سرگال:ایف اے ٹی ایف ائے وٹاژ پاکستان آ بلیک لِسٹ آ اوار کھنغ ائے گُمان

عالمی مالیاتی نظام آ شَر ایں او شفاف کھنغ آپا کثیر قومی ادارہ فائینینشل ایکشن ٹاسک فورس یعنی ایف اے ٹی ایف ہمیں ٹؤک چکا نیاہ ایر کھنت کہ مالی لین دین آ غیر قانونی طریقہ آکو کار موی او دھشت گرد ٹلہ آنر اے موقع نہ مِلی کہ آں ناجائیز وڑا فنڈ جوڑ کھناں او منی لانڈرنگ آ گیش کھناں ۔چوش کہ دھشت گردی ائے حوالہ آژ پاکستان جہان ائے یک بد نام ملک ایں ہموزا باز دھشت گرد ٹلہ آنی جھوک آں او نیٹ ورک قائیم آں۔ہمیں خاطرہ ایف اے ٹی ایف پاکستان چکا نیاہ ایر کھُزی ایں۔پاکستان ائے چُنتی ٹلہ تہ اینگے آں ہماں ہاں نی دولت آنی ڈمبار آں او آں غیر قانونی ایں وڑا فنڈ جوڑ کھناں۔اے وخت دی پاکستان چکا ایف اے ٹی ایف ائے نیاہ ایں ۔پھرچھے کہ آنہی ہَکل ائے باوجوت پاکستان سرکار آ اینگے ھِچھ گام نہ زُڑتھا ہمائی آژ کہ پاکستان آ دھشت گرد آنی مالیاتی واہریائی چکا پابندی جھنغ بیس بی۔پاکستان آ ایف اے ٹی اے آ کے ای سال آنی تکا گرے لِسٹ آ ایر کھُزا۔پاکستان ائے وٹاژ باز باور دیائینغ ائے سبب آژ آنہی آ چند سال پیشا گرے لسٹ آژ ہٹائینتھی آ شُزغۓ سا مگن پاکستان آ وتی وعدہ آنر پھیلو نہ کھُزااو چند ماہ سرا آنہی آ وارننگ دی داسی آ شُزا کہ آنہی آ اکتوبر ائے ماہ تکا آں دھشت گرد آنی حلاپ ہماں کہ ایکشن پلان ٹھائینتھی آ شُزغۓ سا آنہی پورا کھنت نہ تہ آنہی آ بلیک لسٹ آ اوار کھُزی آ برؤ۔پاکستان اگر بلیک لسٹ آ اوار بیسا تہ آنہی آ باز مشکل دیما کھنغی بی۔بین الاقوامی مالیاتی ایں ادارہ تکا آں پُجھس نوی درگتہ کہ آں سرا آژ قرض آنی بُنا ایں۔بین الاقوامی مالی فنڈ آژ آنہی آ شش بلین ڈالر ائے زر باز شرط آنگو منظور کھُزی آ شُزغاں ہمائی سبب آژ عامین پاکستانی آنی مشکل باز گیش بیسغاں۔او اگر نی ایف اے ٹی ایف ائے وٹاژ اگی ایں ماہ یعنی اکتوبر آ ھِچھ سخت ایں فیصلہ آتکا تہ ہمیں ٹؤک ائے گُمان پدھر کھُزی آ رؤغیں کہ پاکستان چھیختر مالی بحران آ بجھی برؤ۔گیر بی کہ ایف ائے ٹی ایف آ ۲۷ ٹک آنی یک ایکشن پلان تیار کھُزغۓ سا ہمائی روگا پاکستان آ ضروری گام زیرغی اسا ۔اے ٹؤک صاف کھُزی آ شُزا کہ اگر پاکستان بلیک لسٹ آ اوار بی اغ آژ بھچغ آ باڑہ ایں تہ آنہی آ ۲۷ ٹک آنی ہمیں ایکشن پلان چکا کار کھنغی بی۔بہر حال پاکستان اے کوشست تہ کھنغیں کہ آنہی اینگے عکس دیما کھائے کہ آں دھشت گرد آنی آپا باز سخت ایں سلوخ کھنغیں مگن آنہی آ نی تکا ھِچھ گام نہ زڑتھا ۔نی گندغی اش انت کہ اکتوبر آ ہمیں حوالہ آژ ایف اے ٹی ایف ائے چھے فیصلہ کھائے۔