سرگال:ھَند چکا ھِلگر کھنغ ائے جیش محمد ائے نوخیں منصوبہ

پاکستان نہ چھڑوئی آ کشمیر ائے سوال چکا ھِند ائے حلاپ سفارتی سطح چکا دروغی ایں پروپیگنڈہ کھنغ او ھِند ائے یک وتی لوغی ایں مسلہ آ بین الاقوامی دیم دئے اغ ائے کوشست کھنغیں بلکہ پاکستان آ سرگرم ھِند ائے حلاپ دھشت گرد ٹلہ آنر تربیت او اسلحہ دیائینغ ائے دی مُچھیں کوشست کھنغیں تاکہ اے ٹلہ کشمیر او ھِند ائے دیگر ڈیہہ آ تخریبی کار کھُز کھنت۔گیر بی کہ گوستی ایں فروری آ جیش محمد ائے دھشت گرد آں جموں کشمیر ائے پلوامہ آ سی آر پی ایف ائے چھِل جوان آنر شہید کھُزغۓ سا ہمائی آ پھدا ھِند آ جہانی ایں پھیمانہ چکا دھشت گرد منسی ایں ہمیں ٹلہ ائے حلاپ سری ایں دھکا پاکستان اندرا شُزؤ کاروائی کھُزغۓ سا۔فروری ائے آخیر آ ھِند گواسین جیٹس آں صوبہ خیبر پختون خواہ آ بالا کوٹ آ جیش محمد ائے تربیت ائے اڈہ او فیسیلٹی چکا یُرش کھُزغۓ سا او آنہی آ پھدا نہ چھڑوئی آ جیش محمد بلکہ دیگر بازیں ٹلہ آنر دی پاکستان آ اے ہدایت داسغۓ سا کہ آں وتی عمل آنر کھمیں کھناں۔اصل آ پاکستان ائے سرکار آ ہمیں ٹؤک چکا زور داسغۓ سا کہ انتہا پسند ٹلہ اینگا کار کھناں کہ عالمی براسی ائے چھم آ میایاں۔آنہی آ پھدا چند ماہ تکا ہمیں ٹلہ آں باز ہُشاری آگو کار کھُزا۔پھرچھے کہ ایف اے ٹی ایف ائے ہَکل آژ دی پاکستان سَک تھُڑستی ایں۔مگن پنچ اگست آ ھِند آ ریاست جموں کشمیر ائے بارو آ ہماں کہ نوخیں انتظامی او قانونی فیصلہ کھُزا آنہی آ پھدا پاکستان باز کشپکش آ مان آتکی ایں او آنہی آ وتی ہمیں تھُڑستی ایں حالت آ سیاسی او سفارتی عمل آنی گون دھشت گرد ٹلہ آنر نوخیں وڑا منظم کھنغ ائے کوشست دی بنِا کھُزا۔پاکستان ائے خفیہ ایجنسی آئی ایس آئی ائے ہماں کہ عنصر جیش محمد ائے عمل آنی واہریائی کھناں او آنہانر تربیت دیاں آنہانر جموں وکشمیر او ھِند ائے دیگر دمغ آ جہاد او تخریب کاری آپا گوشتی آ شُزا۔مِلسغیں حبر آنی روگا کشمیری نسل ائے دھشت گرد آنر خاصیں وڑا استعمال کھنغ ائے کوشست کھُزی آ رؤغیں۔ہمیں بارو آ مشتاق زرگر ائے تنظیم آ منظم کھُزی آ رؤغیں۔بہاولپور آ سبھان اللہ او مرکز عثمان و علی آ جیش محمد آ جہادی آنر خاصیں وڑ ائے تربیت دئے اغ بنِا کھُزا۔لکسی ایں زرائیع آنی حبر آنی روگا جیش محمد ائے سد ائے نزیخ تربیت گِتی ایں دھشت گرد وادی نیلم ائے نزیخ پونچھ او راجوری سیکتر ائے آں وٹا لانچنگ پیڈ چکا مان پوت رگ کھنغ آپا انتظار کھنغاں او ایزا آنہاں نی نشانہ سری نگر ائے بجائی جموں ایں۔اِشی ائے علاوہ ھِند پؤجی آنی لاری آنی چکا دی ھِلگر کھنغ ایں۔پؤج وتی حکمت عملی چکا کار کھنغین او دوہمی وٹا عمران خان آنہی آلہ کار ائے ڈؤل چکا سیاسی او سفارتی مہم جوئی آ مصروف انت۔