آی اس آی کردار بہ آمریکہ و طالبانی گپ و ترانئ بی سوب بیگا۔

پاکستانئ سرئ وزیر عمران خان گشتگنت کہ آمریکہ و طالبانی نیامئ گپ و ترانئ کنسل بیگ ناوشنودیی و افسوسئ وڑ انت پہ چہ کہ امن و امان بہ سیمان بہ پاکستانئ کٹا ھم انت و شہ ھمی وجا آوان کوشست کننت کہ گپ و ترانا یک وارئ دیگہ بناہ کننت۔ آوان گشتگنت کہ اگہ گپ و تران پھدا شہ سر بناہ مہ بنت ای پہ پاکستان مزنئن المیہ و ناوشنودیئ وڑ بیت۔ پہ چہ کہ اوگانستانئ استمان شہ گڈین چل سالان گون سَکیان دیم پہ دیم انت و شہ ھمی وجا آوان کوشست کننت کہ گپ و تران پہ دوارگ بناہ بیت۔ ای ھبرئ تھا ھیچ شَکئ نہ انت کہ اوگانستانئ استمان شہ دیرین وھدہ گون سَکیان دیم پہ دیم انت مگہ ای مُچین سَکیانی وج چی انت۔ پاکستان باید انت کہ بہ ھبرئ ای نیمگا ھم چم پرینیت و آی سرا غور کنت۔ 

آمریکہ و طالبانی نیاما گپ و تران پہ سَکی بناہ بوتنت۔ آمریکہ گون ای ھبرا تپاک کرتت کہ گون امن معاھدہ آ وتی پوجا شہ اوگانستان ڈنا در کنت۔ گپ و تران بہ برزین کچانہ دیما شوت و بلکہ بہ آخری مرحلہ رست۔ بہ کیمپ ڈیویڈ دیوان تھا ای گپ و تران حتمین شکلئ گرگا اتنت۔ مگہ بہ ھمی وھدان طالب بہ کابلئ تھا یک ھلگرئ کرتنت کہ بہ آی تھا یک آمریکائی و ۱۱ مردمئ دیگہ کشتگ بوتنت۔ آمریکہ جمھورین سدر ڈونالڈ ٹرامپ رندا شہ ای ھلگرا گپ و ترانئ سلسلہ اوشتارینتنت۔ آوان گشتنت کہ طالب وتی رویہ بدل کنگا نہ انت و آوانی وت کُشین ھلگر رادگ انت شہ ھمی وجا آوان گپ و ترانا اوشتارینتنت۔ رندا شہ ایشی طالب بہ جمھورین سدر اشرف غنی گیچئن کارئ دیوانئ سرا ھلگر کرتنت و دوکی ھپگر بہ کابل تھا تسر بوت۔ اشرف غنی شہ ای ھلگرا رکتگ بوتنت مگہ بری دوکین ھلگرانی تھا کم شہ کم پنجاہ مردم وتی زندا شہ دست داتنت۔ 

آمریکہ جمھورین سدر بہر حال گپ و ترانا اوشتارینتنت و ای ھم حیرتئ وڑ انت و عجیب انت کہ بہ گپ و ترانانی تھا جمھورین سدر اشرف غنی کوتئ نداشتنت۔ بلکہ بہ گپ و ترانانی تھا آوان ھیچ رولئ نہ داشتنت۔ 

حالانکہ آوان شہ مُلکئ جمھورین کانونانی دیما جمھورین سدرئ پیما گیچئن بوتگنت۔ و قیام امنئ ھر وڑئ کوشستئ تھا باید انت کہ آوان کوت داشتگ بنت۔ مگہ شہ ای وجا کہ جمھورین سدر اشرف غنی پہ اوگانستانئ دھشت گردیئ سَکیان پاکستان آ ذموار زانت و ھمی وڑا گون ھندوستان نزیکین بستگی داریت پاکستان ھیچ وڑئ لوٹوک نہ انت کہ بہ گپ و ترانانی تھا اوانستانئ حکومت کوتئ داشتگ بیت و بری بھرا آ سوبین ھم بوتگیت۔ آ لوٹوک انت کہ شہ آی پالسی دیما معاھدہ شرط تعیین بنت۔ مگہ ای راز بوتگ نہ کنت۔ یک نیمگا شہ اشرف غنی کوت نہ گپتنا بہ امنئ گپ و ترانان و بہ آی گیچئن کارئ کمپائن سرا ھلگر کنگا نون ای ھبر شرّین وڑئ درا بوت کہ طالب بہ جمھوریت سرا ھیچ باور نہ دارنت و پاکستان ھم بہ جمھوریت سرا باور نہ داریت۔ بہر حال شہ ای ھبرا پورہ ئن عالم سی انت کہ طالب بہ پاکستان دستئ چیرا انت۔ 

دیم شہ گپ و ترانان شہ پاکستان پھد بہ پدین وڑئ لوٹتگ بوت کہ آ طالبانا راضی کنت کہ بہ گپ و ترانئ میز سرا نیندنت و دھشت گردیی آ اوشتاریننت۔ مگہ پاکستان شہ وتی پالسیانی وجا ھیچ فشارئ بہ طالبانی سرا نیاورت۔ نون کہ گپ و تران بہ آمریکہ و طالبانی نیاما بناہ بوتت ای ھبر بہ پاکستانئ کٹا ات۔ آ بری پکر و حیالا ات کہ رندا شہ ای گپ و ترانان معاھدہ پالسی گون ای شرائطان جور بنت و اوانستانئ تھا طالبانی حکومت قائم بیت و آ بالادستی حاصل کرتگ کنت۔ اوگانستانئ وھدہ کہ روسیہ ڈنا در بوت و طالبانی حکومت قائم بوت بہ آی تھا ھم پاکستان کوت داشت۔ ھما چُنت مُلکانی لسٹ تھا کہ طالبانی حکومت آ تسلیم بوتتنت پاکستانئ نام بہ لسٹ اول سرا ات۔ نون بہر حال گپ و ترانئ سلسلہ اوشتارینتگ بوتگیت و بظاھر شہ مُچان پریشان تر پاکستان انت۔ 

حالانکہ ای راز درا بیت کہ بہ گپ و ترانئ اوشتارینتنئ سلسلہ آی اس آی ھم بالواسطہ کوت داشتگیت۔ رازئ کہ طالب بہ جمھوریتئ سرا باور نہ دارنت و پورہ ئن وڑئ بہ تشدد آ باور دارنت ھمی راز آی اس آی ھم بہ تشدد سرا متکی انت و باور داریت۔ دوکین گئوستگین تاریخا تکرار کنگئ لوٹوک انت۔ عمران خانی ای ھبر کہ اگہ گپ و تران اوشتارینتگ بنت پہ پاکستان ای یک مزنئن المیہ بیت ای ھبر راست انت پہ چہ کہ پاکاتان بری پکر و حیالا ات کہ گون ای امن و امانئ معاھدہ بہ اوگانستانئ تھا وتی پالسیانی سیائگا طالبانا کنٹرل کنت۔ گپ و تران و دشت گردییدوکین یکجا تسر بوتگ نہ کننت پاکستان اگہ بہ سیمان امن و امانئ لوٹوک انت باید انت کہ وتی پالسیانا بدل کنت۔ اگہ نہ بہ اوگانستانئ تا ای ھاک و ھونئ گوازی کہ رادگ انت بہ ایشی تھا پاکستانئ دست ھم سوچنت و ھیچ چیزئ حاصل ھم نہ کنت۔