹوک بنت کہ شہ آف آ ٹی اف و آی ایم اف سَکین شرائط آن آمریکہ پاکستان آ محفوظ ساتیت۔ ای ھال دیوک ھمی وڑا گشتگنت کہ عمران خان خاسین وڑئ شہ آمریکہ جمھورین سدر آ گزارش کنگا بنت کہ آ شہ وتی واکا کٹ گپتہ پہ اف آ ٹی اف گشنت کہ بہ پاکستانئ حلاپا سَکین گام مہ زوریت۔ ای ھبرئ ھال ھم رستگیت کہ پہ وتی رکینتنا شہ اف آ ٹی اف پاکستان کوشست کنت کہ گون دیگہ مُلکان چو سعودین عرب، چین، ترکیہ و ملیشیائ وڑئ مُلکان وتی سفارتین بستگیانا گیتیر کنت۔ بہ انچین حالاتان پاکستانئ ارباب اختیار شہ ای ھبرا سی بنت کہ پاکستانئ پیاما بہ عالمین براسدائ تھا بہ گجام کچانہ انت ! و پہ وتی پیمائ گیتیر کنگا آ چی باید کننت؟